Budan keıin B.Qoshpanovpen san márte kezdestik, ómir jolyna qanyqtyq. Orta mektepti altyn medalǵa bitirgen Bitimhan Semeıdegi medısınalyq ınstıtýtqa bir ǵana hımııa páninen emtıhandy bes degen baǵaǵa tapsyryp, stýdent atanady. Stýdent kezinde qoǵamdyq jumystarǵa belsene aralasyp, jan-jaqtylyǵymen kózge túsken talapty jasty О́skemendegi oblystyq aýrýhananyń bas dárigeri V.Ohoda qyzmetke shaqyrady. Ol kezde oqý bitirgen dárigerlerdi qyzmetke qabyldaý jergilikti mekeme basshylarynyń uıǵarymymen júzege asyrylatyn. Bitimhan hırýrgııany erekshe unatatyn. Alaıda sol mezette bul mamandyqqa oryn joq bolatyn. Sodan jas dáriger týǵan óńiri Zaısanǵa kelip, bastapqy jarty jylda terapevt bolyp, sodan soń ózi unatqan hırýrg mamandyǵy boıynsha qyzmetke kiristi.
El qurmetine bólengen Qalel Qalımoldın, Álimhan Ysqaqov syndy hırýrg aǵalary is-tájirıbesin jas mamanǵa úıretýden jalyqpady. Sol kezde aýdandyq aýrýhana bir mezgilde nebári 25 adamdy qabyldaı alatyn. Syrqat jandar aýrýhanaǵa ornalasýǵa uzaq ýaqyt kezek kútetin. Aqyry aýrýhana dárigerleriniń tabandylyǵy nátıjesinde, aýdan basshylary tuıyqtan shyǵyp, tósek sanyn 65-ke deıin ulǵaıtty.
– Jańylyspasam, 1981 jyl bolatyn, – deıdi B.Qoshpanov osydan 44 jyl burynǵy oqıǵany eske alyp. – Bir kúni ata-anasy úsh jasar Medet Baıbotanov degen balany alyp kelip, Almaty, Semeı, О́skemen qalalaryndaǵy dárigerlerge kórsetkenimen, shıpa bolmaǵanyn, menen kómek suraıtynyn aıtty. Teksere kele Medettiń búıreginde isik baryn anyqtadym. Ol kezde qazirgideı qýatty qondyrǵylar joq. Syrqat balanyń jaǵdaıy nashar. Turǵan jerinde qulap qala beredi. Aqyry batyl sheshimge kelip, shuǵyl operasııa jasap, búırektegi isikti alyp tastadym. Sol Medet qazir aman-esen júrip jatyr.
Altyn qoldy hırýrg aýdandyq aýrýhanada 46 jyl tapjylmaı qyzmet etti, onyń 36 jylynda bólimshe meńgerýshisi boldy. Osy ýaqytta 40 myńǵa tarta operasııany sátti jasady. B.Qoshpanov árdaıym bilimi men tájirıbesin ushtaýǵa nazar aýdarady. Aýdandyq aýrýhanada qyzmette júrgende Máskeý, Lenıngrad, Almaty sııaqty iri qalalarǵa baryp, bilimin jetildirý kýrstarynda oqydy, tájirıbe jınady. Almatyda jarty jyl, Tashkentte tórt aı oqýda bolǵan sapary nátıjesin berdi.
2017 jyly aýdandaǵy belgili kásipker, «Qurmet» ordeniniń ıegeri, óńirde ondaǵan áleýmettik-mádenı maqsattaǵy ǵımarattar turǵyzǵan Bolat Ikepuly Nurasyl «Týǵan jerge týyńdy tik» bastamasyna ún qosyp, óz qarjysyna halyqqa medısınalyq qyzmet kórsetetin «Sapa» ortalyǵyn ashyp, eki qabatty ǵımarat salyp berdi. Mekemeni basqarýǵa isker maman Bitimhan Qoshpanovty shaqyrady. О́z atyndaǵy ortalyq ashylǵaly bergi segiz jylda ondaǵan myń adamǵa medısınalyq qyzmet kórsetildi. Hırýrgtiń aıtýynsha, asqazan, baýyr, ót joldary, synyq túrlerine, gınekologııa syrqattaryna operasııa jıi jasalady.
Zaısannyń kórikti jerinen qonys tepken «Sapa» medısınalyq ortalyǵynda operasııa jasaıtyn, syrqattardy qabyldaıtyn oryndar, zerthanalar zamanaýı talapqa saı. Gemodıalız qondyrǵysy da jańa. Aýdanda qos búıregi jumys jasamaıtyn birneshe adam osy ortalyqta em-dom qabyldaıdy. Oǵan bıýdjetten qarjy bólinedi. Ortalyqta 10 dáriger, 9 medbıke eńbek etedi. Móldir Qosbaeva, Aıtolqyn Saılaýbekova, Roza Orazbaeva, Shyryn Janǵozına, Janat Otarbaeva sııaqty bilikti dárigerler men medbıkeler syrqattarǵa sapaly qyzmet kórsetedi. Ortalyq qyzmetkerleri munda barlyq jaǵdaı jasalǵanyn, B.Qoshpanovtyń bilimi men biliktiligi nátıjesinde ujym aýdan turǵyndarynyń qurmetine bólengenin, emdelýshiler sanynyń ulǵaıa túskenin aıtady.
B.Qoshpanov «Qurmet» ordeniniń, «Shapaǵat» medaliniń ıegeri, Densaýlyq saqtaý isiniń úzdigi, Zaısan aýdanynyń qurmetti azamaty, Semeı medısına ınstıtýtynyń «Qurmetti túlegi», túrli alǵys hattar men maqtaý gramotalary óz aldyna bir tóbe. Birneshe ret oblystyq, aýdandyq máslıhattyń depýtaty bolyp saılanyp, turǵyndardyń problemalaryn sheshýde belsendilik tanytty. О́nerli jan aýdandaǵy «Báıterek» ansamblin basqaryp júr. О́tkende, «Dombyra» kúninde jerlesteri aldynda kúmbirletip kúı shertti.
– Keıde kórshi Tarbaǵataı, Kúrshim, Marqakól aýdandarynan habarlasyp, kúrdeli operasııa jasaýǵa qatysýymdy ótinedi. Ondaıda birden kelisimimdi beremin. Biz adam janynyń arashashysymyz, halyqtyń densaýlyǵy myqty bolsa, elimiz soǵurlym damyp, órkendeı bermek. Men ózimdi baqytty adam sanaımyn, óıtkeni ǵumyr boıy mamandyǵyma adal, antyma berik boldym, – deıdi B.Qoshpanov.
Ońdasyn ELÝBAI,
«Egemen Qazaqstan» gazetiniń ardageri
Shyǵys Qazaqstan oblysy,
Zaısan aýdany
