Mınıstr óz baıandamasynda elimizdegi aqparat keńistigin saqtaý máselesin qozǵady. Ásirese ol shekaralas aımaqtaǵy turǵyndardyń otandyq radıo-televızııalyq taratylymdarǵa qol jetkizý máselesine nazar aýdardy. О́ıtkeni shekaraǵa jaqyn ornalasqan kóptegen eldi mekende kórshiles eldiń radıosy men televızııasy emin-erkin taratylyp jatady. Osy jaǵdaıdy retteý úshin mınıstrlik arnaıy jumystardy qolǵa alyp, «Shalqar» men «Qazaq radıosynyń» únin sonaý shekara aımaǵyndaǵy aýyldarǵa deıin jetkizbek.
A.Balaeva búgingi tańda prokatqa shyǵarylyp jatqan kınofılmder týraly da pikir bildirdi. Onyń sózinshe, osy kúnde kınoteatrlarda kórsetilip júrgen otandyq fılmder keremet dep aıtýǵa kelmeıdi. Keıde fılm sıýjetinde beıádep sózder, orynsyz qylyqtar kezdesip qalyp jatady. Kórkem fılm – birinshi kezekte halyqty tárbıeleýshi ıdeologııalyq qural. Sol sebepti onyń qoǵamdaǵy róli árdaıym kúshti bolý kerek. Osy oraıda A.Balaeva mınıstrlik janynan arnaıy keńestik top qurylyp, árbir túsirilgen otandyq kınofılmder súzgiden ótkiziletinin jetkizdi. Sonymen qatar mınıstr teatrlarda da bolashaq spektakldiń mazmunyn saralap, kem-ketik jeri bolsa, durys arnaǵa buryp otyratyn kórkemdik keńestiń bolǵanyn quptady.
Sonymen qatar mınıstr elimizde aqparattyń qoljetimdiligin de sóz etti. Iаǵnı keıbir memlekettik qupııa bolyp sanalatyn derekterden bólek, kez kelgen salada aqparat kózi ashyq. Ásirese BAQ ókilderiniń memlekettik organdardan málimet alý jaǵy ońaılastyrylǵan. Bul elimizdegi demokratııalyq qaǵıdattardyń saltanat qurǵanyn bildiredi. Al mınıstrlik bıyl kúshine engen jańa erejege sáıkes osy úderisterdi zań sheńberi aıasynda baqylaýda ustaıdy.
Budan ózge, A.Balaeva Shymkentte respýblıkalyq mańyzy bar 7 tarıhı eskertkish baryn atap ótip, olardyń ınfraqurylymyn jaqsartý, qosymsha qarjy máselesin sheshý baǵytynda jumys júrgiziletinin jetkizdi. Sonyń ishinde «Shymqala» tarıhı-mádenı keshenine erekshe toqtaldy. Atalǵan aýmaqta talaı arheologııalyq qupııa-syrlar jatqanyn aıta kele, qazba jumystary men zertteýler áli de jalǵasa túsetinin málimdedi.
Ashyq dıalog barysynda Shymkent turǵyndary kókeıkesti suraqtaryn qoıyp, tolyq jaýap aldy. Turǵyndar qoıǵan saýaldardyń ishinde talantty jastardyń jeke izdenisterine aqparattyq qoldaý kórsetý, olardyń bastamalaryn nasıhattaý, ujymdyq konserttik mekemelerdiń qaýipsizdigin qamtamasyz etý, Shymkentte mádenıet salasyndaǵy jeke joǵary oqý ornyn qurý, jastardy, otbasylardy ońtústikten soltústik óńirlerge qonys aýdarýǵa úgitteý, ol úshin sezimge qurylǵan qyzyqty kórkem fılmder túsirý sekildi ótinish-tilekter, usynystar aıtyldy. Mınıstr óz sózinde aıtylǵan máseleler nazardan tys qalmaıtynyn, tıisti sheshimder qabyldanatynyn málimdedi.
Kezdesýden keıin mınıstr jeke qabyldaý ótkizip, turǵyndardyń saýaldaryn tyńdady.
Aıda Balaevanyń sapary BAQ ókilderimen ótken brıfıngpen qorytyndylandy. Onda medıa, jastar saıasaty jáne mádenıet salasyndaǵy ózekti máseleler aıtyldy.
ShYMKENT
