Zaýyt ókilderiniń aıtýynsha, sıfrly júıeler qaýipsizdikti, tıimdilikti, ornyqtylyqty arttyrýǵa múmkindik beredi jáne eń bastysy, eńbek jaǵdaılaryn qolaıly ári qaýipsiz etýge septesedi.
«Sıfrlandyrý máseleleri Aqsý ferroqorytpa zaýyty úshin kún tártibinen túsip kórgen emes. Bizde barlyq negizgi óndiristik bólimsheler avtomattandyrylǵan júıelermen jabdyqtalǵan, shıkizattyń kelip túsýinen bastap, óńdeý jáne daıyn ónimdi jiberýge deıingi barlyq kezeń sıfrlanǵan. О́ndiriste sıfrlyq tehnologııalardy engize otyryp, otandyq sheshimderdi qoldanýdy arttyryp, shetelge táýeldilikti azaıtýdy maqsat etip otyrmyz», deıdi kásiporyn dırektory Musabek Maqashev.
Munda temirjol kóligin basqarýǵa arnalǵan «Dispatch» dep atalatyn júıe bar. О́ndiris ornynda temirjol vagondarynyń qozǵalysy men ornalasýyn qadaǵalaýǵa qatysty qajettilik burynnan qalyptasqan. Sebebi zaýyt aýmaǵyna táýligine 900 vagonǵa deıin kirip-shyǵýy múmkin. Jańa joba jetekshisi Dmıtrıı Rodygınniń sózinshe, buryn bári qolmen atqarylatyn. Damytýshylar komandasy qysqa merzimde «Dispatch» veb-qosymshasyn jasap shyǵardy. Endi ol ár vagonnyń naqty ýaqyttaǵy ornyn kórsete alady.
Qabyldaýshylar elektrondy jol paraqtaryn toltyryp, habarlandyrýlar alady. Nebári 2-3 mınýttyń ishinde esep jasaıdy. Al buryn bul úrdisti júzege asyrýǵa 40 mınýt jumsalatyn. Endi barlyǵy birden bazaǵa tirkeledi. Sonyń nátıjesinde temirjolshylar júıeden vagondar týraly barlyq málimetti kórip, ýaqyt únemdeıdi. Aldaǵy ýaqytta bul jobany ERG-diń barlyq kásiporyndaryna taratý josparlanǵan.
Sıfrlandyrýdyń taǵy bir aýqymdy jobasy – MES ERG. Bul – óndiristik úderisterdi jedel basqarý júıesi. Búginde ol arqyly barlyq 26 peshte jumys isteıtin elektrondy pesh jýrnalyn júrgizý múmkindigi bar. Bul agregattardyń jumysyn baqylaýǵa múmkindik beredi. Júıe peshterdiń aýysym nemese táýlik boıy qalaı jumys istegenin tolyq kórsetedi. Taǵy bir jańashyldyq – ferroqorytpa peshteri elektrodtarynyń jumysyn baqylaý úshin MES júıesinde birneshe fýnksıonaldy ekran ázirlengen. Elektrod massasyn salý úderisi avtomatty túrde baqylanady. Osy quraldar metallýrgterge óndiristiń úzdiksiz jumysyn qamtamasyz etýge kómektesedi.
Sıfrlandyrý Aqsý ferroqorytpa zaýytyndaǵy metall balqytýdy da qamtyǵan. О́ndiristegi quıý mashınalaryn avtomattandyrý júıesi engizilip, júıe balqytý úderisin avtomatty túrde basqarýǵa jol ashady. Shómishtiń kólbeý buryshyn, konveıer jyldamdyǵyn, suıyq ferroqorytpa aǵynynyń qımasyn, temperatýrany ólshep, retteıdi. Bul metallýrgterdiń jumysyn aıtarlyqtaı jeńildetti.
Zaýyt ókilderi avtomattandyrylǵan medısınalyq tekserýler engizilgenin de atap ótti. Endi metallýrgterdiń aýysym aldyndaǵy jáne aýysymnan keıingi tekserýden ótýine birneshe mınýt qana ýaqyt ketedi. Jabdyqtar qan qysymyn, tamyr soǵysy, dene qyzýyn, tynys alýda shyǵarylatyn aýadaǵy alkogol deńgeıin ólsheıdi. Nátıjeler birden korporatıvtik «qollab» qosymshasyna jáne «Eýrazııa» medısına ortalyǵyna túsedi. Eger kórsetkishter normadan aýytqyp ketse, dárigerlerge jedel habarlama kelip, olar dereý is-sharalar qabyldaı alady. Bul joba óndiristegi qaýip-qaterdi azaıtyp, aýrýlardy erte kezeńde anyqtaýǵa sep.
Pavlodar oblysy,
Aqsý qalasy
