Ekspozısııaǵa sýretshiniń 1970-2020 jyldar aralyǵynda salynǵan 60-qa jýyq grafıkalyq jáne keskindemelik týyndylary qoıyldy. Ýaqyt pen zaman tynysyn úılesimdi úndestirgen sheberdiń ár týndysy kórermenge aıryqsha áser syılaıdy. Eski men jańanyń qaıshylyǵy, adamdardyń minez-qulqy, tabıǵattyń sulý kelbeti kenep betinde sheberlikpen kórinis tapqan.
Aman Baqtyǵalıuly (1945-2020) artyna 100-den astam grafıkalyq jáne keskindemelik týyndy qaldyrǵan Qazaqstannyń kórnekti sýretshisi. Onyń «Ana», «Qurmanǵazy», «Shashý», «Men qazaqpyn», «Abylaı hannyń armany», «Baıqońyr», «Mahambetti eske alý», «Meniń ólkem», «Jeńis kúni» sekildi tanymal shyǵarmalary halyq júreginen oryn alǵan.
Ol N. V. Gogol atyndaǵy Almaty kórkemsýret ýchılıshesin úzdik bitirip, keıin I. E. Repın atyndaǵy Lenıngrad keskindeme, músin jáne sáýlet ınstıtýtynda «Grafıka» mamandyǵy boıynsha joǵary bilim alǵan. 1979-1988 jyldar aralyǵynda N.V.Gogol atyndaǵy Almaty kórkemsýret ýchılıshesinde sabaq berdi. Shyǵarmashylyqpen belsendi aınalysty. 1987-1989 jyldary – QazKSR Sýretshiler odaǵy basqarmasynyń hatshysy qyzmetin atqardy. 1992 jyly N.V. Gogol atyndaǵy Almaty kórkemsýret ýchılıshesiniń dırektory bolyp taǵaıyndaldy.
Sýretshi Aman Baqtyǵalıuly Qazaqstannyń beıneleý óneriniń damýyna eleýli úles qosty. Ol ómiriniń sońyna deıin ustazdyq etip, kóptegen jas sýretshilerge tálim berdi. A. Baqtyǵalıuly, M. Kısamedınov, I. Isabaev, B. Pak, A. Rahmanov, S. Aıtbaev, Sh. Sarıev, T. Dosmaǵambetov, K. Kametov sııaqty tanymal sýretshilermen birge ulttyq ónerdiń aspektilerin, ony qorshaǵan shyndyqtyń sulýlyǵy men alýan túrliligin ashýǵa jáne kórsetýge tyrysty. Onyń shyǵarmalarynda patrıottyq taqyryptar – týǵan jerge degen súıispenshilik, qarapaıym adamnyń ómiri, eńbek kúnderi, turmystyq kórinister, Qazaqstannyń kórkem jerleri men peızajdary beınelengen. Kórmede sýretshiniń peızajdary, portretteri, natıýrmorttary men taqyryptyq kompozısııalary usynylǵan. Bul týyndylar Aman Bahtyǵalıevtiń dúnıetanymy men shyǵarmashylyq jolyn aıqyn beıneleıdi.
Sýretshiniń jumystary elimizdiń memlekettik jáne sheteldik mýzeılerinde, sondaı-aq jeke kolleksııalarda (Reseı, Ýkraına, Meksıka jáne t.b.) saqtalǵan. Sonymen qatar, QR Memlekettik ortalyq mýzeıinde sýretshiniń 8 grafıkalyq týyndysy bar.
