Jıynǵa pedagogtar, Sıngapýr, AQSh jáne ózge elderden kelgen halyqaralyq sarapshylar, Oqý-aǵartý mınıstri Ǵanı Beısembaev, Ǵylym jáne joǵary bilim mınıstri Saıasat Nurbek, «Qazaqstannyń Eńbek Eri», «Otan» ordeniniń ıegeri, belgili ustaz, Qazaqstannyń eńbek sińirgen qaıratkeri Aıagúl Mırazova qatysty.
Almaty ákimi Darhan Satybaldy konferensııaǵa qatysýshylar men pedagogtardy jańa oqý jylymen quttyqtady.
«Memleket basshysynyń bastamasymen 2025 jyl Jumysshy mamandyqtary jyly bolyp jarııalandy. Osy baǵytta aýqymdy jumys qolǵa alyndy. Almatyda kolledjderdiń materıaldyq-tehnıkalyq bazasy 2,6 mlrd teńgege jańartylyp, WorldSkills standarty boıynsha 14 quzyret ortalyǵy ashyldy, jyl sońyna deıin taǵy 4 ortalyq iske qosylady. Sonymen birge «Keleshek mektepteri» ulttyq jobasy júzege asyrylyp otyr: 35 myń orynǵa arnalǵan 21 jańa mektep salynyp, 15 bilim berý mekemesine kúrdeli jóndeý júrgizilip jatyr. Búginde qala mektepterinde 350 myńnan astam oqýshy oqıdy, olardyń sany jyl saıyn orta eseppen 12–14 myńǵa artyp otyr», – dedi qala ákimi.
Saltanatty bólimde «Bilim berý isiniń qurmetti qyzmetkeri» tósbelgileri, mınıstrlik pen Almaty ákimdiginiń alǵys hattary tabys etildi. Sondaı-aq, Almaty ákimdigi taǵaıyndaǵan «Úzdik bilim berý uıymy – 2025» arnaıy syılyǵy berildi. Bul marapat №79 gımnazııaǵa buıyrdy.
Konferensııa aıasynda ótken plenarlyq otyrysta bolashaqtaǵy kásibı bilim berý jáne jańa ekonomıkaǵa qajetti maman daıarlaý, bilim berý úderisine STEM/STEAM tásilderin engizý, oqýshylardyń qaýipsizdigi men psıhoemosııalyq densaýlyǵy, ınklıýzıvti bilim men toleranttylyqty damytý máseleleri talqylandy.
Is-shara qazaqstandyq estrada juldyzdarynyń konsertimen túıindeldi.
