Keshe Astanada Bilim jáne ǵylym mınıstri A.Sárinjipov tóraǵalyq etetin bilim granttaryn taǵaıyndaý jónindegi respýblıkalyq konkýrstyq komıssııa jumysyn bastady. Onyń quramynda memlekettik organdar qyzmetkerleri, Ulttyq kásipkerler palatasynyń, Qazaqstan Azamattyq alıansynyń, Ǵylym jáne bilim qyzmetkerleri kásipodaǵynyń ókilderi, joǵary oqý oryndarynyń rektorlary bar.
Bilim jáne ǵylym mınıstrliginiń baspasóz qyzmeti habarlaǵandaı, vedomstvo sońǵy ýaqytta stýdenttik orta qurý men tańdaý sapasyn kóterý baǵytynda birqatar júıeli jumystardy júrgizýde. Komıssııa bul joly da osy qaǵıdatty ustanady. Ol joǵary oqý oryndaryna stýdentter qabyldaý jónindegi daıyndyq jumystarynyń qorytyndysyn shyǵarady. Otyrysta 2015 jylǵa bólingen 32 168 grant ıegerleri anyqtalady. Onyń 500-i joǵary oqý oryndarynyń daıyndyq bólimderine berilse, 29 668-i 1 kýrsqa stýdentter qabyldaýǵa arnalǵan. Sonyń ishinde kúndizgi oqý bólimi granttarynyń sany – 29 168, syrttaı úshin – 500. Bilim granttaryn qabyldaý quqyǵyn konkýrs jolymen anyqtalǵan 60 joǵary oqý orny jeńip aldy.
Komıssııa otyrysynda Bilim jáne ǵylym mınıstri Aslan Sárinjipov memlekettik tapsyrys qurylymy ústimizdegi jyly qaıta qaralǵanyn atap ótti. «Memlekettiń áleýmettik-ekonomıkalyq damýynda strategııalyq basymdyqqa, eń aldymen Elbasy jarııalaǵan ındýstrııalyq-ınnovasııalyq damý baǵytyna kóńil bólinedi. Sol sııaqty agroónerkásip keshenin damytý mamandyqtary erekshe nazarǵa alynady. Osyndaı memlekettik tapsyrystar eńbek naryǵynda joǵary bilikti kadrlardy daıyndaý qurylymyn tıimdi qalyptastyrýǵa áser etedi», – dep atap ótti mınıstr.
Kórsetilgen basymdyqtar esebimen 12 600 grant – túlekterdi tehnıkalyq jáne tehnologııalyq, 6000-ǵa jýyq grant – pedagogıkalyq, 2 690 grant aýyl sharýashylyǵy jáne mal sharýashylyǵy mamandyqtary boıynsha oqytýǵa bólingen.
Jalpy, 2015 jyly bilim granttaryn alýǵa 67 377 túlek úmitker bolyp otyr. Olardyń 53 162-si – qazaq, 14 215-i orys mektepterin bitirgen. Sol sııaqty «Máńgilik El jastary – ındýstrııaǵa!» jobasy sheńberindegi kvotany alý jolyndaǵy básekege 6457 mektep bitirýshi qatysady.
Konkýrsqa qatysýshylar arasynda «Altyn belgi» tósbelgisiniń 2 116 ıegeri bar. Al 2014 jyly mundaı túlekterdiń sany 1 732 bolǵan edi. Bulardan bólek, úmitkerler arasynda Nazarbaev zııatkerlik mektepteriniń 1 255 túlegi (2014 j. – 323), jalpy bilim beretin pánder boıynsha halyqaralyq jáne respýblıkalyq olımpıadalardyń 163 jeńimpazy (2014 j. – 179), jalpy bilim beretin pánder halyqaralyq jáne respýblıkalyq ǵylymı jarystardyń 930 jeńimpazy (2014 j. – 921), respýblıkalyq jáne halyqaralyq sport jarystarynyń 816 jeńimpazy (2014 j. – 891), Prezıdenttik olımpıadanyń 6 jeńimpazy (2014 j. – 13) bar. Olardyń bári bilim berý grantyn taǵaıyndaý kezinde basymdyqtarǵa ıe bolady.
Habarlamada konkýrsqa qatysatyndar arasynda, sondaı-aq, 483 jetim balanyń (2014 j. – 426), I jáne II toptardaǵy 341 múgedektiń (2014 j. – 356) bar ekeni aıtylǵan. Sol sııaqty soǵysqa qatysýshylarǵa teńestirilgen jeńildikter men kepildikter boıynsha 20 abıtýrıent (2014 j. – 5) konkýrsqa túsip otyr. Munymen qatar Qazaqstan Respýblıkasynyń azamaty bolyp tabylmaıtyn qazaq ultynyń 1 190 ókiline kvota belgilengen. 2014 jyly onyń sany 1 194 bolǵan edi.
Komıssııa jumysyn aıaqtaǵannan keıin onyń qorytyndylary respýblıkalyq resmı basylymdarda jarııalanady.
«Egemen-aqparat».
