Foto: Ashyq derekkóz
Aqmola oblysynyń prokýratýrasynyń habarlaýynsha, tergeý barysynda elimizdiń ár óńirinen 25 adamnyń qylmystyq shemaǵa qatysy bar ekeni anyqtalǵan. Top quramynda Qarjy naryǵyn retteý jáne damytý agenttiginiń ortalyq apparatynyń qyzmetkeri jáne birneshe bankterdiń – «Kaspi Bank», «Forte Bank», «Eýrazııalyq Bank», «Jusan bank» qyzmetkerleri bolǵan.
Alaıaqtyq áreketter 5 jyldan astam ýaqyt boıy jasalyp kelgen. Nátıjesinde respýblıka boıynsha 348 azamat jábirlenýshi atanyp, keltirilgen zalal kólemi 3,7 mlrd teńgeni qurady.
«Tergeý barysynda qylmystyq jolmen tabylǵan múlikter anyqtaldy: Almaty qalasyndaǵy páterler men jer telimderi, qymbat avtokólikter, iri kólemdegi qolma-qol aqsha. Tárkilengenniń jalpy quny – 2,7 mlrd teńge. Toptyń barlyq qatysýshylary ustalyp, ýaqytsha ustaý ızolıatoryna qamaldy. Qazirgi tańda qylmystyq is prosess qatysýshylaryna tanysýǵa berildi, túpkilikti sheshimdi sot shyǵarady», delingen habarlamada.
Prokýratýra azamattardy saq bolýǵa shaqyryp, alaıaqtarǵa senbeý qajettigin eskertti.
