«Toǵyzqumalaq chempıondary vs JI» atty erekshe formattaǵy shara EXPO kesheniniń B2.2 blogynda ornalasqan Deneshynyqtyrý jáne buqaralyq sport akademııasynda (APEMS) uıymdastyryldy.
Jasandy ıntellektke qarsy el namysyn qorǵaǵan sportshylar:
– Aıana Isahan – bes dúrkin Qazaqstan chempıony, oqýshylar arasyndaǵy tuńǵysh álem chempıony, jastar arasynda Azııa chempıony, áıelder arasyndaǵy Azııa jáne álem chempıonattarynyń júldegeri, V Dúnıejúzilik kóshpendiler oıyndarynyń chempıony;
– Asylhan Qojanásip – halyqaralyq dárejedegi sport sheberi, álem chempıony, tuńǵysh «Qazaqstan zııatkeri» ataǵynyń ıegeri, 2024 jylǵy «Altyn tuǵyr» ulttyq syılyǵynyń laýreaty, V Dúnıejúzilik kóshpendiler oıyndarynyń chempıony.
Olardyń qarsylasy – jas ári daryndy ázirleýshi Nýrske Abylaı tehnıkalyq negizin qalaǵan ıntellektýaldy kompıýterlik baǵdarlama boldy. JI-men oıyn – adam men jasandy ıntellekt arasyndaǵy oı júıesiniń aıqasy retinde kópshiliktiń qyzyǵýshylyǵyn týdyrdy.
Uıymdastyrýshylardyń aıtýynsha, bul – zııatkerlik sportty jańa deńgeıge kóterýge, ulttyq oıyndy sıfrlyq formatta tanytýǵa baǵyttalǵan tyń bastama. Sonymen qatar, shara ulttyq murany qazirgi zamanǵa beıimdep, jastar arasynda tanymal etý maqsatyn kózdeıdi.
Jarys barysynda qatysýshylar men kórermender úshin arnaıy demonstrasııalyq sessııalar, pikir almasý jáne sheberlik sabaqtary uıymdastyryldy. Kópshilikke ashyq formatta ótken bul is-sharaǵa jasóspirimder men sport mektebiniń tárbıelenýshileri de belsendi qatysty.
- Biz búgin toǵyzqumalaq tarıhyndaǵy erekshe tarıhı sátti basymyzdan keshirip turmyz. Tuńǵysh ret toǵyzqumalaqtyń úzdik oıynshylary jasandy ıntellektpen oınady. Bul erekshe sharany biz uly Abaıdyń 180 jyldyǵyna arnap otyrmyz. Munyń da óz zańdylyǵy bar. Sebebi Abaı ózi ǵana oınap qana qoımaı, aınalasyna toǵyzqumalaqshylardy jınap, mektep qalyptastarǵan. Toǵyzqumalaq Keńes ıdeologııasynyń qysymymen joǵala jazdaǵan tusta onyń jandanýynyń basy-qasynda Muhtar Áýezov boldy. Bul da bir sabaqtastyq. Ǵasyrlar boıy toǵyzqumalaq úzdikterdi anyqtaý ǵana emes, jastardy tárbıeleý quraly bolyp keledi,- dedi Dúnıejúzilik Toǵyzqumalaq federasııasynyń prezıdenti Álıhan Baımenov.
Dúnıejúzilik Toǵyzqumalaq federasııasy, QR Toǵyzqumalaq federasııasy QR Týrızm jáne sport mınıstrligi qoldaýymen jańa tehnologııalardy toǵyzqumalaqtyń damýyna belsendi paıdalanyp keledi. Arnaıy mobıldik qosymshalardy aıtpaǵanda, toǵyzqumalaq AQSh, Kanada jáne ózge damyǵan elderdiń aýmaǵynda eń kóp oınalatyn oıyn retinde erekshelenedi.
