Foto: Aqorda
Memleket basshysynyń aıtýynsha, «Respýblıkalyq referendým týraly» zań qabyldanǵanyna shırek ǵasyr ótse de, elde uzaq ýaqyt boıy búkilhalyqtyq daýys berý ótpegen. Degenmen qoǵamda halyqtyń ózekti máseleler boıynsha pikir bildirýge suranysy aıqyn boldy.
«Referendým ótkizý týraly bastamaǵa barsha halyq biraýyzdan qoldaý kórsetti. Jurtymyz Konstıtýsııaǵa engizilgen túzetýlerdi zor qulshynyspen jaqtap, daýys berdi. Memlekettik bıliktiń birden-bir bastaýy – halyq» degen Konstıtýsııa baby naqty júzege asyryldy. Bul qoǵamymyzdaǵy saıası úrdiske zor serpin berdi. Endi elimizdegi barlyq mańyzdy sheshimderdi bir el bolyp talqylap, birge qabyldaıtyn boldyq. Byltyr Atom elektr stansasyn salýǵa qatysty ótken referendým – sonyń aıqyn dáleli», dedi Prezıdent.
Q.Toqaevtyń aıtýynsha, budan bylaı eldegi barlyq mańyzdy sheshimder búkil halyq bolyp talqylanyp, birge qabyldanady. Buǵan mysal retinde ol Atom elektr stansasyn salý jónindegi ótken jylǵy referendýmdy keltirdi.
Sonymen qatar Memleket basshysy 2022 jylǵy reformanyń aýqymyna toqtaldy. Onyń aıtýynsha, ol Qazaqstannyń konstıtýsııalyq qurylymy tarıhyndaǵy eń mazmundy ózgeristerdiń biri boldy.
«Sol kezeńdegi kúrdeli saıası jaǵdaı mundaı reformany qolǵa alýǵa túrtki boldy. Referendým barysynda Konstıtýsııaǵa túzetýler engizýmen qatar, jańa Negizgi zań qabyldaý týraly da usynystar aıtyldy. Degenmen biz 1995 jylǵy Konstıtýsııany reformalaýmen shektelip, onyń negizgi mánin saqtaýdy jón kórdik. Bul sheshim el birligin, turaqtylyqty, halyqtyń tynysh ári berekeli ómirin qamtamasyz etýge baǵyttaldy», dedi Toqaev.
Prezıdenttiń aıtýynsha, bul sheshimniń arqasynda Qazaqstan búgin Konstıtýsııanyń 30 jyldyq mereıtoıyn atap ótip otyr. Jańa saıası jaǵdaıǵa sáıkes kelmeıtin baptar referendým arqyly alynyp tastaldy.
«Naqty reformanyń nátıjesinde Konstıtýsııa baptarynyń úshten biri jańartyldy. Bul – ózgeristerdiń aýqymyn kórsetedi. Ádildik, Ashyqtyq, Eseptilik, Jaýapkershilik qaǵıdattary Ata zańda kórinis tapty. Azamattardyń Konstıtýsııaǵa degen senimi nyǵaıdy. Referendým ótkizýdegi basty maqsatymyz da osy bolatyn», dep túıindedi Memleket basshysy.
