Foto: QR Syrtqy ister mınıstrligi
Joba Shymkent qalasyndaǵy «Ońtústik» arnaıy ekonomıkalyq aımaǵynda tik tigisti bolat qubyrlar shyǵaratyn zaýyt salýdy kózdeıdi. Investısııa kólemi 70 mln AQSh dollarynan asady. Esesine 283 jumys orny qurylady. Josparlanǵan óndiristik qýat – jylyna 200 myń tonna.
Zaýyt munaı-gaz sektory, qurylys, turǵyn úı-kommýnaldyq sharýashylyǵy jáne ınfraqurylymdyq jobalar úshin suranysqa ıe qubyrlardy shyǵarady. О́ndiris ımportty almastyrýǵa baǵyttalǵan. Eske salsaq, byltyr elimiz 487 mln AQSh dollaryna 428 myń tonna qubyr ımporttaǵan edi.
Kezdesý barysynda Ǵ.Ospanqulov ınvestorlarǵa elimizdegi memlekettik qoldaý sharalary, onyń ishinde ınvestısııalyq preferensııalar, salyqtyq jáne kedendik jeńildikter, sondaı-aq arnaıy ekonomıkalyq aımaqtardaǵy jobalardy ornalastyrý múmkindikteri týraly tolyq aqparat berdi.
«Qazaqstan úshin óńdeýshi ónerkásipti damytý men negizgi óndiristerdi jergiliktendirý asa mańyzdy. Qubyr zaýytynyń qurylysy ekonomıkamyzdy ártaraptandyrý, ishki naryqty sapaly ónimmen qamtý jáne eksporttyq áleýetti arttyrý baǵyttaryndaǵy basymdyqtarymyzǵa tolyq saı keledi. Biz jobanyń barlyq kezeńinde –ákimshilik súıemeldeýden bastap memlekettik qoldaý quraldaryna qosylýǵa deıin – jan-jaqty qoldaý kórsetýge daıynbyz», dedi SIM Investısııalar komıtetiniń tóraǵasy.
Al Lı Sıandýn kompanııa Qazaqstandy óńirdegi negizgi seriktesi retinde qarastyratynyn jetkizdi.
«Biz Qazaqstannyń ınvestısııalyq áleýetin, turaqty iskerlik ortasyn jáne sheteldik ınvestorlarǵa kórsetiletin júıeli qoldaýdy joǵary baǵalaımyz. Qubyr zaýyty jobasy uzaq merzimdi jáne ózara tıimdi yntymaqtastyqtyń negizi bolatynyna senimdimiz», dedi «Tianjin Youfa Group» kompanııasy bas dırektorynyń orynbasary.
Shymkenttegi zaýyt qurylysynyń jobasy strategııalyq mańyzdy salada jergilikti óndiristi damytý men ónerkásiptik kooperasııany nyǵaıtýdyń mańyzdy elementi retinde qarastyrylady. Taraptar bastamany iske asyrý boıynsha birlesken jumysqa daıyn ekendigin bildirdi.
Aıta keteıik, Hong Kong Friend International Cooperation Co., Limited – Qytaıdaǵy qubyr óndirýshi eń iri kompanııalardyń biri «Youfa Group»-tyń enshiles kásiporny. Kompanııa damyǵan óndiristik jáne logıstıkalyq ınfraqurylymǵa ıe, ónimin 100-den astam elge eksporttaıdy jáne Azııadaǵy bolat qubyrlar naryǵynda jetekshi orynda tur.
