Foto: Sıfrlyq damý, ınnovasııalar jáne aeroǵarysh ónerkásibi mınıstrligi
Olımpıada 2-9 tamyz aralyǵynda Beıjińde ótip, 61 elden kelgen 77 komandany jınady. Qazaqstan atynan oǵan eki komanda qatysyp, qurama úzdikter qatarynan tanyldy.
Altyn medal sany boıynsha beıresmı esepte Qazaqstan 3 altynmen Polsha, Úndistan jáne Vetnammen ekinshi oryndy bólisti. Birinshi oryndy Reseı komandasy (6 altyn medal) ıelendi. Sonymen qatar úzdik ondyqqa Sıngapýr (2 altyn), Rýmynııa, Japonııa, Shvesııa jáne Gonkong-Qytaı (árqaısysy 1 altyn) kirdi.
IOAI – bul ǵylymı jáne praktıkalyq bólimderdi biriktiretin bedeldi halyqaralyq jarys. Onda qatysýshylar jeke jáne komandalyq túrde beıne men sýret generasııasy, mashınalyq oqytý, tabıǵı tildi óńdeý, kompıýterlik kórý jáne basqa da baǵyttardaǵy jasandy ıntellektke negizdelgen sheshimderdi ázirleý boıynsha tapsyrmalardy oryndaıdy jáne álemniń jetekshi sarapshylarynyń dáristeri, etıkalyq pikirtalastar, mádenı jáne bilim berý is-sharalary uıymdastyrylady. Jarystyń maqsaty – jastar arasynda jasandy ıntellektti nasıhattaý.
Sıfrlyq damý, ınnovasııalar jáne aeroǵarysh ónerkásibi mınıstrliginiń baspasóz qyzmetiniń habarlaýynsha Qazaqstan quramasynyń bas seriktesi Astana Hub halyqaralyq ınnovasııalyq klasteri atandy. Astana Hub komanda daıyndyǵyna eleýli úles qosyp, ulttyq quramanyń álemdik arenadaǵy qatysýyna qoldaý kórsetti jáne Qazaqstannyń jasandy ıntellekt salasyndaǵy jańa ortalyq retinde bedelin nyǵaıtty.
Qazaqstan quramasynyń Olımpıadaǵa qatysýyn uıymdastyrýshy - Qazaqstannyń sporttyq baǵdarlamalaý federasııasy (CPFED). Federasııanyń maqsaty – halyq arasynda sporttyq baǵdarlamalaýdy nasıhattaý jáne damytý, sondaı-aq otandyq qatysýshylardyń respýblıkalyq jáne halyqaralyq jarystardaǵy nátıjelerin arttyrý.
Qatysýshylardy irikteý men daıyndaýdan bastap sapardy uıymdastyrýǵa deıingi jan-jaqty qoldaýdyń arqasynda CPFED ulttyq quramanyń sapaly daıyndalýyn qamtamasyz etti. Bul – olardyń sátti óner kórsetýine yqpal etken negizgi faktorlardyń biri boldy.
Qazaqstan quramasynyń bul jetistigi IT-bilim berýdiń joǵary deńgeıin jáne oqýshylardyń ozyq tehnologııalarǵa degen qyzyǵýshylyǵyn dáleldeıdi. IOAI 2025 olımpıadasyndaǵy jeńis – bul tálimgerlerdiń júıeli eńbeginiń, bilim berý bastamalaryn qoldaýdyń jáne jasandy ıntellekttiń bolashaǵyn búginnen bastap qalyptastyrýǵa daıyn jas mamandar qataryn arttyrýdyń nátıjesi bolyp otyr.
