Semeı qalasy ákimdigi, Álıhan Bókeıhan ýnıversıteti, Jazýshylar odaǵynyń Abaı oblystyq fılıalynyń qoldaýymen jáne Abaı atyndaǵy oblystyq ámbebap kitaphananyń uıymdastyrýymen ótken jyr dodasyna Qazaqstan, Qyrǵyzstan, Túrkııa, Mońǵolııa elderinen 80-ge jýyq aqyn týyndylaryn joldaǵan.
Memlekettik syılyqtyń laýreaty, kórnekti aqyn Tynyshtyqbek Ábdikákimuly, mádenıet salasynyń úzdigi, kúıshi-kompozıtor Dúısebaı Shashtaı, aqyn, fılologııa ǵylymdarynyń kandıdaty L.N.Gýmılev atyndaǵy Eýrazııa ulttyq ýnıversıteti fılologııa fakýltetiniń dekany Serikzat Dúısenǵazın, aqyn, Halyqaralyq «Alash» ádebı syılyǵynyń laýreaty Erbol Alshynbaı, Jazýshylar odaǵy Abaı oblystyq fılıalynyń tóraǵasy, Abaı atyndaǵy oblystyq ámbebap kitaphananyń dırektory, aqyn Mereı Qart syndy qazylar alqasy músháıraǵa tórelik etti. Olar 80 aqynnyń ishinen 8-in iriktepti.
Qara óleń men qarasózdiń otany bolǵan Abaı eline kelgen úmitkerler kórermen aldynda óz óleńderin oqydy. Budan soń qazylar alqasy músháıra jeńimpazy men júldegerlerin anyqtap, olardy arnaıy dıplom jáne qarjylaı syıaqymen marapattady. Atap aıtqanda, bas júlde jáne 1 mln teńge kólemindegi qarjylaı syıaqyny belgili aqyn Umtyl Zaryqqan (Astana) ıelendi. I oryn (500 000 teńge) Nurbek Keńesbaıǵa buıyrsa (Astana), II oryndy (300 000) belgili aqyn, ǵalym Baýyrjan Jaqyp (Almaty) qanjyǵalady. Al III oryn (200 000) jas aqyn Dáýren Tileýhanǵa (Aqtóbe) buıyrdy.
«Kórermen kózaıymy» atalymyna (300 000) Baýyrjan Igilik (Semeı), «Jas Abaı» atalymyna (200 000) Erlan Amanqoja (Pavlodar) laıyq dep tanyldy. Al «Erekshe qonaq» atalymyn (100 000) Qýanysh Ospan (Kókshetaý) ıelense, «Jyly júrek» atalymy (100 000) Álııa Ińkárbekke (Almaty) buıyrdy.
Abaı oblysy
