Merekelik medal tabystaldy

«Búgin halqymyz úshin asa qasterli merekeni atap ótip jatyrmyz. Qazaqstan Respýblıkasynyń Konstıtýsııasyna 30 jyl tolyp otyr. Bul – táýelsizdigimizdiń eń uly jetistikteriniń biri. Sebebi Konstıtýsııa – eldiń negizgi zańy ǵana emes, memleketimizdiń tiregi, qoǵamymyzdyń tuǵyry. Uly dala tarıhyna úńilsek, ata-babamyz árdaıym ádildikke, zańdylyqqa erek­she mán bergen. Eldiń tirshili­gin rettep, daý-janjaldy shesh­ken bıler ınstıtýty – sonyń aıǵa­ǵy. Áz Táýke han tusyndaǵy Jeti jarǵy – halqymyzdyń quqyq­tyq mádenıetiniń asyl qazynasy. Búgingi Ata zań – sol dástúrdiń zań­­dy jalǵasy. Sondyqtan biz úshin ádilet pen zań ústemdigi – tarı­hı qundylyq. 1995 jyly búkil­halyqtyq referendýmda qa­byl­danǵan Konstıtýsııa elimizdiń jańa dáýirin ashty. Ol Qazaqstandy demokratııaly, zaıyrly, quqyq­tyq memleket retinde bekitti. Ár­bir azamattyń quqyǵy men bostan­dy­ǵyn qorǵaý basty qaǵıdaǵa aı­naldy. Prezıdent Qasym-Jomart Toqaevtyń bastamasymen 2022 ­jy­ly elimizde aýqymdy konstıtý­sııa­lyq reforma júrgizildi. Bul – Ádiletti Qazaqstan qurý jolyn­daǵy tarıhı qadam. Parlament­tiń róli artty, Konstıtýsııalyq sot quryldy. Saıası báseke kúsheıdi. «Halyq únine qulaq asatyn mem­leket» qaǵıdasy naqty iske asa bas­tady. Konstıtýsııa – qaǵazdaǵy sóz emes, bul turaqtylyǵymyz­dyń kepili, bolashaǵymyzdyń berik irget­asy. Táýelsiz Qazaq­stan­nyń tu­raqty damýy Konstıtý­sııa qaǵı­dattaryn buljytpaı oryndaýmen tikeleı baılanysty. Negizgi zańymyzdy qasterleý – árbir azamattyń qasıetti boryshy. Kók baıraǵymyz árdaıym bıikte jelbirep, yntymaqtastyq jolynda órken jaıǵan memleketimizdiń mártebesi óse bersin», dedi Ǵabıt Ábdimájıtuly.

Merekelik keshte elimizdiń órkendeýine ólsheýsiz úles qosqan, qoǵamdyq-saıası ómirde belsendilik tanytqan jáne óz salasynda eńbektiń ozyq úlgisin kórsetken bir top azamat «Qazaqstan Respýblıkasy Konstıtýsııasyna – 30 jyl» merekelik medalimen marapattaldy. Olardyń qatarynda №2 qalalyq aýrýhanasy hırýrgııa bóliminiń meńgerýshisi Serik Joldasov, №23 mektep-lıseı muǵalimi Shekerbek Shahabaev, jýrnalıst, respýblıkalyq «Ýaqyt» gazetiniń bas redaktory Talǵat Baltabaev, Shymkent qalasy Qarataý aýdany ákiminiń orynbasary Dosaly Amangeldıev, Shymkent qalasy máslıhatynyń tóraǵasy Bahadyr Narymbetov, «Amanat» partııasy Shymkent qalalyq fılıalynyń tóraǵasy Murat Joldyhodjaev bar. Sonymen qatar saltanatty is-shara barysynda ózge de eńbek ozattary qala ákiminiń qolynan Alǵys hattar aldy.

Merekelik medal ıegeri S.Jol­dasovtyń aıtýynsha, 30 jylda eli­miz qarqyndy damydy. Qazirgi tańda elimiz TMD, Ortalyq Azııa boıynsha órkendeýdiń aldyńǵy shebinde kele jatyr. Qazaq jurty osy baǵytynan taımaı, ósip-órkendeı bersin degen tilegin aıtty. Sondaı-aq ol sózinde qazirgi tańda respýblıkada medısınalyq qyz­met sapasy jaqsarǵanyn atap ótip, aýrýhana, emhanalardyń jaǵdaıy osydan otyz jyl burynǵy kezben salystyrýǵa múldem kelmeıtinin jetkizdi. Sonyń ishinde №2 aýrýhana da materıaldyq-tehnıkalyq jaǵynan jaqsara túsken. Búgingi tańda atalǵan medısınalyq mekemede kún saıyn kúrdeli operasııalar jasalady. Sondaı-aq aýrýhana basshylyǵy osy kúnde transplantasııa salasyn damytýǵa erekshe kóńil bóle bastaǵan. Dárigerdiń aıtýynsha, №2 qalalyq aýrýhanasy respýblıkalyq reıtıng­te 7-oryn aldy. Bul medısınalyq uıymnyń kóp jetistigin ańǵar­ta­dy. Birinshi kezekte ol joǵary uıymdastyrýshylyq qyzmet bolsa, ekinshiden, kásibı bilikti mamandardyń shoǵyrlanýy, úshin­shiden, zamanaýı materıal­dyq-tehnıkalyq bazanyń bolýy. Marapat ıesiniń pikirinshe, elimizde medısına salasynyń qa­ryshtap damýyna birinshi kezekte Konstıtýsııa túrtki boldy. О́ıt­keni Ata zańymyzda adam men onyń ómiri eń basty qundylyq ekeni aıtylǵan. Sondyqtan respýblıkada áleýmettik salaǵa, onyń ishinde halyqtyń densaýlyǵyn jaqsartýǵa barynsha kóńil bólinip otyr.

«Konstıtýsııa kúni – elimizdegi eń mańyzdy merekelerdiń biri. Sebebi búkil memlekettiń zańy osy Konstıtýsııa aıasynda quralady. Bul – bizdiń quqyqtyq tuǵyrymyz. Ata zańnyń birinshi babynda Qazaq­stan ózin demokratııaly, zaıyrly, quqyqtyq jáne áleýmettik memleket retinde tanyǵan. Konstıtý­sııa boıynsha eń basty qundylyq – ­adam men onyń ómiri jáne quqyq­tary, bostandyǵy. Sondyqtan biz­diń Ata zań osy jyldar ishinde ózi­niń ómirsheńdigin kórsetti. Árı­ne, ýaqyt bir ornynda turmaıdy. Zaman ózgeredi. Qoǵam túrlene­di. Soǵan qaraı zańdar da ózgerip ­jatady. Bul – qalyp­ty qubylys. Biraq kez kelgen quqyqtyq jańǵyrtý­lar eldi demokratııalyq jolǵa bastap, erkindik qaǵıdattaryn kú­sheıtýge qyzmet atqaryp jatyr. Osy Ata zańnyń arqasynda Qazaqstan damýdyń dańǵyl jolyna túsip, álemdik qaýymdastyqta moıyndalǵan abyroı-bedeli bıik, sózi ótimdi memleketke aınaldy. Al munyń barlyǵynyń negizin­de, joǵaryda aıtyp ótkenimdeı, Konstıtýsııamyz jatyr. Ata zańy­­­myzdy ustanyp, zań, ere­jege baǵynsaq, bolashaǵymyz jar­qyn bolary anyq. Konstıtý­sııa Týy­­myz ben Eltańbamyz sekil­di táýel­sizdigimizdiń nyshany bo­lyp sanalady», dedi Shymkent qala­sy máslıhatynyń tóraǵasy Baha­dyr Narymbetov.

Aıtysker aqyn, Qarataý dás­túrli óner mektebiniń basshysy Birjan Baıtýov ta Konstıtýsııa kúni merekesine oraı óziniń júrek­jardy lebizin bildirdi.

«Ata zań – memlekettiń negizgi quqyqtyq tiregi. Sondyqtan ár el úshin Konstıtýsııa kúni – eń qadirli, aıshyqty merekeniń biri. Konstıtýsııa kúnin merekeleý – eń birinshiden, halyqtyq rýhty kóteretin qural. Ony joǵary deń­geıde atap ótýge eń aldymen memlekettiń ózi múddeli. Osy tur­ǵydan kelgende qalalyq ákimdik ­Ata zań merekesin óte joǵary deń­geı­de uıymdastyrdy. «Kók týdyń jelbiregeni» ánin búkil kórer­men bolyp oryndarynan tik turyp shyrqaý qalaı bolǵanda da adam­nyń rýhyn oıatady, otanshyldyq sezi­min kúsheıtedi. Qazaq eline zań ústem­dik qurǵan qoǵamǵa aınalýdy tileımin», dedi aqyn.

B.Baıtýov otyz jylda elimiz áleýmettik-ekonomıkalyq salamen birge mádenıet pen ónerdi de qatar damytqanyn atap ótti. Onyń basty sebebi – turaqtylyqty qamtamasyz etken zań men tártiptiń ústemdigi. Qoǵamdaǵy tynyshtyq pen turaqtylyq – Qazaqstannyń baǵa jetpes qazynasy. О́ıtkeni sonyń arqasynda respýblıka kóptegen jetistikke jetti. Áli de asýlardy baǵyndyryp keledi. Árıne, áleý­mettik-ekonomıkalyq turǵydan bizdiń el bireýden ilgeri, bireýden keıin bolýy múmkin. Al biraq turaqtylyq jóninen Qazaqstanǵa jeter memleket joq. Aıtysker aqynnyń paıymynsha, shaharda dástúrli mekteptiń ashylýy da – turaqtylyq pen birliktiń arqasy. Túrli daý-janjal bolyp jatqan qoǵamda óner týraly áńgime aıtýdyń ózi artyq bolar. «Jaqsydan sharapat» degendeı, elimizde mádenıet pen ónerge úlken kóńildiń bólinip jatýy da – Konstıtýsııanyń tıgizgen sharapaty. Osy qoldaýdyń arqasynda búgingi tańda dástúrli óner mektebinde 700-ge jýyq bala tálim-tárbıe alyp jatyr. Osynyń ózi – ulttyq ónerdi jańǵyrtýdaǵy úlken jetistiktiń biri. Sonymen qatar ol ashylǵanyna tórt jyl bolǵan dástúrli mektep respýblıkada moıyndalǵan «Kúmis dombyra», «Kúmis qalam», «Kúmis kómeı» atty jobalardy ómirge ákelgenin qosa ketti. Bul jobalardyń bári de jastardyń shyǵarmashylyq talantyn damytýǵa baǵyttalǵan.

Konstıtýsııa kúnine arnalǵan saltanatty kesh sońy konserttik qoıylymmen aıaqtaldy. Ártúrli patrıottyq án oryndaǵan res­pýb­lıkalyq deńgeıdegi «Alataý serileri» toby sekildi estrada jul­dyzdary men halyqaralyq baı­qaý­lardyń laýreaty «Qazyna» bı-ansambliniń óneri kópshilik­tiń ystyq yqylasyna bólendi.