Sondaı-aq bul jıynǵa Belarýs Respýblıkasynyń Premer-mınıstri Aleksandr Týrchın, Qyrǵyz Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Adylbek Qasymalıev, Reseı Federasııasy Úkimetiniń tóraǵasy Mıhaıl Mıshýstın jáne Armenııa Respýblıkasynyń vıse-premeri Mger Grıgorıan qatysty.
Onda bıylǵy 31 qańtarda Almaty qalasynda ótken Eýrazııalyq úkimetaralyq keńeste berilgen tapsyrmalardyń oryndalý barysy qaraldy. Kedendik jáne salyqtyq ákimshilendirýdi sıfrlandyrý salasyndaǵy ıntegrasııany damytýdyń strategııalyq baǵyttaryn júzege asyrýǵa, qazirgi zamanǵy tehnologııalardy qoldana otyryp aqparat almasýdy jetildire túsýge nazar aýdaryldy.
Sapar aıasynda Úkimet basshysy Oljas Bektenov «Qazaqstan» shıpajaıynyń jańa ǵımaratynyń qurylys alańynda bolyp, Ǵylym jáne joǵary bilim vıse-mınıstri Gúlzat Kóbenova, Týrızm jáne sport vıse-mınıstri Serik Jaraspaev pen Prezıdent Is basqarmasy medısınalyq ortalyǵynyń basshysy Alekseı Soıdyń Qyrǵyzstanda ornalasqan elimizge qarasty kýrorttyq-rekreasııalyq tórt nysannyń jaǵdaıy týraly baıandamalaryn jáne ınvestorlarmen seriktestikte olardy kezeń-kezeńimen jańǵyrtý josparlaryn tyńdady.
Premer-mınıstrge «Qazaqstan» shıpajaıynyń jańa ǵımaraty qurylysynyń josparly túrde júrgizilip jatqany: demontajdaý jáne qurylys ornyn daıyndaý jumystary aıaqtalǵany, negizgi korpýstardyń, kottedjder men sharýashylyq bloktardyń irgetasy men monolıtti qańqasyn salý jalǵasyp jatqany týraly baıandaldy.
Sondaı-aq 500 oryndyq «Samal» demalys úıine jańǵyrtý jumystaryn júrgizý josparlanǵan. Qazirdiń ózinde ınvestor anyqtalyp, ınvestısııalyq kelisimniń jobasy daıyndalyp, jyl boıy jumys isteıtin 3-4 juldyzdy zamanaýı qonaq úı salý úshin jobalaý-smetalyq qujattama ázirlenip jatyr.
Bosterı (Ystyqkól oblysy) aýylyndaǵy «Ýnıversıtet» sporttyq-saýyqtyrý lagerindegi kýrorttyq-rekreasııalyq aımaqty damytý tujyrymdamasyn ázirleý qolǵa alynǵan. Nysandy rekonstrýksııalaý boıynsha ınvestorlarmen kelissózder júrgizilip jatyr. Atalǵan nysan bazasynda elimizdiń sportshylaryn jattyqtyrýǵa arnalǵan sporttyq ınfraqurylym – sport zaldary, basseınder jáne taǵy basqa nysandar qurylady.
Sondaı-aq ınvestormen birlesip «Olımp» sporttyq-saýyqtyrý ortalyǵyn jóndeý, jumys istep turǵan nysandardy rekonstrýksııalaý jáne qosymsha sport ǵımarattaryn salý máselesi pysyqtalyp jatyr.
Premer-mınıstr jaýapty mınıstrlikter men múddeli memlekettik uıymdarǵa jobalardyń sapaly júzege asyrylýyn qamtamasyz etýdi jáne rekonstrýksııalaýdy bastaý úshin qajetti rásimderdi jedeldetýdi tapsyrdy.
