Sýret: jasqazaq.kz
«Úkimet qaýlysyna sáıkes áleýmettik osal top otbasynyń 5 sanatyna aýdandyq, qalalyq bilim bólimderi tarapynan ata-analarynyń nemese qamqorshylarynyń esepshottaryna aýdarylyp jatyr. Jyl basynda Ulttyq bilim berý derekter qory negizinde 55 654 bala anyqtalyp, oǵan 2 mlrd 415 mln 773 myń teńge mektep formasy men oqý quraldaryn alýyna qarjy qaraldy. Búgingi tańda, ata-analarynyń bergen ótinishterine sáıkes, atalǵan sanattaǵy 9 078 balanyń ata-analarynyń esepshottaryna 414 mln 016 myń teńge aýdaryldy. Ata-analarynyń bergen ótinishterine sáıkes, ári qaraı qarjyny aýdarý jumystary júrgizilýde», delingen oblys ákimdigi baspasóz qyzmetiniń bizge bergen málimetinde.
Sondaı-aq aýdan, qala ákimdikterinde «Mektepke jol» aksııasy sheńberinde áleýmettik osal top otbasynyń balalaryna demeýshilerdiń kómegimen oqý-quraldary men mektep formasy alyp berilýde. Al «Halyq banki» Túrkistan qalasynda ornalasqan bilim berý uıymdaryndaǵy 1-synypqa keletin áleýmettik osal top otbasynyń 200 balasyna oqý quraldaryn alyp berýge demeýshilik jasaýda. Budan bólek, aýdan, qala ákimdikterinde mektep formalaryn qoljetimdi baǵada satyp alý úshin shalǵaı eldi mekenderde «Mektep jármeńkeleri» ótkizilip jatyr.
Aıta ketelik, oblysta bıyl «Keleshek mektepteri» jobasy men jańa qurylystar esebinen memlekettik mektepter sany 13-ke artyp, 935-ke jetedi. Jańa oqý jylynda 1-11 synyptarda 568 myńǵa jýyq oqýshy bilim alady dep boljanyp otyr. Birinshi synypqa 48 myńnan astam oqýshyny qabyldaý josparlanǵan. О́ńirdegi bilim uıalarynyń jańa oqý jylyna daıyndyǵy talqylanǵan jıynda oblys ákimi Nuralhan Kósherov jaýaptylarǵa bilim uıalary 1 qyrkúıekke deıin 100 paıyz daıyn bolýy kerektigin aıtyp, naqty tapsyrmalar berdi. Bilim uıalaryn qatty jáne suıyq otynmen qamtý, jylytý maýsymyna daıyndaý baǵytyndaǵy tirlikti de shıratý qajet. Oblystyq bilim basqarmasy basshysynyń mindetin atqarýshy Ǵalymjan Orynovtyń aıtýynsha, «Keleshek mektepteri» jobasy aıasynda josparlanǵan 29 mekteptiń 13-i paıdalanýǵa berilip, 9 mektepte oqý úderisi júrdi, qamtylǵan oqýshy sany – 7 694 (77%). 4 mektep oqý úderisin osy jańa oqý jylynda bastaıdy. Bıylǵy 1–30 tamyz aralyǵynda 16 mektep iske qosylady dep kútilýde. Mektepterdi jańǵyrtý jobasyna oblystyń 115 mektebi engizilgen. Bıylǵa josparlanǵan 41 mekteptiń ishinde aǵymdaǵy jóndeýmen 15 mektep, kúrdeli jóndeýmen 26 mektep qamtyldy. Qazirgi tańda 41 mekteptiń qyryǵynda bekitilgen óndiristik kestege sáıkes jumys júrgizilip otyr. Bıyl 6 kúrdeli jóndeý, 15 aǵymdaǵy jóndeý jumysy júrgizilip jatqan nysandar paıdalanýǵa beriledi. Qalǵan 20 nysan 2026 jylǵa ótpeli. Oblystaǵy memlekettik mekteptiń 798-i tıptik, 124-i yńǵaılastyrylǵan ǵımaratta ornalasqan. Oblystyq bıýdjet esebinen bıyl 17 bilim nysanynyń qurylysy júrgizilip jatyr. Atap aıtqanda, 11 mektep pen 1 kolledjdiń 120 oryndyq jataqhanasy, 5 qosymsha bilim berý uıymy salynyp jatyr. Osy 17 bilim nysanynyń 4-eýi bıyl paıdalanýǵa berilse, qalǵan 13-i 2026 jylǵa ótpeli.
Bilim berý uıymdaryn polısııa departamentiniń jedel basqarý ortalyǵyna qosý jumystary da júıeli atqarylyp keledi. Qazirgi ýaqytta oblystaǵy 1259 memlekettik bilim berý mekemesiniń 827-i jedel basqarý ortalyǵyna qosylǵan. Dabyl túımeleri – 100% ornatylsa, týrnıket júıesi men arnaıy kúzet qyzmeti tolyq qamtamasyz etildi. Jekemenshik sektorlardaǵy myńnan astam mekemede dabyl batyrmasy bar. 65 jekemenshik mekeme týrnıket júıesin qoısa, 500-ge jýyq ǵımaratta arnaıy kúzet qyzmet etedi.
Túrkistan oblysy
