Áńgimemizdiń «álqıssasyn» grek-rım kúresinen bastasaq. Elimizdiń ulttyq quramasy álem chempıonattaryna 1993 jyldan beri úzbeı qatysyp keledi. Sol jyly Shvesııanyń bas shahary Stokgolmde ótken básekede Dáýlet Turlyhanov (82 kg) kúmis medaldy moınynda jarqyratty. Fınalda túrkııalyq Hamza Erlikaıdan utyldy. Sóıtip, buǵan deıin álem chempıonatynyń altyny men qola medalin oljalaǵan dańqty balýanymyz Skandınavııa túbeginde de jeńis tuǵyryna kóterildi.
1994 jyly segiz balýanymyz Fınlıandııanyń Tampere qalasyna sapar shekti. Solardyń arasynan Iýrıı Melnıchenko (57 kg) sýyrylyp shyqty. Barlyq qarsylastaryn qapy qaldyryp, álem chempıony atandy. Fınalda reseılik Aleksandr Ignatenkonyń tas-talqanyn shyǵardy.
1995 jylǵy dúnıejúzilik dodany Chehııanyń astanasy qabyldady. Pragada qorjynymyzǵa qos kúmis medal tústi. Onyń ıegerleri – Iýrıı Melnıchenko (57 kg) men Baqtııar Baıseıitov (74 kg). Qos balýan da asqan sheberlik tanytty. Melnıchenko bastapqy básekelerdiń birinde áıgili Aleksandr Ignatenkony utsa, Baıseıitov jartylaı fınalda Olımpııa oıyndarynyń jeńimpazy, álemniń úsh dúrkin chempıony Mnaskan Iskanderıannan aılasyn asyrdy. Biraq aqtyq aıqasta jerlesterimizdiń joly bolmady. Iýrıı amerıkalyq Denıs Halǵa, Baqtııar fransýz Ivon Rıamerge ese jiberdi.
1997 jyly Polshanyń Vorslav qalasynda Iýrıı Melnıchenko (58 kg) eki dúrkin álem chempıony atandy.
1998 jyly Shvesııanyń Evle qalasynda elimizdiń balýandary ózderiniń myqtylyǵyn túpkilikti moıyndatty. Tórtkúl dúnıeniń teńdessizderi bas qosqan jarysta bizdiń komandanyń qorjynyna qos altyn medal tústi. Mhıtar Manýkıan (63 kg) qarsy kelgenderdiń barlyǵyn qoǵadaı japyryp ótti. Baqtııar Baıseıitov (76 kg) fınalda Olımpıada chempıony, kýbalyq Roberto Felıberto Askýıany taza utty.
1999 jyly Grekııanyń Afınasynda Mhıtar Manýkıannyń (63 kg) qaıta baǵy jandy. Ol jeńis tuǵyrynyń eń bıik satysyna kóterilse, Iýrıı Melnıchenko (63 kg) ekinshi márte kúmis júldeger atandy.
2001–2009 jyldar aralyǵynda Qazaqstan quramasy jeti álem chempıonatyna qatysyp, sonyń tórteýinen qorjyny bos qaıtty. Atap aıtsaq, 2001, 2002, 2006, 2007 jyldary jerlesterimiz óz jankúıerlerin qýanta almady. 2003 jyly Georgıı Sýrsýmııa (120 kg) qola medal alsa, 2005 jyly Ermek Kóketov (55 kg), 2009 jyly Nurbaqyt Teńizbaev (60 kg) sol mejeden kórindi.
2010 jyly Máskeýde qos qandasymyz – Almat Kebisbaev (60 kg) pen Nurmahan Tynalıev (120 kg) qola medal ıelendi. 2011 jyly Ystanbulda Almattyń altyn alýǵa tamasha múmkindigi boldy. Alaıda fınalda qandasymyz ırandyq Omıd Noýrızıge ese jiberdi. Nurmahan taǵy da úshinshi orynǵa taban tiredi. 2013 jyly Býdapeshtte N.Tynalıev álemdik dodada úshinshi ret qola medaldy enshiledi.
2015–2021 jyldar aralyǵynda Almat Kebisbaev (59 kg, 63 kg, 67 kg) taǵy úsh ret qola medaldy oljalady. Osy jyldary uıymdastyrylǵan jarystarda Almattan bólek, taǵy bireshe balýannyń baǵy jandy. Atap aıtsaq, 2015 jyly Las-Vegasta Dosjan Qartyqov (75 kg) kúmis alsa, 2017 jyly Parıjde Meırambek Aınaǵulov (59 kg) pen Demeý Jadyraevtyń (71 kg) bas júldeni oljalaýǵa tamasha múmkindikteri boldy. Biraq sheshýshi saıysta Meırambektiń japonııalyq Kenıtıro Fýmıtaǵa, Demeýdiń germanııalyq Frank Shteblerge áli jetpedi.
2018 jyly Býdapeshtte Aıdos Sultanǵalı (60 kg) men Meıirjan Shermaǵahanbet (67 kg) úshinshi satyǵa jaıǵasty. 2019 jyly Astanada Qorlan Jaqansha (55 kg) ekinshi, Meırambek Aınaǵulov (60 kg) úshinshi oryndardy enshiledi.
2022 jyly Belgradta Aıdos Sultanǵalı (60 kg) úzdik úshtikti túıindedi. 2023 jylǵy Serbııanyń astanasyndaǵy jarysta jerlesterimiz tegis utyldy. Byltyr Tıranada Olımpıadalyq emes salmaq dárejeleri boıynsha ótken álemdik dodada Erjet Jarylqasyn (63 kg) erledi. Fınalǵa deıin jetken ol ázerbaıjandyq Nıhat Mámedlıden utylyp, kúmisti qanaǵat tutty.
1993–2025 jyldar aralyǵynda jalaýy jelbirgen álem chempıonattarynda elimizdiń grek-rım kúresi sheberleri 5 altyn, 9 kúmis, 15 qolaǵa qol jetkizdi. Barlyǵy – 29 júlde. Árıne, bul az tabys emes. Degenmen bizdi qynjyltatyny – altynnyń azdyǵy. Bas júldeniń beseýin de biz HH ǵasyrda aldyq. Sońǵy ret 1999 jyly Afınada ánuranymyz shyrqaldy. Sodan beri shırek ǵasyrdan asa ýaqyt ótti. Naqtylap aıtsaq, 26 jylda 20 jarystyń jalaýy jelbiredi. Sol ýaqyt ishinde kúrestiń osy túrin serik etken birde-bir sańlaǵymyz jeńis tuǵyrynyń eń bıik satysyna kóterile alǵan joq.
