Sýret: 7kun.kz
Jas maman – jasampaz isterdiń jarshysy. Arqa tósinde keńinen kósilip jatqan alyp zaýyttyń ónimdi jumysy Eldos Jumabekov sııaqty jigerli jastardyń moınynda. Bilikti maman óziniń jastyǵyna qaramastan búginde aýysym basshysy laýazymyn abyroımen atqaryp, áriptesteri arasynda qurmetke bólengen. Onyń aıtýynsha, ol zaýytqa 2019 jyly S.Toraıǵyrov ýnıversıtetiniń úshinshi kýrsynda oqyp júrgende kirgen. Talapty jastyń boıyndaǵy ushqyndy ańǵarǵan kásiporyn basshylyǵy ony birden jumysqa qabyldapty. Eldos alǵashqyda elektrolızer peshterinde alıýmınıı óndirisiniń operatory bolyp eńbek etedi. Qolyna kúrek-saıman ustap, 1000 gradýsqa deıin qyzatyn peshterdiń aınalasyndaǵy qara jumysqa belsene aralasty.
– 200 gektarǵa jýyq alqapty alyp jatqan alyp zaýyt alystan kóz tartady. О́ndiristik keshen jylyna 250 myń tonna joǵary sapaly alıýmınıı shyǵaratyn jobalyq qýatynda jumys isteı bastaǵany da málim. Sapaly alıýmınıı búginde TMD men Eýropa elderine eksporttalyp otyr. Munda jumys isteýdi alǵashqy kúnnen-aq mártebe tuttym. Arada biraz ýaqyt ótken soń kásibı turǵydan ósýim kerek degen oıǵa keldim. Basshylyqqa kirip, «meni brıgadırlyqqa úıretińiz» dep edim, talabymdy quptady. Úırene kele brıgadır, odan soń aýysym basshysy laýazymyn senip tapsyrdy. Qazirgi ýaqytta qaraýymda 17 jumysshy bar. Bir qyzyǵy, alǵash alıýmınıı quıýǵa úıretken aǵa býyn qazir meniń aýysymymda isteıdi. Olardyń barlyǵy jaýapty jumysyma túsinistikpen qarap, qoldan kelgenshe járdemdesedi. Mundaı qoldaý árdaıym jigerlendiredi, deıdi jas maman.
Eldos eń áýeli qolastyndaǵy qyzmetkerlerdiń qaýipsizdigine jaýapty. Olardyń tehnıkalyq qaýipsizdigin qadaǵalap, jumys sapasynyń tómendemeýin nazarda ustaıdy. Zaýyt mamandarynyń sózinshe, alıýmınıı óndirisi energııany kóp qajet etetin úderis, bir ózi 420 megavatt elektr energııasyn tutynady. Salystyrý úshin aıtyp óteıik, elektrolız zaýytynyń qýat tutynýy alıýmınıı totyǵy óndirisinen (glınozem) 5 ese joǵary. Bir tonna alıýmınıı óndirýge 1,9 tonna glınozem, 0,54 tonna anod, 13 MVt elektr energııasy qajet eken. Elektrolız zaýytynan shyqqan bastapqy alıýmınııden álem boıynsha kábil-ótkizgish ónimder, metall konstrýksııalary men qurylys materıaldary, avtomobıl, túrli qural-jabdyqtar men aspaptar jasalady.
Jas mamannyń talaby taýdaı. Ol 18 jyldyq tarıhy bar zaýytta alǵashqy bolyp respýblıkalyq «Altyn gefest» syılyǵyn utyp aldy. Sondaı-aq byltyr oblystyq deńgeıde ótken «Táýelsizdik urpaqtary» baıqaýynda top jardy.
«Mundaı jetistikter maǵan kúsh-jiger berip qana qoımaıdy, aldaǵy isterge yntalandyrady. Jumysshy mamandyǵynyń qadirli ekenin Prezıdentimiz Qasym-Jomart Toqaev talaı mańyzdy jıyndarda atap aıtty. Bizge degen kóptiń ystyq yqylasy, Úkimet pen jergilikti bıliktiń qoldaýy aıqyn sezilip otyr. Bıyl jumysshy mamandar úshin arnaıy ıpotekalyq baǵdarlama qabyldandy. Onyń nátıjesinde kóptegen áriptesim baspanaly boldy. Jumysshylardy qoldaýǵa baǵyttalǵan ózge de jobalar bar. Osynyń barlyǵy jumysymyzǵa shabyt syılaıdy», dep atap ótti ol.
Sóz sońynda ol zaýyt ujymy kóp etnosty bolǵanymen, tatý-tátti jaǵdaıda eńbek etetinin jetkizdi. «Basshylar, sonyń ishinde seh basshysy, zaýyt dırektory árqaısymyzdyń oı-pikirimizdi tyńdaýǵa, ıdeıalarymyzdy qoldaýǵa árdaıym daıyn turady. Barlyǵymyz bir otbasynyń músheleri sııaqtymyz. Bireýimiz úlgermeı jatsaq, ózgeleri kómektesýge daıyn turady. Ujymdyq rýh aıqyn seziledi. Al mundaı jerde eńbek etýdiń ózi rahat. Izimdi basyp kele jatqan jastarǵa aıtarym, eń bastysy maqsatty durys qura bilý kerek. Ekinshiden, kez kelgen iste asyǵystyqqa jol bermeý mańyzdy. Maqsat durys bolsa, kez kelgen qıyndyqtan jol taýyp shyǵýǵa bolady», dep túıindedi sózin Eldos Jumabekov.
Pavlodar oblysy
