«Aqyldastar» ustanymy aıqyn

О́tkendi tanymaı, bolashaqqa jol bastaý múmkin emes. El erteńi úshin erinbeı eńbek etken keshegi erlerdiń, búgingi dana qarttarymyzdyń esimin  jas urpaq esh umytpaýǵa tıis. Osydan biraz jyl buryn qurylǵan «Aqyldastar» dep atalatyn Semeıdegi ardager-aqsaqaldardyń qoǵamdyq uıymy búginde ózderiniń atqarǵan jumystarymen qalyń kópshilikke, ásirese, jas­tar qaýymyna úlgi bolyp keledi. Shynyn aıtý kerek, Keńes Odaǵy ydyrap, elimiz táýelsizdik alǵan jyldary, ásirese qalaǵa údere kóshken aýyl turǵyndarynyń arasynda Uly Otan soǵysynyń ardagerleri kóp boldy. Sol shaqta qalaǵa kelgen ardagerler qaýymynyń ne isteımiz, áleýmettik jaǵdaıymyzdy qalaı sheshemiz dep biraz qınalyp qalǵany da jasyryn emes. – Osydan keıin qoǵamnan tysqary qalǵandy jón kórmeı, «Aqyldastar» dep atalatyn aýyl ardagerleriniń birlestigin qurdyq, – deıdi birlestik tóraǵasy, ardager aqsaqal Saǵyndyq Beısenbaev. – Búginde zańdy túrde tirkelgen qoǵamdyq birlestigimizdiń 120-dan astam turaqty múshesi bar. «Aqyldastardyń» bir múshesi Jarma aýdanynyń týmasy, ardager-jýrnalıst Máýitqazy Zúkenovti qoǵamǵa kóp eńbek sińirgeni úshin  arnaıy maqtaý qaǵazben marapattadyq. Bir sózben aıtqanda, «Aqyldastarda» qalamyzǵa oblysymyzdyń barlyq jerinen kelgen ardagerler qamtylǵan. Qala, el ómirindegi oqıǵalardan syrt qalyp otyrǵan joqpyz. Jas urpaqty otansúıgishtik sezimge baýlý, ulttar arasynda dostyq pen birlikke dáneker bolý, halqymyzdyń salt-dástúrin nasıhattaý, memlekettik tildi damytýǵa qolymyzdan kelgenshe járdemdesý jáne taǵy basqa máseleler basty nazarymyzda. Sony eskergen bolar, qalalyq ákimdik birlestikti qyzmet kabınetimen qamtamasyz etti. Onyń syrtynda birlestiktiń 12 belsendi múshesin Táýelsizdik merekesine oraı oblys ákimi merekelik medalmen marapattady. Sonyń bári qosyla kelgende kóńilimizdi kóterip, ómirge qush-tarlyǵymyzdy arttyra túsýde. «Aqyldastar» músheleri elimizdiń qoǵamdyq ómirinen de syrt qalyp kórgen emes. Endi, mine, onyń músheleri 26 sáýirde ótetin prezıdenttik saılaýǵa bir kisideı qatysatyndyqtaryn aıtyp otyr jáne barsha qazaqstandyqtardy el ómiri úshin mańyzdy osy saıası úderiske jumyla qatysýǵa shaqyrady. Raýshan NUǴMANBEKOVA, jýrnalıst. SEMEI. Sýrette: S.Beısenbaev.