Eń basty jańalyq – baǵasy burynǵy Tesla úlgilerine qaraǵanda arzan. Kompanııa ony tabysy ortasha otbasylarǵa qoljetimdi etýdi josparlap otyr.
19 tamyz kúni Tesla Qytaıdyń Weibo áleýmettik jelisinde YL-diń baǵasyn jarııalady. Jańa kólik 339 myń ıýan turady. Bul shamamen 25 mıllıon teńge nemese 47 myń dollar. Avtokólik 2025 jyldyń qyrkúıeginen bastap satylymǵa shyǵarylady.
YL úlgisi burynǵy Y modeline qaraǵanda sál úlken – shamamen 15 santımetrge uzyn. Sebebi úshinshi qatarǵa qosymsha oryndyq qoıylǵan. Bir márte tolyq qýattaǵanda, kólik 751 shaqyrymǵa deıin jol júre alady.
Sarapshylardyń aıtýynsha, Tesla endi arzan baǵamen Qytaıdyń Li Auto kompanııasynyń L8 úlgisimen jáne Huawei-diń Aito M8 kóligimen básekeles bola alady.
Tesla bul qadamǵa jaıdan-jaı barǵan joq. Sońǵy ýaqytta Qytaıdaǵy suranys azaıyp ketken. Mysaly, kompanııanyń Shanhaıdaǵy zaýytynan shyqqan kólikter shilde aıynda az satyldy. Sol sebepti Ilon Masktiń komandasy baǵany tómendetip, jańa úlgiler shyǵarýǵa kiristi.
Qazir álemdik naryqta elektromobılder óte kóp. Aı saıyn jańa úlgiler shyǵyp jatyr. Tesla da artta qalmaı, tutynýshylarǵa yńǵaıly ári qoljetimdi kólik usynýdy kózdep otyr. Tamyz aıynda kompanııa Qytaıǵa qýaty uzaqqa jetetin jańa sedanyn tanystyrǵan edi.
