Sýretti túsirgender – A.Dúısenbaev, E.ÚKIBAEV
Keńeste Ishki ister mınıstri Erjan Sádenovtiń, Ulttyq qaýipsizdik komıtetiniń tóraǵasy Ermek Saǵymbaevtyń, Densaýlyq saqtaý mınıstri Aqmaral Álnazarovanyń jáne Qarjylyq monıtorıng agenttiginiń tóraǵasy Janat Elımanovtyń baıandamalary tyńdaldy.
Memleket basshysynyń aıtýynsha, bul áleýmettik keseldiń beleń alýyna qatysty ahýal elimizde de, halyqaralyq aýqymda da alańdatarlyq jaǵdaıǵa jetti.
– Narkotızm – zamannyń derti, qoǵam úshin asa qaýipti. Ol jastardyń bolashaǵyna balta shabady. Ult saýlyǵyna qater tóndiredi. Nashaqorlyq pen esirtki bıznesindegi álemdik úrdis alańdatarlyq sıpatqa ıe boldy. Kóptegen eldiń úkimetteri atalǵan problemany fızıkalyq jáne psıhıkalyq táýeldilik qana emes, aýqymdy qoǵamdyq, ekonomıkalyq jáne quqyqtyq qubylys retinde qarastyra bastady. Narkotızm termıni mundaı tásildiń mán-maǵynasyn ashady, – dedi Qasym-Jomart Toqaev.
Sarapshylar men ǵalymdar narkotızm uǵymynyń nashaqorlyqtan áldeqaıda keń ekenin, áleýmettik, ekonomıkalyq jáne quqyqtyq problemalarmen, sonyń ishinde ulttyq qaýipsizdik máselesimen ushtasyp jatqanyn aıtady.
Prezıdent esirtkige táýeldiler emdeý-saýyqtyrý sharalarymen jetkilikti deńgeıde qamtylmaı otyrǵanyna nazar aýdaryp, máseleni sheshý qajet ekenin málimdedi.
– Esirtkige táýeldi jandardyń kópshiligi men olardyń jaqyndary jarııalylyqtan jáne jurtshylyqtyń talqylaýynan qaýiptenip, problemasyn jasyrady, – dedi Memleket basshysy.
Bul rette memlekettik saıasattyń nashaqorlarǵa keńshilik tanytyp, al esirtki saýdasyna kelgende qatań jáne múlde tózbeýshilik ustanymda bolýǵa tıis ekeni aıtyldy.
Qasym-Jomart Toqaev atalǵan indetke qatysty statıstıkalyq málimetterdi jınaý men óńdeý baǵytyndaǵy aqparattyq-saraptamalyq jumysty jetildirý, sondaı-aq hımııalyq zattardyń taralýyn qadaǵalaý máselelerin taǵy bir mańyzdy mindet dep sanaıdy.
Prezıdent nashaqorlyqtyń aldyn alý sharalaryn kúsheıtýdi, ásirese, bilim berý men aqparat salasynda keńinen jumys júrgizýdi tapsyrdy.
Memleket basshysynyń pikirinshe, jastar arasynda esirtkiniń nasıhattalýyna jol berýge bolmaıdy. Bul rette ol ınternette jáne medıa ındýstrııada tyıym salynǵan zattar men ishimdik ishýdi dáripteıtin jaǵymsyz úrdis beleń alǵanyna toqtaldy.
Jıynda esirtkimen baılanysty quqyq buzýshylyqty anyqtaý, jolyn kesý men jazalaýdyń tıimdiligin arttyrýǵa qatysty keshendi máselelerge erekshe mán berildi.
– Kez kelgen esirtki túriniń óndirisi men satylymyna qatań tyıym salynyp, memlekettiń jiti baqylaýynda bolýy kerek, – dedi Prezıdent.
Qasym-Jomart Toqaev transulttyq uıymdasqan qylmysqa qarsy is-qımyldy, sondaı-aq esirtki satatyn oryndar men zerthanalardyń ıelerin áshkereleý jumystaryn kúsheıtý qajettigin aıtty.
Sonymen qatar Memleket basshysy kúmándi qarjy operasııalaryn baqylaýǵa alýdyń mańyzyna toqtaldy. Bul túıtkil quqyq qorǵaý organdarynyń nazarynan tys qalmaýǵa tıis.
Prezıdent narkotızmge qarsy kúreske qoǵam bolyp jumylýdyń mańyzdy ekenin atap ótti. Sondaı-aq Úkimetke, óńir ákimderine jáne jaýapty memlekettik organdarǵa nashaqorlyqtan saqtandyrý jáne esirtki bıznesine qarsy kúres sharalaryn kúsheıtý jóninde birqatar naqty tapsyrma berdi.
Jıyn qorytyndysy boıynsha Memleket basshysy Nashaqorlyqqa jáne esirtki qylmysyna qarsy is-qımyl máseleleri jónindegi vedomstvoaralyq shtabty Ishki ister mınıstrliginiń qaraýynan alyp, Qazaqstan Respýblıkasy Úkimetiniń deńgeıine kóterýdi tapsyrdy. Bul nashaqorlyqpen jáne esirtki saýdasymen kúresti jandandyrýǵa, sondaı-aq tıisti memlekettik organdar arasyndaǵy jumysty anaǵurlym tıimdi úılestirýge múmkindik beredi.
