Álemge áıgili korporasııa óz tarıhynda Ońtústik Koreıadan tys elde kásiporyn salý úshin alǵash ret aýqymdy qarajat bólip otyr. Jalpy quny 131,5 mlrd teńge bolatyn ınvestısııalyq jobanyń 117 mlrd teńgesi – KIA-nyń óziniki. Taıaýda «KIA Corporation»-nyń atqarýshy vıse-prezıdenti, kompanııanyń búkil álemdegi óndirisine jetekshilik etetin resmı ókili Djong Djýnchhol Qostanaıǵa arnaıy kelip, zaýyt qurylysymen tanysty.
«Biz Ortalyq Azııadaǵy qaı elge ınvestısııa salýǵa bolady degen másele tóńireginde uzaq oılastyq. Nátıjesinde, Eýrazııa kindiginde ornalasqan Qazaqstandy tańdadyq. Bul – biz úshin asa iri ári mańyzdy joba. Bárin tekserdik, eskerdik, endi, kórip otyrǵanymyzdaı, qazan aıynda jappaı óndiriske barlyǵy daıyn bolady. Sizderdiń qurylysqa jan-jaqty qoldaý kórsetýlerińizdiń arqasynda jobany merziminen keshiktirmeı iske asyrmaqpyz. Sondaı-aq lokalızasııany damytýdy da josparlap otyrmyz: komponentterdi osynda, turǵylyqty jerde óndirýge múmkindik berý úshin avtobólshekterdi jetkizýshiler arasynda irikteý júrgizemiz», dedi Djong Djýnchhol.
О́ńir basshysynyń aıtýynsha, KIA zaýyty – Qostanaı oblysynyń damý tarıhyndaǵy eń iri sheteldik óndiris orny.
«Memleket basshysynyń tikeleı qoldaýy men tıisti qurylymdardyń tyńǵylyqty jumysynyń nátıjesinde, atalǵan qurylys rekordtyq merzimde – 1,5 jylda aıaqtalǵaly tur», dedi Qumar Aqsaqalov.
Zaýyt eldegi eń zamanaýı kásiporynǵa aınalyp, jylyna 70 myń avtokólik shyǵarmaq. Jeliler osy bastan «Sorento» jáne «Sportage» modelderin shyǵarýǵa beıimdelgen. 2026 jyldyń sońyna qaraı qatarǵa jańartylǵan «Cerato» modeli qosylady. Keleshekte kásiporynda KIA-nyń 13 túrli modeli qurastyrylady. О́ndiris ornynda dánekerleý, shanaq syrlaý, plastık bólshekterdi boıaý, jınaqtaý jáne qoıma bólimderi tárizdi 5 tehnologııalyq ýchaske bar. О́ndiristik sehtarda 67 robot jumys isteıdi. Logıstıka «úzilissiz lek qaǵıdatymen» jumys istep, sapa 3D-skanermen baqylanady.
Ujymda óńirdegi kolledjder men ýnıversıtetterde, sondaı-aq ońtústikkoreıalyq «Dong-Eui» ýnıversıtetinde daıarlyqtan ótken jergilikti mamandar jumys isteıdi. Qazirdiń ózinde kásiporynda qostanaılyq kolledjderdiń 40 túlegi jumys istep jatyr. Taıaýda taǵy 34 jas maman jumysqa qabyldanbaq. Tájirıbe almasý baǵdarlamasy aıasynda Ahmet Baıtursynuly atyndaǵy Qostanaı óńirlik ýnıversıtetiniń 12 túlegi Ońtústik Koreıada oqyp keldi.
«Eki jyl ishinde óńirde 939 maman daıarlandy. Zaýyttyń kadrlyq strategııasy jergilikti mamandarǵa, olardyń biliktiligin arttyrýǵa baǵdarlanady. Jumysshylardy jatyn orynmen qamtamasyz etý máselesi de sheshimin tapty», deıdi oblys ákimi.
Búginde KIA zaýytynyń irgesinde aýmaǵy 30 myń sharshy metr bolatyn lokalızasııa ortalyǵy salynyp jatyr. Munda jylyna kólik oryndyqtary, paıdalanylǵan gazdy shyǵarý júıesi, plastık panelder sııaqty san alýan avtokomponent óndirilmek. Kásiporyn jylyna 60 myń avtobólshek daıyndaıdy.
Jol qurylysyna, kirme joldar men ınjenerlik jelilerge respýblıkalyq bıýdjetten 11 mlrd teńge bólingen. Uzyndyǵy 5,2 shaqyrymdyq temirjol tarmaǵy jumys istep tur. Mamandar atalǵan 2 iri óndiris orny iske qosylǵan soń, óńirdiń óńdeý ónerkásibiniń ósimi 46%-dan asyp túsedi degendi aıtady.
Qostanaı oblysy
