Qoǵamnyń qozǵaýshy kúshi
El halqynyń úshten birin quraıtyn jastar – jańa ıdeıalar men jańashyldyqtyń, shyǵarmashylyq pen damýdyń qaınar kózi. Olar zamanaýı tehnologııalardy ıgerip, ınnovasııalyq startaptar quryp, halyqaralyq olımpıadalarda jeńiske jetip, ekologııany qorǵaý men erikti qozǵalystarǵa belsene aralasyp jatyr. Úkimet jastar saıasatyn el damýynyń basym baǵyty retinde belgilep, olardyń bilim alýyna, kásibı ósýine, mádenı jáne qoǵamdyq ómirge belsendi aralasýyna múmkindik beretin keshendi baǵdarlamalardy iske asyryp keledi.
Jasampaz jas maman
Qazirgi jahandaný dáýirinde sapaly bilim jas adamnyń erteńgi kúniniń jarqyn kepili. Elimizde tehnıkalyq jáne kásiptik bilim berý júıesi jańartylyp, oqý men óndiristik tájirıbeni ushtastyratyn qosarly baǵdarlamalar engizilip jatyr. Sıfrlyq platformalar arqyly zamanaýı daǵdylardy ıgerý múmkindigi keńeıip, halyqaralyq bilim almasý baǵdarlamalary men ǵylymı jobalarǵa qatysatyn jastar qatary artyp keledi. «Jas maman» jobasy, granttar, oqýǵa jeńildikpen beriletin kredıtter jáne 2029 jylǵa deıingi jańartylǵan memlekettik jastar saıasaty tujyrymdamasy – jas býynnyń kásibı jáne jeke damýyna jol ashatyn mańyzdy qadamdar.
Tabysty eńbekke talpynys
Memleket jastardyń eńbek naryǵynda ornyǵýyna baǵyttalǵan birqatar baǵdarlamalardy júzege asyryp jatyr. Sonyń ishinde «Dıplommen – aýylǵa» jobasy aýyldyq aımaqtardy bilikti mamandarmen qamtamasyz etse, «Jastar praktıkasy» men «Alǵashqy jumys orny» baǵdarlamalary tájirıbesi joq túlekterge alǵashqy resmı jumysqa ornalasý múmkindigin berip otyr. Prezıdenttik jastar kadrlyq rezervi – el basqarý isine jańa býyndy tartýǵa jáne olardyń memlekettik qurylymdarda basshylyq qyzmetterge jetýine jol ashatyn erekshe bastama.
Turmysqa tıimdi turǵyn úı
Baspana – jas otbasylar men jas mamandardyń negizgi qajettiliginiń biri. Prezıdent Qasym-Jomart Toqaevtyń tapsyrmasymen «Naýryz» jáne «Otaý» jeńildetilgen turǵyn úı baǵdarlamalary iske asyp jatyr. Bul bastamalar arqyly myńdaǵan jas azamat tómen paıyzdyq mólsherlememen jáne qolaıly óteý sharttarymen baspanaǵa qol jetkizip, ómir sapasyn jaqsartty. Sonymen qatar, elimizdiń barlyq óńirinde iske qosylǵan jeńildetilgen ıpotekalyq jobalar aımaq jastaryna da teń múmkindik berip otyr.
Igilikke bastaıtyn ınnovasııa
Jas kásipkerlerdi qoldaý maqsatynda memleket granttyq baıqaýlar, bıznes-ınkýbatorlar, akselerasııalyq baǵdarlamalar jáne «Táýelsizdik urpaqtary» granttaryn usynyp otyr. Jastardyń belsendiligi IT, agrotehnologııa, «jasyl» energetıka, kreatıvti ındýstrııa jáne áleýmettik kásipkerlik salalarynda aıqyn kórinip keledi. Olar halyqaralyq naryqqa shyǵyp, sheteldik áriptestermen baılanys ornatyp, el ekonomıkasyna jańa serpin berip jatyr.
Eriktiler eńbegi eren
El jastary ekologııalyq, mádenı jáne áleýmettik jobalarǵa belsendi aralasyp, óz erkimen qoǵamǵa qyzmet etý dástúrin qalyptastyryp jatyr. Mysaly, «Jasyl el» eńbek jasaqtary jyl saıyn myńdaǵan jasqa ýaqytsha jumys pen tájirıbe alýǵa múmkindik beredi. Bul tek kásibı daǵdylardy damytý ǵana emes, sonymen birge otansúıgishtik pen jaýapkershilikti nyǵaıtýǵa baǵyttalǵan qadam.
Jahandyq arenadaǵy jastar
Halyqaralyq forýmdar, mádenı almasý baǵdarlamalary jáne bilim jobalary arqyly qazaqstandyq jastar jahandyq tájirıbe jınap, sheteldik áriptesterimen baılanys ornatyp jatyr. Almatynyń 2025 jylǵy TMU jastar astanasy atanýy – elimizdiń jastar saıasatyn damytýdaǵy jetistiginiń halyqaralyq deńgeıde moıyndalýy.
Jumysshy mamandyqtar jyly – jańa múmkindik
2025 jyl elimizde Jumysshy mamandyqtar jyly dep jarııalandy. Bul – ónerkásip, qurylys, energetıka, kólik jáne IT salalarynda bilikti kadrlardy daıarlaýdy kúsheıtýge baǵyttalǵan qadam. Dýaldy oqytý júıesi, zamanaýı oqý-óndiristik ortalyqtar jáne kásiptik baǵdar berý is-sharalary jastardy eńbek naryǵynda suranysqa ıe maman bolýǵa yntalandyryp jatyr.
Instıtýsıonaldyq tetikter
Elimizde 234 jastar resýrstyq ortalyǵy jumys istep, aımaqtarda jastar bastamalaryn qoldap keledi. Ákimdikter janyndaǵy Jastar isteri jónindegi keńester keńesshi organ retinde belsendi jumys isteıdi. Al «Jastar» ǵylymı-zertteý ortalyǵy saladaǵy zertteý men taldaý jumystaryn úılestirip, jyl saıyn «Qazaqstan jastary» ulttyq baıandamasyn jarııalaıdy.
Sonymen, Halyqaralyq jastar kúni – bul ótkendi baǵamdap, keleshekti baǵdarlaıtyn tanymdyq mereke. Bilimdi, belsendi jáne bastamashyl jastar – elimizdiń eń úlken baılyǵy. Olar jańa Qazaqstandy qalyptastyrýda aldyńǵy qatarda bolyp, el damýyna jańa tynys beredi.
