Aısha Baqtyǵul – ınklıýzıvti ónerdiń ókili. Qarshadaıynan qylqalamdy serik etken onyń shyǵarmashylyǵy erekshe jandardyń da óner arqyly óz ornyn taba alatynyn dáleldeıdi. Ishki álemin, ómirge kózqarasyn qylqalam arqyly kórsetetin keıipkerimizdiń qoltańbasy qanshama janǵa úmit pen shabyt syılaıdy.
Jaqynda sýretshiniń «Núkte men syzyq» atty kórmesi ótti. Osynaý aıryqsha kórme ustazy Arystanbek Shalbaev ekeýiniń úzdiksiz eńbeginiń nátıjesi. Kórme – tek óner merekesi ǵana emes, almatylyq erekshe jandardyń sheksiz múmkindikterin pash etken oqıǵa boldy.
Aıshanyń sýretshilik joly pandemııa kezinde bastalǵan. Úıde oqshaýlaný kezeńinde ol sýret salýǵa den qoıyp, bul óner túri onyń ózindik qarym-qatynas tiline aınalsa kerek. Anasy Álııa Sandybaıdyń aıtýynsha, Aısha az sóılese de, óz oıyn, sezimin sýret arqyly jetkizedi.
Sýretshi Arystanbek Shalbaevpen tanystyǵy Aıshanyń shyǵarmashylyǵyna jańa serpin bergen. Bir jyl kóleminde olar 60-tan astam týyndyny dúnıege ákelgen. Ustazy Aıshanyń sýretterin júrekpen jazylǵan týyndylar dep sıpattaıdy. Onyń aıtýynsha, Aısha boıaýlar men syzyqtardy tereń túsinip, ishki dúnıesin kenep arqyly kórsetedi.
«Núkte men syzyq» – shákirtimniń alǵashqy jeke kórmesi. Kórmede akrılmen, maıly boıaýmen, qalammen, flomastermen salynǵan túrli týyndylar usynyldy. Ár sýret – Aıshanyń ishki áleminiń kórinisi, onyń ómirge degen kózqarasy men sezimderiniń beınesi», deıdi A.Shalbaev.
Erekshe jandardyń ónerden óris tabýy – qoǵamnyń rýhanı jetilýiniń kórinisi. О́ner shekarasy joq sheksiz álem desek, sol keńistikte Aısha armanyn erkin órbitip, óz álemin somdaıdy. Onyń árbir sýreti – únsiz tildesken úmit, tózim men shabyttyń birtutas beınesi. Aıshanyń óneri – tek qylqalammen salynǵan sýret emes, ol – ómirge degen mahabbattyń boıaýly órnegi.
«Aısha álemge ózgeshe qaraıdy, túısigimen tanıdy, júregimen sezedi. Onyń jan dúnıesindegi tazalyq pen sezimtaldyq sýretterinen syr shertedi. Ádettegi kórkem obrazdardan góri, týyndylarynda únsiz sóıleıtin boıaý, jaryq pen kóleńkeniń tili bar. Erekshe kútimdi qajet etetin jandardyń biri bola tura, ol ónerden óz órisin tabýǵa talpynady. Armanyn qaǵaz betine boıaýmen órip, bolmysynyń baılyǵyn qylqalam arqyly pash etip júr. Aısha salǵan sýretter – qoǵamnyń úni. Ol ómirdi ózgelerden de tereńirek qabyldaıdy. Jany názik, júregi keń sýretshiniń óneri tek beıneleý emes, bolashaqqa baǵyttalǵan ishki daýystyń kórinisi. Qoǵamda Aısha syndy talantty jandardyń tanylyp, sondaı-aq tabysqa jetip jatqany – rýhanı damýdyń ólshemi. Erekshe jandarǵa qoldaý kórsetý arqyly biz tek áleýmettik ádilettilikti emes, adamzattyń eń asyl qasıetterin: janashyrlyqty, meıirimdilikti, shabytty ulyqtaımyz. Olardyń áleýetin taný – adamgershilik paryzymyz», deıdi ónertanýshy Móldir Saǵyndyqova.
ALMATY
