Ahýal solaı eken dep kásiporynnyń qol qýsyryp otyrmasy taǵy belgili. Jumysyn jańa baǵytta ilgeriletip jatyr. Sporttyq kıim óndirisindegi eleýli eńbeginiń arqasynda jańa deńgeıge kóterildi. Kompanııa otandyq naryqta ǵana emes, halyqaralyq deńgeıde de básekege qabiletti ónim óndiretin kásiporyn retinde tanylyp qaldy. Búginde túrli baǵyttaǵy ónimder shyǵarady. Jeńil atletıka men komandalyq sport túrlerine arnalǵan formalar, kúndelikti kııýge qolaıly kıimder, sporttyq aksessýarlar usynyp otyr. Barlyq ónim joǵary sapaly materıaldardan tigilip, otandyq jáne sheteldik tehnologııalardyń úılesimimen daıyndalady. «QazSPO-N» brendimen shyǵatyn kıimder fýnksıonaldylyǵy ári yńǵaılylyǵymen jáne estetıkalyq dızaınymen erekshelenedi.
«Jylyna 30-40 myńǵa deıin ónim shyǵaramyz. Sporttyq kıimder ulttyq naqyshta jasalǵandyqtan ishki naryqta satylady. Al qaz mamyǵy salynyp tigiletin qysqy kúrteshelerdiń 80%-ǵa jýyǵy eksportqa ketedi. Reseılik tutynýshylarymyzdyń úlesi artyp keledi. Onlaın-dúkender arqyly sol jaqqa jiberemiz. Bizdiń kúrteshelerdiń eń basty artyqshylyǵy ony kir jýǵysh mashınada jýa berýge bolady», deıdi «QazSPO-N» JShS bas dırektory Elena Svechnıkova.
Kompanııa óndiriste avtomattandyrylǵan tigin jabdyqtaryn qoldanady. О́ndiris sehtary Almaty men Esik qalasynda ornalasqan. Onda ekologııalyq taza materıaldardy paıdalanýǵa, eńbek qaýipsizdigi men ádil eńbekaqyny qamtamasyz etýge úlken mán beredi. Sondyqtan «QazSPO-N» eldegi kóptegen sport federasııasynyń, mektep pen kolledjderdiń resmı seriktesi. Sonymen qatar kompanııa jekelegen sport klýbtarymen jáne jeke tapsyrys berýshilermen de tyǵyz jumys isteıdi. Jyl saıyn túrli sporttyq jarystarǵa, marafondar men ýnıversıadalarǵa arnaıy forma daıyndap beredi.
«QazSPO-N» tikken arnaıy kıimder men formalar memlekettik uıymdarǵa, munaı-gaz, qurylys, medısına, áskerı jáne ónerkásip salalaryna da arnalǵan. Jumys kıimderi ISO standarttaryna, sondaı-aq Tehnıkalyq retteý jáne metrologııa komıteti talabyna saı óndiriledi. Paıdalanýshy men tapsyrys berýshi tarapynan sapasy jaqsy, berik, yńǵaıly degen pikirler jıi aıtylady. Sonymen qatar kompanııa tehnologııalyq matalar, janbaıtyn, sý ótkizbeıtin, antıstatıkalyq jáne basqa da qorǵanys fýnksııalary bar ónimder usynady.
«Kásiporynda matanyń qattylyǵy men qyl-qybyrynyń sapasyn anyqtaıtyn jeke zerthana bar. Tiginshilerdi osy jerde ózimiz oqytyp, daıarlaımyz. Oqý tegin, keıin birden jumysqa alamyz. Ortasha jalaqy shamamen 200 myń teńge kóleminde. Negizi, otandyq jeńil ónerkásiptiń ádiletsiz básekede joly aýyr, tabysy mardymsyz. Ýádeli jeńildikter Úkimet tarapynan bolyp jatsa, jaǵdaı jaqsaryp, jumysshynyń eńbekaqysy da artar edi», deıdi Elena Svechnıkova.
Kompanııa aldaǵy ýaqytta eksport kólemin ulǵaıtyp, kórshi elderge, ásirese Ortalyq Azııa naryǵyna shyǵýdy kózdeıdi. Elektrondy saýda platformalaryn damytý men arnaıy mobıldi qosymshany iske qosý da – aýqymdy jospar sanatynda.
