1995 jyldyń 30 tamyzynda Qazaqstannyń Táýelsizdik tólqujaty sanalatyn Konstıtýsııa qabyldandy. «Biz, ortaq tarıhı taǵdyr biriktirgen Qazaqstan halqy...» degen sózdermen bastalǵan bul qujat eldiń birligin aıqyndap, Táýelsizdigimizdi nyǵaıtýǵa zor yqpal etti.
Memleket basshysy Qasym-Jomart Toqaevtyń aıtýynsha, Ata zań elimizdiń odan ári damýyna dańǵyl jol ashyp, Qazaqstandy álemdik qaýymdastyqtyń beldi múshesine aınaldyrdy.
«Otyz jylda túrli sebepke baılanysty Ata zańǵa 6 ret túzetý engizildi. Biraq eń basty konstıtýsııalyq ózgeris osydan úsh jyl buryn jasaldy dep aıtsaq, oryndy bolar. Konstıtýsııalyq reformanyń arqasynda elimizdiń saıası-quqyqtyq júıesi túbegeıli jańa sıpatqa ıe boldy», dedi Prezıdent.
Q.Toqaevtyń sózinshe, sol kezde Konstıtýsııaǵa túzetýlerdi Parlament arqyly qabyldaý týraly usynys bolǵan. Alaıda ol kúrdeli bolsa da, basqa joldy tańdaǵanyn atap ótti.
«El bolashaǵyna tikeleı áser etetin asa mańyzdy sheshimderdi tek qana referendým arqyly qabyldaý qajet degen ustanymdy mindetti túrde saqtaý kerek dep uıǵardym», dedi Memleket basshysy.
