«Qaırattyń» dańqy asqaqtaǵan kún

Endi Alataý bókterine tek Eýropanyń ǵana emes, álemge dańqy jaıylǵan grand klýbtar at baılaıdy. «Real Madrıd», PSJ, «Manchester Sıtı», «Barselona», «Bavarııa», «Lıverpýl», «Inter», «Borýssııa» syndy azý tisi alty qarys tegeýrindi komandalardyń qaısysy «Qaıratpen» bir topqa túsetini búgin anyqtalady. Qalaı bolǵanda da Almatynyń «Ortalyq stadıony» qońyr kúzde álem nazaryn ózine qaratady.

Chempıondar lıgasynyń irikteý kezeńindegi match jónin­de birer sóz. «Qaırat» pen «Sel­tık» tartysy týraly tańdy tańǵa jalǵap aıtýǵa bolady. Syrt­ta­ǵy oıynda da, óz alańy­myz­da­ǵy dodada da jigitter baryn saldy. Árıne, Dastan Sát­baevtyń Glazgodan sary qaǵaz «arqalap qaıtýy» alaman aldynda jankúıerlerdiń kóńi­lin túsirgeni de ras. Degenmen de bilikti maman Radıktiń uly Rafael Ýrazbahtın alma­ty­lyq komandany asqan jaýap­kershilikpen saıysqa salǵany kózge uryp turdy. Ras, ekstra­ taımnyń sońǵy mınýttary syr­ǵyp jatqan­da «Seltık» oıynshylary kádimgideı qyspaq­­qa aldy, tipti alańynan orta taıly-taıaǵy­men alyp shabýylǵa kóshti. Birne­she joı­qyn soqqyny «Qaırat» qaq­pashysy Temirlan Anarbe­kov (matchtyń bas qaharmany) qaı­taryp otyrdy. 21 jastaǵy qazaq ulanynyń penaltı toı­tarýdaǵy ábjildigi álemniń nazarynda qazir. Atyraýda týyp, Almatyda shyńdalǵan qaqpashy Temirlan Anarbekov 14 jasynda «Qaırat» fýtbol akademııasyna aýysyp keldi. 2022 jyly negizgi quramǵa ótti. Al byltyr «Jeńis» klýbyna jalǵa berildi. Jaratqan juldyzyńdy jaǵyp, mańdaıyńdy jarqyratam dese, áp-sátte ǵana. «Qaırattyń» senim artar negizgi qaqpashysy Aleksandr Zarýskıı jara­qat­tanyp, alańǵa Anarbekov alǵashqy mınýttan shyqty. О́ziniń qarymy men qabiletin pash etetin shaqty talantty qaqpashy qalt jibergen joq. Eýrokýboktyq matchtarda talaı maıdan kórip, ábden ysylǵan, toptyq kezeńine de kerýen tartqan shotlandııalyq klýbtyń aıbarynan yqqan da, sasqan da joq. Penaltı serııasyn bastaǵan Adam Aıdanyń buryshty kózdeı tepken soqqysyn qaıtardy. Odan keıin Lıýk Makkoýenniń, Daıdzen Maıedanyń da tepken dobyn toqtatty. Arne Engels pen Kallým Makregordyń golyn toıtara almady dep Temirlandy sógý áste qısynsyz. Eýrokýboktyq alamanǵa jańa aralasyp, boıyn úırete bastaǵan jas qaqpashy úshin bir emes, úsh penaltıdi qaıtarý – orasan jetistik. «Seltıktiń» tájirıbeli qaqpashysy talaı dýdy kórgen oıynshy. Danııa ulttyq quramasynyń qaqpasyn qoryp eki ret álem chempıonatyna, Eýropa birinshiligine qatysqan sańlaq. Tájirıbeli qaqpashy ózinen 17 jas kishi Temirlannyń talantymen shendese alǵan joq.

Almatylyq «Qaırat» sapynan Valerıı Gromykonyń soqqysy qaqpa mańdaıshasynan qaıtsa, Aleksandr Martyno­vıch, Ofrı Arad, Egor Sorokın­niń tepken penaltıine Kasper Shmeıhel esh qaýqar tanyta almady.

Tartystan keıin «Seltıktiń» bas bapkeri Brendan Rodjers oıynǵa kóńili kónshimeıtinin de aıtty. «Bizdiń jigitter ras, óte sylbyr oınady. Biz apta buryn óz alańymyzda ótkizgen tartysta gol soǵyp, jeńisti jaqyndata túsýimiz kerek edi, buıyrmady. Chempıondar lıgasynyń toptyq kezeńinde oınaǵymyz keldi, biraq bul joly bizdiń baǵymyz da janbady, babymyz da kemshin soqty. «Qaırat» komandasyn jeńisimen quttyqtaımyn, aldaǵy tartysta sáttilik tileımin. О́te tegeýrindi ujym. Jankúıerlerge aıryqsha qurmet bildiremiz, biz úshin at arytyp kelip qoldaý kórsetti. Olardy qýantqymyz kelgen, biraq Chempıondar lıgasynyń deńgeıi, talaby óte joǵary, soǵan saı oıyn órnegin kórsete almadyq. 

«Qaırat» fýtbol klýbynyń bas bapkeri Rafael Ýrazbahtın komandanyń negizgi maqsaty­nyń biri Chempıondar lıgasy­nyń toptyq kezeńine shyǵý eke­nin de jasyrmady. «Dese de biz dál mundaı tańǵajaıyp jeńis­­ke jetemiz dep kún buryn qýan­­ǵamyz joq. Tipti bolmaǵan­da ÝEFA Konferensııa lıga­syn­da synǵa túsýdiń ózi olja dedik. Biraq jigitter qaırat tanytty. Olarǵa maqsatymyz­­dyń oryndalǵanyn aıtyp quttyq­tadym. Aldyn ala ton piship, boljam jasaǵym kelmeıdi. Degenmen de bul asý bizge – álemniń tańdaýly klýbtaryna qarsy oınaýǵa orasan múmkindik týdyryp otyr. «Seltıkke» qar­sy match aldynda toptyq kezeńde oınaıtyn Eýropanyń azýly klýbtarynyń sýretin shyǵaryp, kıim aýystyratyn bólmege il­dirdim, bul meniń ­ıdeıam edi. Ji­git­ter kórsin, bir belden assaq aldy­myzda qandaı nyǵmet turǵa­nyn sezinse dedim. Jeńisten keıin oıynshylarǵa aıttym «al endi daıyn bolyńdar» dep. Bizge qan­daı klýbtar qarsylas atansa da jan­kú­ıer­lerdi qýantýǵa bary­myzdy salamyz», dedi R.Ýraz­bah­tın.

Seısenbiden sársenbige aýǵan túnde aldas­pan aqyn Ábdildá Tá­ji­baevtyń da rýhy shat bolǵan shyǵar.

«Qaıratym» dep men júrmin,

Qaırat qylmaı sen júrsiń...

Shynymen-aq bolmaı ma,

Men qýanar jeńisiń?» dep qamshylap edi kezinde fýtbolshylardy. Almatylyq klýb el qýanar jeńisimen barsha jan­kúıerlerin jelpindirdi.

Ras, ishki chempıonatta báse­ke kúsheıip, tartys artpaı koman­dalardyń ósip, eýropalyq klýbtarymen shendese almasy aıdan anyq. Deıturǵanmen de el fýtbolynyń jylnamasynda jańa paraq ashyldy. Erkin Tapalov syndy sańlaqtardy súıenish tutyp endi «Qaırat» fýtbol akademııasynyń túlekteri Dastan Sátbaev, Temirlan Anar­bekov, Damır Qasabolat, Ramazan Baǵdat, Oljas Baıbek syndy jas oǵlandar «Santıago Bernabeý» («Real Madrıd»), «Kamp Noý» («Barselona»), «Alıans Arena» («Bavarııa»), «Etıhad» («Man­chester Sıtı»), «Park de Prens» (PSJ) syndy álemniń tańdaýly stadıondarynda jasyn oınatady.

«Qaırat» fýtbol klýby Chem­pıondar lıgasynyń toptyq kezeńine ótkeni úshin 18,62 mıllıon eýro (11, 7 mlrd teńge) syıaqy alady. Alda ár matchta jeńiske jetse – 2,1 mıllıon, teń oınasa, 750 myń eýro mólsherinde syıaqy aýdarylady.