Aldaǵy qyrkúıek aıynda oqýshylar 6 600 oryndyq jańa 8 mekteptiń tabaldyryǵyn attaıdy. Olar: Aqtaý qalasy О́mirzaq aýylynda, 20-shaǵyn aýdanda, Jańaózen qalasy Mereı shaǵyn aýdanynda, Beıneý aýylynda jáne osy aýdannyń Sam aýylynda, Mańǵystaý aýdany Kosbulaq aýylynda, Munaıly aýdany Mańǵystaý-3 jáne Batyr aýylynda. Sondaı-aq qazan aıynda Aqtaý qalasynyń 16-shaǵyn aýdanynda 1 500 oryndyq mektep paıdalanýǵa berý josparlanǵan.
– Jańa bilim oshaqtarynyń biri – Munaıly aýdany Batyr aýyly Samal shaǵyn aýdanynda ornalasqan №20 jalpy bilim beretin mektep. Qazirgi tańda mekteptiń qurylysy támamdalyp, kabınetter jabdyqtalyp jatyr. 1 200 oryndyq mektep 56 zamanaýı pán kabınetterimen jabdyqtalǵan. Munda oqýshylardyń shyǵarmashylyǵyn damytý úshin STEM zerthanalary, vızýaldy dızaın jáne horeografııa kabınetteri jumys isteıdi. Sonymen qatar erekshe bilimdi qajet etetin balalarǵa sensorlyq kabınet, logoped, defektolog jáne psıholog kabınetteri keıingi úlgidegi jabdyqtarmen qamtamasyz etilgen. Jetkinshekterdiń bos ýaqytyn tıimdi paıdalaný maqsatynda mektepte 2 sport zal, horeografııa, vızýaldy óner, dızaın jáne tehnologııa, sheberhana, tamaqtaný mádenıeti kabınetteri bar, – deıdi Munaıly aýdandyq bilim bólimi basshysynyń mindetin atqarýshy S.Jubanov.
Al Beıneý aýdanynyń Sam aýylynda 300 oryndyq, Beıneý aýylynda 900 oryndyq zamanaýı mektep qurylysyn «SK Stroı» JShS júrgizip jatyr. Jańa bilim oshaqtary tıptik jobaǵa saı salynyp, zamanaýı talaptarǵa tolyq sáıkes jabdyqtalmaq. Mektepterde beınebaqylaý kameralary, dabyl batyrmalary, ashana, májilis zaly, sport zaldary, lıngafondy-kompıýterlik kabınetter ornalasqan. Sonymen birge STEM-zerthanalar, robottehnıka jáne horeografııa kabınetteri, ınklıýzıv jáne logoped kabınetteri, demalys aımaqtary men kovorkıng alańdary, oqýshylardyń jeke zattaryna arnalǵan shkaftar men qosymsha bilim berý bólmeleri qarastyrylǵan. Eki mekteptiń de qurylysy qyrkúıekke deıin aıaqtalyp, jańa oqý jylynda oqýshylardy qabyldaýdy josparlap otyr.
Mańǵystaý oblysy
