Sýretterdi túsirgen – Valerıı Býgaev
«Altynalmas» AQ kompanııasy «Maıqaıyń-altyn» AQ-nyń 100 paıyz jarǵylyq kapıtalyn satyp alý boıynsha kelisimdi sátti aıaqtaǵany málim. Búginde altyn kombınaty men kenish tolyqtaı soǵan qaraıdy.
Pavlodar oblysynyń ákimi Asaıyn Baıhanov pen «Altynalmas» AQ basqarma múshesi, qarjy jónindegi bas atqarýshy dırektory Rústem Qarakesov 4,6 mlrd teńgeniń áleýmettik jáne ınfraqurylymdyq bastamalardy iske asyrý týraly memorandýmǵa qol qoıdy.
– Bul jaı ǵana zańdy qujat emes, bul apattyq jaǵdaıdaǵy turǵyn úılerdi buzý men kentti jylýmen jabdyqtaý júıesin jańartýdan bastap jańa áleýmettik nysandar salýǵa, joldardy jóndeýge deıingi kenttiń ózekti máselelerin sheshýge baǵyttalǵan bılik pen bıznestiń kúsh-jigerin biriktiretin naqty is-qımyl jospary, – dep atap ótti Asaıyn Baıhanov.
Jasalǵan memorandýmǵa sáıkes kásiporyn shahtalaryna jaqyn ornalasqan «Shanhaı» shaǵyn aýdanyndaǵy apatty jaǵdaıda turǵan 76 turǵyn úıdi kóshirý josparlanǵan. Sondaı-aq aldaǵy úsh jyl ishinde qoldanystaǵy eki qazandyqty qaıta jańartý jáne bir jańa qazandyq ornatý, ortalyqtandyrylǵan jylý jelilerine qosylmaǵan shaǵyn aýdandarda oramishilik jylý jelilerin salý kózdelgen. Bul jumystar kenttiń jylýmen jabdyqtaý jelilerine júrgizilgen tehnologııalyq aýdıttiń qorytyndysyna sáıkes júzege asyrylady.
Joldardy kúrdeli jóndeý men jańasyn salý, birqatar áleýmettik nysandar – mýzyka mektebi men zamanaýı sport keshenin turǵyzý, Maıqaıyń kósheleri men aýlalaryn keshendi abattandyrý da josparlanyp otyr.
Atap óterligi, keıingi úsh jylda Maıqaıyń kentin jáne oǵan irgeles jatqan Sulýjon, Maıkóbe, Shóptikól, Úshqulyn aýyldaryn damytýǵa oblystyq bıýdjetten 4 mlrd teńgeden astam qarajat bólingen. Bul aqsha 33 km
kirme jol salýǵa, kóshelerdiń 17 km asfaltti jabynyn jóndeýge, jylýmen jabdyqtaý jáne sý qubyrlary jelilerin jańartýǵa, mektepter men aýrýhanalardy kúrdeli jóndeýge, mektep avtobýsyn, sanıtarlyq kólik satyp alýǵa, medısınalyq jabdyqtardy jańartýǵa, balalar oıyn alańdaryn ornatýǵa baǵyttalǵan.
Jańa memorandým ınfraqurylymdy jańǵyrtý, jańa nysandar salý jáne odan ári abattandyrý úshin qosymsha múmkindikter berip, kenttiń damý qarqynyn birneshe ese arttyrady.
Maıqaıyń – ereksheligi kóp eldi meken. Erekshe deıtini sol, 10 myńnan asa halyqtyń berekesine aınalǵan álemge áıgili altyn kenishi osynda oryn tepken. Onyń ekonomıkasy jerasty baılyǵyna táýeldi. Altyn kenishi jergilikti halyqty asyrap otyr. «Maıqaıyńaltyn» aksıonerlik qoǵamy Ertistiń Pavlodar óńirindegi eń alǵash qurylǵan taý-ken óndirisi ekenin de atap ótken abzal. Ondaǵy kenishke tuńǵysh ekskavator 1940 jyly túsirilgen eken. Ol býmen jumys isteıtin edi. Kásiporynǵa qazirde birneshe ken-baıytý fabrıkasy qaraıdy. Jergilikti halyqtyń deni búginde altyn óndirisinde eńbek etedi.
Pavlodar oblysy,
Maıqaıyń kenti
