О́ńir bıligi jergilikti bıýdjet esebinen joǵary jáne joǵary oqý ornynan keıingi bilimdi mamandardy daıarlaýǵa arnalǵan granttardy jyl saıyn bólip otyr.
2019–2024 jyldar aralyǵynda rezıdentýraǵa barlyǵy 157 grant qarastyryldy. Al 2025–2026 oqý jylyna eńbek naryǵynyń qajettiligin eskere otyryp, taǵy 31 grant bólindi. Qazirgi tańda 62 dáriger rezıdentýrany támamdap, óńirlik medısınalyq mekemelerde keminde 5 jyl eńbek etý mindettemesimen jumysqa ornalasty. Sonymen birge 84 jas maman rezıdentýrada oqyp jatyr, 11 rezıdent áleýmettik demalysta.
Medısına qyzmetkerlerin turaqty jumys isteýge yntalandyrý úshin áleýmettik qoldaý sharalary iske asyrylýda. Bıyl 41 mamanǵa turǵyn úı satyp alý nemese salý úshin 367,3 mln teńgege deıin bıýdjettik nesıe berý , 129 mamanǵa jalpy somasy 47,6 mln teńge kóleminde kóterme járdemaqy tóleý úshin qarjy bólindi.
Birshama ýaqyt buryn oblystyq máslıhattyń sheshimimen birjolǵy áleýmettik qoldaý mólsheri jańartyldy. Máselen, aýyldyq eldi mekenderge, kentterge, monoqalalarǵa jáne aýdandyq mańyzy bar qalalarǵa jiti tapshy mamandarǵa – 8,5 mln teńge, osy óńirlerge barǵan ózge mamandarǵa – 1,2 mln teńge, Taraz qalasyna kelgen mamandarǵa – 800 myń teńge kóleminde qarjylaı qoldaý kórsetý qarastyryldy.
Budan bólek, birqatar aýdanda kommýnaldyq qyzmet, otyn, sý jáne kómir shyǵyndaryn óteý úshin 5 AEK kóleminde kómek kórsetiledi. Naqtyraq aıtsaq, Talas aýdanynda jas mamandardy turǵyn úımen qamtamasyz etý josparda bar. Qordaı aýdanynda birinshi jumys jylynda jaldamaly páter aqysy óteledi.
Memlekettik qoldaý men jergilikti bastamalardyń ózara úılesýi Jambyl oblysynda medısınalyq kadr tapshylyǵyn júıeli sheshýge múmkindik berip otyr. Bul sharalar óńir turǵyndaryn sapaly medısınalyq qyzmetpen qamtýǵa jol ashady.
Jambyl oblysy
