Amandyq-saýlyq surasty. Sálden keıin aǵasy ótinishin aıtty. Sol sátte bul «básem-aý, qalaısha habarlasyp, hal-jaǵdaı surasa qaldy desem...» dedi ishteı.
Týys aǵasy densaýlyǵyna qatysty qujattar men júreginiń jaǵdaıy týraly málimetter jazylǵan dıskini ushaqpen bara jatqan beıtanys adamnan bergizip jibergenin aıta kelip, budan álgi kisiden atalǵan zattardy alyp, belgili bir emhanadaǵy dárigerge aparyp berýdi suraǵan-dy.
Aǵasynyń ótinishin oryndaýǵa múmkindigi bola tura syrǵaqtatyp, qııýyn qıystyryp, bir syltaýdy kóldeneń tartyp, álgi ótinishin oryndaı almaıtynyn jetkizdi. Onyń bulaısha syltaýratýyna «Ánsheıinde habarlaspaıdy, ótinishteri bolǵanda ǵana osylaı amandyq-saýlyq suraǵysh bular...» degen ishki renishi, menmendigi sep boldy.
Ol túske deıin teledıdardan konsert kórdi, áleýmettik jelilerdi aqtardy. Tús aýa bılıard oınap qaıtýǵa jınala bergende, aýyldastary «chatynan» álgi týys aǵasynyń ómirden ozǵany týraly jamanatty habardy oqydy. Aýyldastarynyń aıtýynsha, aǵasy burynnan qatty aýyryp júrgen eken.
Shyǵar esikke jaqyn turǵan oryndyqqa sylq ete otyryp qaldy...
Sol sátte onyń kóz aldyna álgi qaıtys bolǵan týysqan aǵasynyń osydan on shaqty jyl burynǵy – munyń sheshesine «jeńeshe, myna bir qalta qurt pen bir qaryn maıdy kelinińiz arnaıy sálemdeme retinde berip jiberdi sizge» dep, qolyndaǵyny usynyp, jeńgesiniń «shaı iship ket» degen ótinishine asyǵys ekenin aıtyp, áldebir ázil aıtqan bolyp, ile aryq tor tóbel atymen tepeńdep, aýladan shyǵyp bara jatqandaǵy beınesi kóz aldynan ketpeı qoımasy bar ma?..
Munyń kózine jas irkildi. «Qap, osy estelik eles keshe ol kisi telefon soqqanda nege kóz aldyma kelmedi eken?» dep mújilip, eseńgirep qaldy. О́ziniń janyn jedi. Biraq ne shara? Ol janaza namazyna úlgerýge asyqty.
Arzymaıtyn ótinish, sońǵy tildesý mazmuny, júrekti janshyǵan ókinish...
