Jıynda sóz alǵan Premer-mınıstrdiń orynbasary E.Kósherbaev keıingi jyldary bilim uıymdary men pedagogterdiń qoǵamdaǵy róli artyp kele jatqanyn jetkizdi. Onyń oıynsha, osyǵan oraı muǵalimderdiń jaýapkershiligi de, soǵan saı jalaqysy da jyl sanap kóbeıip jatyr.
– Elimizdiń ekonomıkasyn damytý jańa zamanda jańa mindetter júktedi. Bul bilim salasyna jaýapkershilikti arttyra tústi. О́ıtkeni bizge qoǵamnyń talabyn qanaǵattandyratyn, ózgeristerge beıim urpaq qalyptastyrý qajet. Mundaı uly is – álbette pedagogtiki. Qazirgi zamanda muǵalim bilim berýshi ǵana emes, jańalyqty jasaýshy, oqýshyny baǵyttaýshy bolýy kerek. Osy rette Prezıdentimiz erekshe mán berip otyrǵan urpaq tárbıesine bilimmen birdeı nazar aýdarǵan abzal. Sıfrlyq transformasııa jaǵdaıynda tek bilim berý ǵana emes, balalardy jyldam ózgertip jatqan ómirge beıimdeý mańyzdy. Jasandy ıntellekt pen jańa tehnologııalar muǵalimniń kómekshisine aınalyp, shyǵarmashylyq pen damýǵa kóbirek múmkindik ashýǵa tıis. Sonymen qatar pedagogterdiń kásibı ósýi men laıyqty eńbegi úshin barlyq jaǵdaıdy jasaý qajet. Bizdiń ortaq mindetimiz – básekege qabiletti, bolashaqtyń syn-qaterlerine daıyn urpaq tárbıeleý, – dedi vıse-premer.
Tamyz keńesinde baıandama jasaǵan Astana qalasynyń ákimi J.Qasymbek bıyl qalada úsh aýysymdy mektep máselesi tolyǵymen sheshiletinin aıtty.
– Memleket basshysy Qasym-Jomart Toqaev respýblıkalyq Tamyz forýmynda erkin urpaq ósip kele jatqanyn, zańdy saılaý men tártipke baǵyný qoǵamnyń berik qaǵıdasyna aınalyp, Qazaqstannyń jańa sıpattaǵy memleketke bet burǵanyn atap ótti. Elordamyz jyldan-jylǵa damyp, halyq sany artyp keledi. Byltyr mektepti bitirgen túlekterdiń sany 14 myń bolsa, bıyl mektepke baratyn balalardyń sany 30 myńnan asyp otyr. Bul ne degen sóz? Jyl saıyn kem degende 10-15 mektep salýymyz qajet. Bıyl jergilikti bıýdjet esebinen 14 jańa mektep, 4 balabaqsha ashyldy. Boı kóterip jatqan jekemenshik bilim uıymdary taǵy bar. 2024–2025 oqý jylynda Memleket basshysynyń bastamasymen 16 «Keleshek mektepteri» paıdalanýǵa berildi. Bıyl taǵy 7 «Keleshek mektepteri» ashylady. Jańa mektepterdi kóptep salý arqyly bas qalamyzda úsh aýysymda oqytý máselesi sheshiledi. 2-3 jyl buryn qalada 8 úsh aýysymdy mektep bolatyn, osy jyldan bastap úsh aýysymdy mektep bolmaıdy, – dedi ákim J.Qasymbek.
Astana qalalyq bilim basqarmasynyń basshysy Qasymhan Senǵazyuly 3-6 jastaǵy balalardy mektepke deıingi uıymmen qamtý 100 paıyzǵa jetkizilgenin, endigi mindet retinde 2 jastaǵy balalar baratyn bóbekjaı-balabaqshalardy kóbeıtý qolǵa alynǵanyn baıandady.
– Astanada vaýcherlik qarjylandyrý júıesin engizý nátıjesinde 3-6 jasqa deıingi balalardy mektepke deıingi tárbıeleý jáne oqytýmen qamtý kórsetkishi 100 paıyzǵa jetti. Endi 2 jastaǵy balalardy qamtýǵa kúsh salamyz. 23 balabaqshada 150 balany qamtıtyn ınklıýzııany qoldaý kabınetteri ashyldy. Jańa oqý jylynan bastap osyndaı kabınetter sany artady. 20 balabaqshada «Tilge boılaý» qanatqaqty jobasy iske asyryldy. Jańa oqý jylynan bul joba qala boıynsha barlyq memlekettik balabaqshaǵa engiziledi. Prezıdent Qasym-Jomart Toqaevtyń 2024 jylǵy 2 qyrkúıektegi Joldaýynda elimiz boıynsha 3 jyl ishinde 1300 mektepti qaıta jańǵyrtý tapsyryldy. Astanada osy tapsyrma aıasynda 2025–2027 jyldary 22 mektepti jańartý kózdelgen. Bıyldyń ózinde 6 mektep tolyq jańartýdan ótti. Elde tehnıkalyq jáne kásiptik bilim berý uıymdarynyń stýdentteri álemdik deńgeıde kásibı quzyretterin rastaı bastady. Jumysshy mamandyqtar jyly aıasynda qolǵa alynǵan bul bastama túlekterdiń biliktiligin arttyrýǵa baǵyttalǵan. Halyqaralyq sertıfıkat jastarǵa sheteldik kompanııalarda tájirıbeden ótip, eńbek naryǵyna senimdi qadam basýǵa jol ashady. «World skills Kazakhstan 2024» VII respýblıkalyq chempıonatynda Astananyń 11 kolledjinen qatysqan stýdentter 31 quzyrettilik boıynsha baq synap, 11 medal ıelendi. Nátıjesinde, elordalyq komanda respýblıka boıynsha úzdikter qatarynan tabylyp, jalpy komandalyq esepte birinshi oryndy jeńip aldy, – dedi Q.Senǵazyuly.
Is-shara sheńberinde arnaıy kórme uıymdastyryldy. Kórmede bilim salasyn damytýǵa, sapany arttyrýǵa arnalǵan otandyq jáne sheteldik ónimder, kórneki quraldar kórsetilip, bas qaladaǵy oqytý uıymdarynyń tıimdi ádisteri men úzdik tájirıbeleri tanystyryldy. Máselen, Astana qalasy №82 balabaqshanyń meńgerýshisi Raıhan Altynhanqyzy kásibı baǵdarlaýdy, atap aıtqanda, jasandy ıntellekt elementterin balabaqshadan bastap engizip otyrǵanyn jetkizdi.
– Memleket basshysy Qasym-Jomart Toqaev keshegi respýblıkalyq Tamyz konferensııasynda bilim úderisine ýaqyt ozdyrmaı jasandy ıntellekt úlgilerin engizýdi tapsyrdy. Bala mektepte jańa pándi ońaı alyp ketýi úshin biz jasandy ıntellekt úlgilerin balabaqshadan bastap oqý-tárbıe úderisine engizdik. Biz bul jańa jobany negizi byltyrdan beri qolǵa alǵanbyz. Qazirgi nátıjemiz jaman emes. Osy jasandy ıntellekt elementteri bar robottehnıka sabaǵynan úzdik bolǵan balalarymyz halyqaralyq bilim báıgesinen 2-oryn ıelendi. Tárbıelenýshilerimiz aldymen jaı qurastyrýdan bastap úırense, keıin kúrdelene túsken tapsyrmalar arqyly pýltpen basqarylatyn elektrondyq traktordy ózderi jasap shyqty. Búgingi Tamyz keńesine tájirıbemizdi taratýǵa kelip turmyz, – dedi R.Altynhanqyzy.
Konferensııa jumysy astanalyq úzdik pedagogterdi marapattaýmen máresine jetti.
