Sot oryndaýshylarynyń jumysyn arttyrý sıfrlandyrý, kásibı biliktilikti arttyrý jáne jaýapkershilikti kúsheıtý arqyly júzege asýy múmkin. Sonymen qatar osy salany retteıtin zańnamany jetildirý, mamandardy daıarlaý men irikteý máselelerine de erekshe nazar aýdarylmaq.
E.Bolgerttiń aıtýynsha, jeke sot oryndaýshylary júıesi ádildikti qamtamasyz etýde jáne azamattardyń buzylǵan quqyqtaryn qalpyna keltirýde mańyzdy ról atqarady. Depýtat qazirgi tańda sot oryndaýshylaryna qoıylatyn kásibı talaptardy arttyryp qana qoımaı, olardyń jumysyna qoǵamnyń senimin kúsheıtý de asa mańyzdy ekenin jetkizdi.
«Jeke sot oryndaýshylarynyń júıesi ashyq, tıimdi jáne azamattardyń múddesi úshin jumys isteýge tıis. Kásibı standarttardy kóterý, halyqpen ózara is-qımyldy jaqsartý jáne jaýapkershilikti arttyrý baǵytynda naqty qadamdar qajet. Tek osylaı ǵana biz qoǵamnyń senimin nyǵaıtyp, sot sheshimderiniń ádil oryndalýyn qamtamasyz ete alamyz», dedi senator.
Al Senat depýtaty Q.Tastekeev Semeı qalasyndaǵy Medısınalyq ýnıversıtet gospıtaliniń jumysy, jańa angıograftyń múmkindikteri jáne bul qurylǵynyń pasıentterdi dıagnostıkalaý men emdeýdegi mańyzymen tanysty. Medısınalyq personalmen kezdesý barysynda parlamentshi Senattyń zań shyǵarý qyzmeti jáne medısına qyzmetkerleriniń quqyqtary men qaýipsizdigin kúsheıtýge baǵyttalǵan josparlanǵan túzetýler týraly aqparat berdi.
Buǵan qosa, senator «Amanat» partııasy oblystyq fılıalynyń tóraǵasymen kezdesip, óńirlik baǵdarlamalardyń júzege asyrylýy, olardyń turǵyndar úshin mańyzy, ózekti máseleler jáne aldaǵy damý josparlary jóninde pikir almasty. Depýtat óńirdiń áleýmettik-ekonomıkalyq damýy, halyqtyń ál-aýqatyn arttyrý jáne ınfraqurylymdyq jobalardy tıimdi iske asyrý – negizgi basymdyqtyń biri ekenin atap ótti.
