Is-shara Mańǵystaý oblysy ákimdigi, QR Ekologııa jáne tabıǵı resýrstar mınıstrligi jáne Tegeran konvensııasy hatshylyǵynyń birlesip uıymdastyrýymen ótti. Oǵan Tegeran konvensııasy hatshylyǵynyń ókilderi, memlekettik organdar, ǵylymı-zertteý ınstıtýttary, jas ekologtar men úkimettik emes uıymdardyń ókilderi qatysty. Qatysýshylar klımattyń ózgerýi Kaspıı teńizi ekojúıesine qalaı áser etip jatqanyn talqylap, onyń keri áserin azaıtýǵa baǵyttalǵan usynystar ázirledi.
Is-shara barysynda Mańǵystaý oblysy boıynsha balyq ınspeksııasy basqarmasynyń mamany Gúlnur Ábdiǵalıeva ıtbalyqtardyń tirshilik ortasyn saqtaý sharalarynyń maqsat-mindetteri týraly aıtyp berdi.
«Mundaı sharalardy úsh kezeńge bólýge bolady. Birinshi kezeńde mindetti túrde taldamalyq jumys júrgizilýi qajet. Arhıvtik materıaldardy, esepter men buryn jasalǵan zertteýlerdi paıdalana otyryp, saraptamalyq sholý uıymdastyrylady. Ekinshi kezeń – ádistemelik jumys. Bul kezeńde syrtqy faktorlardyń ıtbalyqtardyń minez-qulqyna áseri men balyqtarǵa akýstıkalyq yqpaly zertteledi. Sonymen qatar shý men diril sııaqty faktorlar qarastyrylady. Úshinshi kezeńde naqty is-sharalar boıynsha usynystar ázirlenedi. Mysaly, maýsymdyq kezeńderge baılanysty kemeler qozǵalysyn retteý, ýyldyryq shashatyn aýmaqtardy qorǵaý jáne balyq qoryn arttyrý boıynsha usynystar engiziledi», dedi Gúlnur Ábdiǵalıeva.
Sondaı-aq kezdesýde «AMANAT» partııasynyń Mańǵystaý oblystyq fılıaly janyndaǵy ekologııalyq keńestiń tóraǵasy Orynbasar Toqjanov Kaspıı teńiziniń problemalaryna toqtaldy.
«Kaspıı teńizi deńgeıiniń tómendeýi – bul tek ekologııalyq másele ǵana emes, sonymen qatar aımaqtyń áleýmettik-ekonomıkalyq damýyna áser etetin faktor. Biz teńiz tabıǵatyn saqtaý jáne onyń bolashaǵyn qamtamasyz etý úshin barlyq múddeli taraptardyń kúshin biriktirýimiz kerek», dep atap ótti Orynbasar Toqjanov.
