Memlekettik hatshy Gúlshara Ábdiqalyqova Shyǵys óńirine eki kúndik jumys saparymen keldi. Memlekettik hatshy saparynyń alǵashqy kúnin Qazaqstan Konstıtýsııasynyń 20 jyldyǵyna arnalǵan «100 naqty qadam aıasyndaǵy Qazaqstan halqynyń birligi men birtektiligi» atty ǵylymı-tájirıbelik konferensııaǵa qatysýmen jáne oblys ortalyǵyndaǵy birqatar áleýmettik nysandarmen tanysýdan bastady. Jıyndy óńir basshysy Danıal Ahmetov ashyp, 2015 jyldyń memleket tarıhynda oryn alatyn aıryqsha jyl ekenin, elimizde birneshe ataýly mereıtoılar atalyp ótetinin, biregeı beıbitshilik mádenıeti men rýhanı kelisimge negizdelgen mańyzdy saıası reformalar engizilip jatqanyn aıtty.
– Konstıtýsııa – kópultty memleketimizdegi azamattardyń quqyq teńdigin qamtamasyz etýdiń myzǵymas kepili. Elbasy tańdap bergen birlik joly – bizdiń bolashaqqa quıǵan negizgi ınvestısııamyz. 100-den astam etnos ókilderi turatyn oblysymyz Elbasy nusqaǵan jańa mindetterdi iske asyrý úshin birtekti qoǵam retinde jumylýǵa daıyn, – dedi oblys ákimi.
Memlekettik hatshy shyǵysqazaqstandyqtardyń Elbasynyń qoǵamdyq kelisim men ulttyq birtutastyq salasyndaǵy saıasatyn júzege asyrýdyń jarqyn úlgisin kórsetip otyrǵandyǵyn erekshe atap ótti. – Memleket basshysy bastama etip kótergen 5 ınstıtýttyq reforma Qazaqstannyń jahandyq, óńirlik jáne ishki syn-qaterlerge der kezindegi keshendi jaýaby. Jan-jaqty reformalar ultty ınklıýzıvti, keń aýqymda damytýǵa baǵyttalǵan. Prezıdentimiz aıtqandaı, uly reformalardy bastaı otyryp, biz «Máńgilik Elge» jol salamyz. Bul bizdiń memlekettik qurylystyń úshinshi satysy bolmaq, – dedi Gúlshara Ábdiqalyqova. Memlekettik hatshynyń aıtýynsha, ınstıtýttyq reformalardyń negizgi maqsaty – 2050 jylǵa qaraı Qazaqstandy álemniń damyǵan 30 eliniń qataryna qosýǵa baǵyttalǵan. Qazaqstan halqy Assambleıasy «Birlik pen birtektilik» baǵytyndaǵy reformany júzege asyrýda negizgi rólge ıe. Bizdiń biregeı birtektiligimiz «Elbasy, Halyq, «Máńgilik El» uǵymyna negizdeledi. Qoǵamdyq kelisim modeli men birtektilikti nyǵaıtýdaǵy jetekshi róldi elimizdiń Konstıtýsııasy júzege asyrady. Qazaqstannyń is-qımylynyń negizin quraıtyn ustanymdardyń biri – qoǵamdyq kelisim. О́ıtkeni, ulttyq birtutastyq bolmaı etnosaralyq qatynastardyń úılesim tabýy múmkin emes. – Shyǵys Qazaqstan Elbasynyń qoǵamdyq kelisim men ulttar tatýlyǵy jolyndaǵy dana saıasatyn tıimdi júzege asyrýdyń jarqyn úlgisin kórsetip keledi. О́ńir turǵyndarynyń bastamasymen bastalǵan «Beıbitshilik pen kelisimniń jol kartasy» atty jalpyulttyq joba búginde respýblıkany qamtyp otyr. Assambleıa jyly aıasynda óńirde árbir tórtinshi turǵyndy qamtyǵan 2600 shara ótken. Al «20 ıgi is» aksııasy sheńberinde oblys jurtshylyǵy 886 mln. teńgeniń áleýmettik kómegin kórsetip, respýblıka boıynsha rekord jasady. Bul – shyǵysqazaqstandyqtardyń áleýmettik jaýapkershilikke asa sergek qaraıtynyn ańǵartady. Oblysta óz eliniń naǵyz patrıottary turady. Sondyqtan 100 naqty qadamdy júzege asyrýda Shyǵys óńiriniń aldyńǵy qatardan kórinetinine senim bar, – dedi Gúlshara Naýshaqyzy. Shara barysynda konferensııaǵa qatysýshylar konstıtýsııalyq qurylys, etnosaralyq qatynastardaǵy memlekettik saıasatty júzege asyrý, qazaqstandyq birtektilik pen otanshyldyqty qalyptastyrýdaǵy keshendi jumystar, Qazaqstan halqy Assambleıasynyń «Úlken el – úlken otbasy», «Meniń elim» aýqymdy áleýmettik jobalaryn júzege asyrý, oqýlyq baǵdarlamasyna «Máńgilik El» qundylyqtaryn engizý, Jalpyǵa Ortaq Eńbek qoǵamyn qurý ıdeıasyn ilgeri jyljytý máselelerin talqylady. – Osyǵan deıin elimizde 5 satyly sot júıesi bolsa, endi 3 satyly sot júıesine kóshý máselesi talqylanýda. Bul júıe álemdik tájirıbede moıyndalǵan. Zańy myqty eldiń ekonomıkasy da myqty bolady. Sondyqtan, Elbasynyń Ult josparyndaǵy 100 naqty qadamynda zańnyń ústemdik qurýy úshin sot júıesin barynsha jetildirip, sot bedelin qalyptastyratyn sýdıalarǵa qoıylatyn talaptardy kúsheıtýi zańdy qubylys, – dedi oblystyq sot tóraǵasy Dosjan Ámirov. Sondaı-aq, Qazaqstan halqy Assambleıasy Tóraǵasynyń orynbasary, Hatshylyq meńgerýshisi Eraly Toǵjanov, Konstıtýsııalyq Keńes múshesi Vıktor Malınovskıı, Qazaqstan halqy Assambleıasy Tóraǵasynyń orynbasary Oleg Dymov 100 naqty qadam aıasyndaǵy naqty oı-usynystarymen bólisti. Konferensııa sońynda QHA, memlekettik mekemeler, kásipkerlik jáne úkimettik emes uıymdardyń ókilderine birqatar mindettemeler júkteldi. Máselen, «Máńgilik El» patrıottyq aksııasy ıdeıasyn jandandyrýǵa halyqaralyq jáne óńirlik deńgeıdegi únqatysý alańdaryn paıdalaný, qoǵamdyq kelisim men taǵattylyqty nyǵaıtýǵa jastardy tartý, mádenı-týrıstik klasterdi damytýǵa qatysý syndy is-qımyl jobalary bar. Memlekettik hatshyǵa óńirdegi qonys aýdarýdyń elektrondy kartasy tanystyryldy. Gúlshara Ábdiqalyqova keleshegi bulyńǵyr aýyldan kóship kelip, «Jumyspen qamtýdyń jol kartasy-2020» baǵdarlamasyna qatysqan otbasynyń shańyraǵynda boldy. №19 shaǵyn aýdanda turatyn Mádına esimdi jalǵyzilikti ana sheshesimen jáne eki balasymen birge Zaısan aýdanynyń Sarshı aýylynan qonys aýdarǵan. Oblystyq jumyspen qamtý jáne áleýmettik baǵdarlamalardy úılestirý basqarmasynyń basshysy Aıjan Sadyqova jumys kúshin tartý maqsatynda Ońtústik Qazaqstan, Almaty, Qyzylorda oblystarynan 97 otbasy kelgenin jetkizdi. Búginde oblystyń eńbek resýrstary tapshy aýdandaryna kóship kelýge nıetti kez kelgen otbasy qonystanýdyń elektrondy kartasyna ǵalamtor arqyly ótinish joldaı alady. Sondaı-aq, oblys ortalyǵynda jańadan boı kótergen Qan ortalyǵynyń qyzmetimen tanysqan Memlekettik hatshy sony apparattardyń múmkindigine nazar aýdardy. Bul ortalyqta jalǵyz trambasıttiń bes myń dana dozasyn saqtaý múmkindigi bar. Arnaıy qurylǵy ony 10 jyl kóleminde saqtaı alady. Adamnan qan qabyldaý, ony saraptaý apparattarynyń barlyǵy avtomattandyrylǵan. Qandy bankke jóneltý jáne suryptaý qyzmeti adam faktorynyń qatysýynsyz ótedi. Al Oralhan Bókeı atyndaǵy №44 mektep-lıseıinde bilim berý jáne áleýmettik qorǵaý salasyndaǵy aýqymdy jobalar tanystyryldy. Atalǵan oqý orny óńirde UBT nátıjeleri boıynsha úzdik kórsetkishke qol jetkizgen bolatyn. Sonymen birge, Memlekettik hatshy Shyǵys óńiriniń áıelder qaýymdastyǵymen kezdesý ótkizdi. Atalǵan sharada qoǵamdaǵy áıelder quqyǵyn qorǵaý, olardyń memlekettik qyzmet pen kásipkerlik jáne basqa da salalardaǵy belsendiligin jandandyrý, otbasylyq-demografııalyq saıasatty júzege asyrý máseleleri sóz boldy. Memlekettik hatshynyń jumys sapary búgin Semeı qalasynda jalǵasady dep kútilýde.
Dýman ANASh, «Egemen Qazaqstan».
Shyǵys Qazaqstan oblysy.
