Eýroodaq delegasııasymen kezdesti

Adam quqyqtary jónindegi ýákil Asqar Shákirov Eýropa odaǵynyń Zańdylyqty saqtaý jáne adam quqyqtary jónindegi bas dırektory F. Býaııa bastaǵan osy Odaq delegasııasymen kezdesti. Bolǵan is-sharanyń maqsaty Qazaqstanmen, Eýropa keńesi men Eýropalyq odaqpen «Qazaq­standaǵy ádil sot júıesiniń sapasy men tıimdiligin jaqsartýdy qoldaý» atty ortaq jobanyń sheń­berinde júzege asyrylatyn 2015-2017 jyldar kezeńindegi ekijaqty yntymaqtastyqty talqylaý boldy. Kezdesýdiń barysynda A. Shákirov sheteldik áriptesterine ulttyq quqyq qorǵaý mekemesi qyzmetiniń túrleri men ádisteri, negizgi baǵyttary týraly aqparat berdi. Adam quqyqtary jónindegi ýákil mekemesi jobanyń qatysýshysy bolǵandyqtan, ýákil jobany júzege asyrýdy tolyqtaı qoldaıtynyn bildirdi. – Bizdiń tájirıbemiz quqyq qorǵaýshylar arasyndaǵy kásibı áleýet pen bilimdi arttyrý adam quqyqtary jónindegi jaǵdaılardy nyǵaıtýda sheshýshi faktor bolyp tabylatyndyǵyn kórsetedi, – dedi A. Shákirov. Onyń atyna kelip túsetin shaǵymdardyń tórtten bir bóligin sot áreketterine, sondaı-aq, quqyq qorǵaý organdarynyń áreketterine kelispeý shaǵymdary quraıtyn kórinedi. Qazaqstandyq Ýákildiń aıtýynsha, bastalǵan árekettestik ulttyq quqyq qorǵaý mekemesiniń áleýetin odan ári nyǵaıtýǵa kómektesedi, ásirese, ol sot tóreligi, halyqqa, onyń ishinde halyqtyń áleýmettik osal toptaryna kórsetiletin memlekettik qyzmetterdiń sapasyna, sot ádildigine qol jetkizý salasynda kórinis tabady. Sheteldik áriptesterimen tájirıbe almasý jáne ınstıtýttyq múmkindikterdi nyǵaıtý jónindegi is-sharalar mańyzdy ról atqaratyn bolady. Al F. Býaııa qazaqstandyq Ýákildi jobanyń negizgi seriktesi dep belgiledi. Saıası-quqyqtyq biregeı ról, memlekettik organdar men azamattyq qoǵamnyń arasyndaǵy qatynastarda medıa­tor fýnksııasy taraptardyń aldyna qoıylǵan maqsattarǵa tıimdi qol jetkizýge múmkindik beredi. «Egemen-aqparat».