Sýretti túsirgen – Erlan OMAR, «EQ»
Prezıdent Qasym-Jomart Toqaev delegattarǵa úndeý joldap, jastar qoǵamnyń qozǵaýshy kúshi ekenin atap ótti. Forýmǵa qatysýshylarǵa Prezıdenttiń úndeýi LED-ekran arqyly kórsetildi.
Memleket basshysy jastar forýmy ótip jatqan Pavlodar aımaǵy ult rýhanııatyn baıytýǵa ólsheýsiz eńbek sińirgen kórnekti tulǵalardyń mekeni dep atap, sondaı-aq elimizdegi ónerkásip ortalyǵynyń biri ári el ekonomıkasyn órkendetýge qosqan úlesi zor ekenin atap ótti.
Sonymen qatar Prezıdent elimizde eńbek adamyna árdaıym erekshe qurmet kórsetilýi kerektigin aıtty. Muny óskeleń urpaqtyń sanasyna sińirý mańyzdylyǵyna da nazar aýdardy.
Forým jumysyna Úkimet basshysynyń orynbasary Ermek Kósherbaev pen Pavlodar oblysynyń ákimi Asaıyn Baıhanov qatysty.
– Búgin munda myqty, básekege qabiletti jáne tehnologııalyq jaǵynan damyǵan Qazaqstandy qalyptastyratyn jastar jınalyp otyr. Elimizde halyqtyń úshten biri jastar, azamattardyń ortasha jasy 32 jasty quraıdy jáne bul úles ósip keledi. Sondyqtan Jumysshy mamandyqtar jylyn jarııalaý olardyń bedelin arttyrý jáne tehnıkalyq mamandyqtardy jastar arasynda tanymal etý úshin mańyzdy qadam boldy. El Úkimeti jastardy qoldaý boıynsha keshendi is-sharalar qabyldap otyr. Atap aıtqanda, stýdenttik shákirtaqylar eki ese ulǵaıdy, jańadan 17 jataqhana salynyp, sheteldik kolledjder men ýnıversıtetterdiń fılıaldary ashyldy. «Jasyl el», «Jastar tájirıbesi», «Dıplommen – aýylǵa!» baǵdarlamalary iske asyrylyp, jumysshy mamandarǵa arnalǵan jeńildetilgen «Naýryz», «Otaý» turǵyn úı baǵdarlamalary jáne «Naýryz jumysker» jańa jobasy jumys isteıdi. «Bolashaq» stıpendııasyna qaıta baǵdarlaý júrgizilip, granttardyń keminde 60 paıyzy tehnıkalyq mamandyqtarǵa bólinedi, – dedi vıse-premer.
Sýretti túsirgen – Esenjol Isabek
Is-shara barysynda bir salada kóp jyldar eńbek etip kele jatqan Pavlodar oblysyndaǵy eńbek áýleti – Ámirenovter marapattaldy. Olar kómir óndiretin kásiporynda 180 jyldan astam ýaqyt eńbek etip keledi.
– Eńbekke degen qurmet urpaqtan-urpaqqa berilgen otbasynda óstim. Atam, ákem, aǵalarym ómir boıy óńirdiń ıgiligi jolynda aıanbaı eńbek etti. Men solardyń jolyn jalǵastyryp jatqanymdy maqtan tutamyn. Ári osy forýmda bizdiń, ıaǵnı jas mamandar elimizge qajet ekenimizdi jáne onyń damýyna óz úlesimizdi qosa alatynymyzǵa kóz jetkizdim, – deıdi eńbek dınastııasynyń jas ókili Erqanat Ámirenov.
Pavlodar oblysynyń ákimi Asaıyn Baıhanov óńirde 80 myńnan astam adam eńbek etetin 1000-nyń ústinde ónerkásiptik kásiporyn tirkelgenin, onyń 75 paıyzy jumysshy mamandyq ıeleri ekenin atap ótti.
– Kepildi jumysqa ornalasý, laıyqty jalaqy, áleýmettik paket máselesin qolǵa alý arqyly tehnıkalyq mamandyqtardyń jas mamandary úshin biz naqty jaǵdaılar jasap otyrmyz. Búgingi forým – bul kúsh-jigerdi biriktirýdiń, jańa ıdeıalarmen almasýdyń, eldiń damýyna yqpal etetin naqty usynystar engizýdiń biregeı múmkindigi, – dedi óńir basshysy.
Forýmǵa jınalǵandar eki kún boıy tájirıbe almasyp, kásibı ósý joldaryn keńeıtip, tabysty eńbek jolynyń úlgilerine qanyqty. Otandyq óndiristi jańǵyrtý úderisterine jastardyń qatysýyn kúsheıtý, mansaptyq múmkindikterdi keńeıtý baǵytyndaǵy taqyryptyq sessııalar, trenıngter, pikirtalas alańdarynda kóptegen tyń jáne qyzyqty maǵlumattar aıtyldy. Jastar Pavlodar qalasynyń ásem jerlerimen, óndiristik kásiporyndarymen tanysyp, ózderi úshin paıdaly tustardy kóńilderine toqyp qaıtqany daýsyz.
Jumysshy mamandardyń mártebesin kóterý – ekonomıkalyq turaqtylyq pen áleýmettik progrestiń basty faktory retinde jumysshy kásipteriniń rólin kúsheıtýdegi strategııalyq qadam. Al jumysshy mamandyqtar oryndaryn damytý – el bolashaǵyna, onyń tehnologııalyq jáne ekonomıkalyq damýyna salynǵan ınvestısııa. Bul rette Ertistiń Pavlodar óńiri – ónerkásibi damyǵan aımaq ekenin aıta ketken jón. El ekonomıkasynyń ilgerileýine aıtarlyqtaı mol úlesin qosyp otyr. Jumysshy mamandyqtary jylynda óńirdiń atqarýshy bıligi qarapaıym eńbek adamdaryn úlgi etip, jastardyń nazaryn solaı qaraı burýǵa talpynyp keledi.
Forýmnyń alǵashqy kúni ótken plenarlyq otyrysta Mádenıet jáne aqparat vıse-mınıstri Evgenıı Kochetov zamanǵa saı kásiptik-tehnıkalyq mamandyqtardy ıgergen jastarǵa óndiris oryndarynan suranys kúnnen-kúnge ósip kele jatqanyn jetkizdi.
– Jastardyń tehnıkalyq bilimge degen suranystaryn qanaǵattandyrý úshin otandyq quzyretti organdar mańyzdy jobalar men baǵdarlamalardy úzbeı atqaryp keledi. Memlekettik qoldaýdan bólek, kóptegen iri kásiporyn jas mamandaryn qoldap, jeke áleýmettik baǵdarlamadar túzip jatyr. Munyń barlyǵy Memleket basshysy bergen tapsyrmalardyń óz ornymen iske asyp jatqanyn bildiredi. Bul tusta Pavlodar oblysy jastar saıasatyn damytýda kóshbasshylar qatarynda ekenin aıtyp ótkizim keledi, – dedi E.Kochetov.
Oblystyq máslıhat tóraǵasy Ilıa Terenchenko búginde oblystyq depýtattar korpýsynyń 30 paıyzdan astamy jastar ekenin atap ótti. Al óńir boıynsha bes saıası partııa fılıaldarynyń tórteýin jastar basqaryp otyr.
«Halyqaralyq baǵdarlamalar ortalyǵy» JShS basqarma tóraǵasy Ádil Qusmanov, fermer jáne «Dala Camp» jobasynyń negizin qalaýshy Jánibek Kenjebaev, Prezıdent janyndaǵy Jastar saıasaty jónindegi keńestiń múshesi, Pavlodar qalalyq máslıhatynyń depýtaty Gúlzıra Atabaeva, «Bolashaq» baǵdarlamasynyń stıpendıaty, qazaq tilindegi «Aqyl Battle» zııatkerlik oıynynyń ázirleýshisi Aıbolat Qulataı jáne basqalary óz tájirıbelerin bólisti.
Forým qatysýshylarynyń biri Alpamys Mereı О́skemendegi «QazSınk» JShS-nan kelipti. Aıtýynsha, Altaı qalasynyń Malevskıı kenishinde ken tıegish tehnıkanyń mashınısi bolyp eńbek etedi. Kásiporynda 7 jyldan beri jumys isteıdi.
– Buryn memlekettik qyzmette, áskerge shaqyrý komıssarıatynda qyzmet ettim. Arada biraz ýaqyt ótkende óndiriske barýǵa bel býdym. Qazirgi ýaqytta bul sheshimimniń durys bolǵanyna kózim jetip otyr. Eńbekaqymyz joǵary, jumys berýshi arnaıy kıimmen, jumys barysynda tamaqpen qamtamasyz etedi. Jylyna eki ret eńbek demalysyna jiberip turady. Eń bastysy, óndiris ornynyń arqasynda eki joǵary bilimdi ıgerdim. Biri metallýrg mamandyǵy bolsa, ekinshisi – dene shynyqtyrý pedagogi mamandyǵy. Ekeýiniń de oqý aqysyn kásiporyn tolyq ótep berdi. Bıyl ulym birinshi synypqa barǵaly jatyr, ol úshin de seriktestik qomaqty materıaldyq kómek bergeli otyr, – deıdi jas maman.
Al «ERG» kompanııasynyń Astana qalasyndaǵy bas keńsesiniń sarapshysy, kompanııadaǵy jastar lıgasy elordadaǵy keńsesiniń basshysy Nurjan Ábdikerov jas mamandardy óndiris ornyna tartý jáne jastar resýrstaryn damytýǵa qatysty óz oılaryn bólisti. Onyń sózinshe, kóptegen jastar úshin óndiris oryndaryndaǵy tehnıkalyq mamandyqtar suranysqa ıe emes.
– Kóp jas óndiriste áli de eski tehnologııa qoldanylyp, adamdar shań-tozańy burqyraǵan, aýyr jaǵdaıda eńbek etedi dep oılaıdy. Shyn máninde, qazir bizdiń kásiporyndardyń barlyǵy derlik jańa tehnologııamen jaraqtalǵan, ozyq ádis-amaldar engizilip, qyzmetkerlerimizdiń densaýlyǵy men ómirine nuqsan keltiretin qaýip-qaterler barynsha azaıǵan. Sondyqtan jastardy óndiris ornymen jıi tanystyrýǵa, óndiriske erte bastan úıretýge den qoıyp otyrmyz. Keıbir belsendi jas jumysshylardy bir kúnge ýchaske basshysy, sheber etip taǵaıyndap, óziniń múmkindigin kórsetýge erik beremiz. Mundaǵy maqsat – kadrlyq rezervti tolyqtyryp, HR qyzmetti kúsheıtý, ǵylymı-tehnıkalyq, óndiristik, áleýmettik jobalarymyzǵa jastardy kóbirek shoǵyrlandyrý, – dedi N.Ábdikerov.
Forýmnyń ekinshi kúni «Pavlodar – jumysshy mamandyqtar aımaǵy» kórmesi, al keshke «Ertis Promenade» sahnasynda «Jastar FEST» aýqymdy jastar festıvali uıymdastyryldy. Talantty jastar men tanymal oryndaýshylardyń qatysýymen «Open AIR» formatyndaǵy konserttik baǵdarlama myńdaǵan kórermenderdi shyǵarmashylyq jáne ashyq dıalog atmosferasyna biriktirdi.
Respýblıkalyq jastar forýmy tek mereke ǵana emes, sonymen qatar memlekettik qoldaýdy, kásibı jandardyń tájirıbesi men jańa býyn urpaqtyń energııasyn biriktirgen aýqymdy pikirtalas alańyna aınaldy. Mamandar mundaı is-sharalar eldiń kadrlyq áleýetin qalyptastyrýǵa yqpal etetinin, jumysshy mamandyqtardyń bedelin arttyryp, jastardyń elimizdi jańǵyrtýǵa belsendi qatysýyna jaǵdaı jasaıtynyn aıtady.
Pavlodar oblysy
