YOUNGO toby burynnan osy maqsatta jumys istep keledi. Qajet bolsa, kómek kórsetedi. Bastysy, jastardyń klımattyq ózgeristerge qatysty usynystaryn nazarǵa alady. Halyqaralyq, ulttyq deńgeıdegi jobalardy úılestiredi. Osy jolǵy konferensııaǵa da halyqaralyq uıymdar, memlekettik organdar qoldaý kórsetken. Is-shara sońynda uıymdastyrýshylar el jastary atynan usynys qujatyn ázirlep, YOUNGO-ǵa joldaıdy.Keıin eldegi uıymdarmen, seriktestermen sol qujat aıasynda jumys isteıdi. LCOY Kazakhstan Ulttyq jastar klımattyq konferensııasyn uıymdastyrýshylardyń biri – Arýjan Qaparova.
«Biz jastardyń klımattyq saıasatqa aralasýyna barynsha yqpaldasqymyz keledi. Búgingi konferensııanyń ekinshi sessııasyna birneshe mınıstrliktiń ókilderi kelip, jastarmen pikirlesedi. Klımattyq ózgeristerdi, oǵan beıimdelý joldaryn talqylaıdy. Osylaısha, jastar klımattyq ózgeristerge qatysty máselelerdi halyqaralyq sarapshylarmen qatar memlekettik organ ókilderimen birge saralaıdy. Basqosýǵa óńirlerden osy baǵytta jumys istep kele jatqan belsendi jastardy shaqyrdyq. Olar óz jobalaryn, usynystaryn ortaǵa tastaıdy. Mundaǵy maqsatymyz – bizdiń, jastardyń daýsyn memlekettik, halyqaralyq uıymdar estisin degen nıet. Jastar klımattyq ózgeristerge, saıasatqa qazirden aralassa, keleshekte jemisin kóredi», deıdi A. Qaparova.
Basqosýǵa Nazarbaev ýnıversıtetinen bólek, Narhoz Ýnıversıtetininen, Birikken Ulttar Uıymynyń Balalar qorynan, IýNESKO-nyń Almaty qalasyndaǵy óńirlik keńsesinen, BUU Damý baǵdarlamasynan, eldegi Frıdrıh-Ebert qorynan jáne basqa da halyqaralyq, memlekettik uıymdardan qonaqtar keldi. Baıandamashylar taqyrypqa qatysty ózekti pikirlerin, usynystaryn aıtty. Sonyń ishinde Nazarbayev University-dińturaqty damý jónindegi dırektory, professor Qanat Baıǵarın klımattyq ózgeristerge qatysty naqty sheshim qabyldaıtyn kezeń áldeqashan jetkenin alǵa tartty.
«1990 jylǵa deıin-aq ǵalymdar jer sharynda klımattyq ózgerister baıqalyp jatqanyn málimdedi. Sodan on jylda ǵylymı-zertteý jumystaryn júrgizip, jahandyq klımattyq ózgeristerdiń shyn máninde bolyp jatqanyn rastady. Osydan keıin adamzat klımattyq ózgeristerdi halyqaralyq deńgeıde talqylaı bastady. Bıyl klımattyq ózgeristerge qatysty COP-30 halyqaralyq konferensııasy ótkeli otyr. Iаǵnı, bul konferensııa 30-shy márte uıymdastyrylady. Osy is-shara arqyly taqyryp halyqaralyq deńgeıde talqylanyp keledi. Sondyqtan qazirgi jastar aldyńǵy tolqyn, aǵa býyn klımattyq ózgeristerge tótep bere almaǵanyn túsinýi kerek. Sebebi biz taqyrypty 30 jyl talqylaýmen keldik. 1995 jyly COP-tyńbirinshi konferensııasy ótti. Sol kez Klımattyq ózgeristerge qatysty konvensııa qabyldandy. Klımat áli ózgerip jatyr. Biz osy taqyrypty tek aıtýmen shektelmeýimiz kerek. Men ózim de Memleket basshysynyń tapsyrmasymen iri halyqaralyq is-sharalarǵa el atynan talaı qatystym. Endi sózden iske kóshetin kezeń keldi. Jastar osyny túsinse eken deımin», dedi Q. Baıǵarın taqyryptyń biz oılaǵannan da salmaqty ekenin uqtyryp.
Endi konferensııa qorytyndysy boıynsha eljastarynyń atynan Jastardyń klımat boıynsha ulttyq málimdemesi ázirlenedi. Ol qujat COP-30 konferensııasynda usynylady.
