Foto: Úkimet
Úkimet otyrysynda Oljas Bektenov qyrkúıek aıynda 115 myń jańa oqýshy ornyna arnalǵan 83 jańa mektep ashý josparlanǵanyn aıtty. Onyń ishinde «Keleshek mektepteri» ulttyq jobasy aıasynda 57 bilim oshaǵy paıdalanýǵa beriledi.
Jıynda elimizde úsh aýysymdy mektep máselesi birtindep sheshimin taýyp kele jatqany da atap ótildi.
Premer-mınıstr elimizdiń 9 óńirinde nysandy aıaqtaý boıynsha jumystardy jedeldetý qajet ekenine nazar aýdardy. «Samuryq-Qazyna» qoryna ákimdiktermen birge nysandardyń jańa oqý jylyna deıin paıdalanýǵa berilýin qamtamasyz etý tapsyryldy.
Sonyń ishinde 34 mekteptiń qurylysy sozylyp ketken. Bektenov ákimderge ýaqtyly aıaqtaýdy jáne jumys sapasyn qatań baqylaýǵa alýdy tapsyrdy.
Mektep qurylystary baıaý júrgizilip jatqan óńirler qatarynda Almaty qalasy, Abaı, Ulytaý, Batys Qazaqstan, Almaty, Qyzylorda, Atyraý, Aqtóbe jáne Shyǵys Qazaqstan oblystary bar ekeni anyqtaldy.
«Atalǵan óńir ákimderi jóndeý jumystarynyń sapasy men merziminde oryndalýyn tikeleı baqylaýyna alsyn. Sonymen qatar fızıka, hımııa, bıologııa, robototehnıka sııaqty arnaýly kabınetterdi der kezinde satyp alý da ózekti másele. Qyrkúıek aıyna deıin keminde 200 pándik kabınetti jabdyqtaý qajet», dedi Oljas Bektenov.
Premer-mınıstr biryńǵaı qaýipsizdik júıesin engizý jónindegi Prezıdent tapsyrmasy sapaly ári belgilengen merzimde oryndalýy kerek ekenine toqtaldy. Bilim berý mekemelerinde lısenzııasy bar kúzet, týrnıketter, jedel basqarý ortalyqtaryna qosylǵan kameralar mindetti túrde bolýy tıis.
«Munyń barlyǵy oqý oryndarynda balalardyń ómiri men densaýlyǵynyń qaýipsizdigine kepildik beredi. Ishki ister mınıstrligi terrorızmge qarsy qorǵaý talaptaryna sáıkestigi turǵysynan bilim berý nysandaryn tekserý jumysyn jalǵastyrýy qajet. Búginde óńirlerdegi jekemenshik bilim berý uıymdarynyń 30%-ǵa jýyǵy qajetti qural-jabdyqtarmen qamtamasyz etilmegen. Osyǵan nazar aýdarǵan durys», dedi Oljas Bektenov.
