Qazaqstan Respýblıkasynyń Prezıdenti Qasym-Jomart Kemeluly Toqaev Jambyl Jabaevtyń 180 jyldyǵyna oraı uıymdastyrylǵan saltanatty konsertke baılanysty Qazaqtyń Jambyl atyndaǵy memlekettik fılarmonııasy ujymyna jáne kesh qatysýshylaryna Quttyqtaý hat joldady.
Konsertte N. Tilendıev atyndaǵy akademııalyq folklorly-etnografııalyq «Otyrar sazy» orkestri, B. Baıqadamov atyndaǵy Memlekettik hor kapellasy, Fılarmonııa jeke oryndaýshylary, Almaty oblysynyń ónerpazdary qatysty.
Is-sharaǵa QR Prezıdentiniń keńesshisi Málik Otarbaev, TÚRKSOI túrki mádenıeti men óneri halyqaralyq uıymynyń Bas hatshysy Sultan Raev, Qazaqstan Jazýshylar odaǵynyń basqarma tóraǵasy Mereke Qulkenov, Almaty oblysy men Almaty qalasy ákimdigi, zııaly qaýym ókilderi qatysty.
Konserttik baǵdarlama aıasynda «Otyrar sazy» orkestri men Almaty oblysynyń ónerpazdary bir sahnada óner kórsetip, M. Mańǵytaevtyń, E. Úsenovtiń jáne L. Hamıdıdiń shyǵarmalaryn oryndady. Sonymen qatar bıyl týǵanyna 165 jyl tolyp otyrǵan kúı anasy Dına Nurpeıisovanyń murasy da ulyqtalyp, Baıan Sátqyzynyń oryndaýynda «Naýysqy» kúıi tartyldy.
Keshte Qazaqstannyń Halyq ártisi Ramazan Stamǵazıev Jambyldyń «Jıyrma bes» ánin naqyshyna keltire oryndap, kórermenniń ystyq yqylasyna bólendi. Keshke Qyrǵyz Respýblıkasynyń Halyq ártisi Baqytbek Tilegenov bastaǵan ónerpazdar arnaıy qatysyp, qazaq pen qyrǵyzdyń tamyrlas tarıhyn ásem áýenmen órnektedi.
Keńes Dúısekeevtiń 80 jyldyǵyna arnalǵan merekelik konsert ótedi
Fılarmonııa foıesinde Jambyl mýzeı-úıimen birlesken kórme ashylyp, kelýshiler jyr alybynyń kózin kórgen qundy eksponattardy tamashalady.
