Búginde Qazaqstan men Qytaı Halyq Respýblıkasy «Bir beldeý, bir jol» baǵdarlamasy aıasynda mádenı bastamalardy birlese damytýda. Baǵdarlamanyń negizgi maqsaty – Uly Jibek joly dáýirinen bastaý alatyn halyqtar arasyndaǵy ózara yqpaldastyqty, tarıhı murany nasıhattaý, mádenı baılanystardy nyǵaıtý jáne elder arasyndaǵy halyqaralyq tájirıbe almasýdy ilgeriletý. Osy maqsatta qanat qaqqan óner jármeńkesi Shyńjań-Uıǵyr avtonomııalyq aýdanynyń qurylǵanyna 70 jyl tolýy qarsańynda uıymdastyrylyp otyr.
Kórmede Shyńjańnyń kórkem kelbetine arnalǵan qytaı keskindemesiniń 40-qa jýyq týyndysy usynylǵan. Jumystardyń arasynda kórermen nazaryna ásem tabıǵat kórinisteri – ormandar, jaıylymdar, Pamır taý jotalary, aýyl tirshiligi, Úrimji ózenderi men ańǵarlary, sondaı-aq adam eńbegi men kúndelikti ómir peızajdary kórinis tapqan.
Kórmede usynylatyn kórkem týyndylar – bul Qytaıdyń Shyńjań ólkesine jasalatyn sapar, mádenıetter men órkenıetter arasyndaǵy ózara baılanys. Shyńjań – Qytaıdy batyspen baılanystyratyn basty qaqpa, sonymen qatar ortalyq aımaqtar Jibek jolynyń ekonomıkalyq beldeýi. Qazaqstan men Qytaıdyń mádenıet almasý tarıhy tereń, ári yntymaqtastyqty damytýǵa mol múmkindik bar. 2025–2026 jyldar Qytaı men Ortalyq Azııa arasyndaǵy joǵary sapaly áriptestikti damytýdyń jyly dep jarııalandy. 2025 jyly Shyńjań-Uıǵyr avtonomııalyq aýdanynyń qurylǵanyna 70 jyl tolyp otyr. Atalǵan kórme Shyńjańnyń kórkemdik qýatyn pash etedi. Ol Shyńjańdaǵy túrli ult ókilderiniń birligi men tabandy eńbegin beınelep qana qoımaı, jańa ómirge degen umtylysty – ekonomıkalyq jáne áleýmettik damý, turmys sapasynyń jaqsarýy, mádenı órkendeý men kórkem tabıǵı ortanyń úılesimin aıqyn kórsetedi. Sonymen birge, bul kórme Qytaı men Ortalyq Azııa elderi arasyndaǵy ashyqtyqty keńeıtip, birlese «Azııa – Eýropa altyn dálizin» qurý, sondaı-aq joǵary sapaly damý arqyly ortaq jańǵyrýdy ilgeriletý baǵytyndaǵy jarqyn bolashaqty da rýhanı turǵyda sezindiredi», - deıdi QR Memlekettik ortalyq mýzeıi syrtqy baılanystar bóliminiń jetekshisi Anna Kýshenko.
Mádenı oqıǵanyń joǵary deńgeıde ótýine Qytaı Halyq Respýblıkasynyń Almaty qalasyndaǵy Bas konsýldyǵy, Búkilqytaılyq mádenıet jáne óner qyzmetkerleri qaýymdastyǵy jáne ShUAR mádenıet jáne óner qyzmetkerleriniń qaýymdastyǵy muryndyq bolǵan.
