Sýretti túsirgen – Jangeldi ÁBDIǴALYM
Keshen Jet A-1 tıpti avıaotyndy qabyldaý, saqtaý jáne quıýǵa arnalǵan joǵary tehnologııaly nysan bolmaq. Sonymen birge Qaraǵandy áýejaıynyń áleýeti artyp, Ortalyq Azııadaǵy avıasııalyq qyzmet kórsetý ortalyǵynyń qataryna qosylady. Joba úsh kezeńnen turady. 2025 jyldyń sońynan bastap, 2026 jyldyń basyna deıingi aralyqta tehnologııalyq jabdyqtar jobalanyp, montajdalady. Ekinshi kezeńde (2026 jyldyń sońyna deıin) kólemi 2 000 tekshe metr bolatyn rezervýar men qyzmet kórsetý kesheni salynady. Úshinshi kezeńde (2027 jyldyń III toqsany) qoıma kólemi eki ese ósip, aýmaq alańy 4 myń tekshe metrge jetedi.
«Jobanyń júzege asýy qos el arasyndaǵy strategııalyq yntymaqtastyqty jańa beleske kóterip, oblystyń tranzıttik áleýetin aıtarlyqtaı arttyrady. Nátıjesinde, aımaq ekonomıkasy órkendep, elder arasyndaǵy ózara baılanys burynǵydan da nyǵaıa túsedi», deıdi óńir basshysy Ermaǵanbet Bólekpaev.
Qazir áýejaı jylyna 50 myń tonnaǵa deıin júk tasymaldaı alady. Joba tolyq iske qosylǵanda bul kórsetkish 200 myń tonnaǵa deıin artady. Mundaı kósheli kórsetkish óńirdiń logıstıkalyq múmkindigin tórt ese arttyryp, óńirdi Qytaı – Eýropa baǵytynyń basty tranzıttik beketine aınaldyrýǵa jol ashady. Úrimshi qalasy Halyqaralyq qurlyq porty jáne ekonomıkalyq áýejaı servısi bıýrosy basshysynyń orynbasary Szıýı Hýeı joba halyqaralyq deńgeıdegi tasymaldy ózara tıimdi etip, seriktestikti jańa deńgeıge shyǵarady, dep otyr.
Keshenniń qurylysy Eýropanyń JIG, EI jáne AFQP standarttaryna saı júrgiziledi. Jobaǵa álemdik energetıka naryǵynda kóshbasshylardyń biri – qytaılyq «Petro China» kompanııasy strategııalyq seriktes retinde qatysady.
Kezdesý barysynda eki eldiń avıasııa jáne logıstıka salasyn ilgeriletýge baǵyttalǵan birqatar qujatqa qol qoıyldy. Mańyzdy mámileler tizbeginde «Petro China Kazakhstan Ltd» men «Silk Aviation Airport Development» arasyndaǵy avıaotyn jetkizý týraly kelisim bar.
«Biz jańa keshen arqyly Qazaqstan men Qytaı arasyndaǵy ekonomıkalyq baılanystardy nyǵaıtýmen qatar, ekologııalyq jaýapkershilikti de basty orynǵa qoıamyz. Keleshek urpaqqa taza jáne qaýipsiz ınfraqurylym qaldyrýǵa baǵyttalǵan joba tolyq standarttarǵa saı bolýy qajet», deıdi «Jet Fuel Service» kompanııasynyń negizin qalaýshy Erlan Ospanov.
Qaraǵandy oblysy
