Foto: Mádenıet jáne aqparat mınıstrligi
Medıasııa – daý-janjaldardy sotqa jetkizbeı, órkenıetti jolmen sheshýdiń tıimdi tetigi retinde turaqty damyp kele jatqan ınstıtýt. Elimizde 2011 jyly qabyldanǵan «Medıasııa týraly» zań osy salanyń quqyqtyq negizin qalyptastyrdy. Izinshe medıasııa quqyqtyq júıesiniń mańyzdy elementi sanalyp, túıtkildi sheshýdiń balama ádisine aınaldy.
13 jyl ishinde salada birqatar mańyzdy ózgerister boldy. Qazirgi tańda medıasııa júıesi qurylymdyq ári mazmundyq turǵydan jańǵyryp jatyr. Osy baǵytta ýákiletti organ retinde Mádenıet jáne aqparat mınıstrligi memlekettik saıasatty júıeli iske asyryp keledi.
Mınıstrlik medıator uıymdarynyń reestrin júrgizý, olardyń qyzmetin úılestirý, reestrdi jańartý jáne qoǵamdyq medıatorlardyń jumysyn taldaý baǵytynda keshendi sharalar qabyldaıdy.
Búginde respýblıka kóleminde 23 medıator uıymy tirkelgen. Jalpy 2000-nan astam kásibı medıator eńbek etedi. Sonymen qatar, óńirlerde 1800-den astam qoǵamdyq medıator halyqqa quqyqtyq kómek kórsetedi. Máselen, jyl basynan beri áleýmettik osal toptarǵa 10 myńnan astam tegin keńes berildi.
Sonymen qatar respýblıka boıynsha 98 medıasııa kabıneti jumys isteıdi. Onyń bazasynda quqyqtyq kómek kórsetý, shıelenisterdi sheshý jáne daǵdarys jaǵdaılarynan shyǵýǵa qoldaý bildirý maqsatynda 900-den astam qoǵamdyq qabyldaý uıymdastyryldy.
Daýlardy sheshýde ulttyq dástúr men mádenı erekshelikterdi eskerý – tıimdi sheshim qabyldaýdyń mańyzdy faktory bolyp otyr. Sondyqtan elimizde etnostar arasyndaǵy ózara túsinistik pen qoǵamdyq kelisimdi nyǵaıtý turǵysynda etnomedıasııa eleýli úles qosyp jatyr. Qoǵamdyq medıatorlardyń basym bóligi etnomádenı birlestiktermen tyǵyz jumys istep, etnosaralyq shıelenisterdiń aldyn alýǵa septigin tıgizip keledi.
