Foto: Ál-Farabı atyndaǵy QazUÝ-dyń Baspasóz qyzmeti
Bul joba QazUÝ men Qytaıdyń joǵary tehnologııalyq jetekshi kompanııasy – Jiangsu Huibo Robotics Technology Co., Ltd. arasyndaǵy strategııalyq áriptestiktiń nátıjesinde júzege asty.
Ashylý rásimi Beıjińde ótken Qazaqstan–Qytaı iskerlik keńesi aıasynda uıymdastyryldy. Sharaǵa QazUÝ Basqarma Tóraǵasy – Rektor Janseıit Túımebaev pen Jiangsu Huibo Robotics Technology Co., Ltd. ókili Lı Ven hanym qatysty.
Taraptar ózara yntymaqtastyqty keńeıtýge jáne ǵylym men bilim salasyndaǵy birlesken jobalardy iske asyrýǵa nıetti ekenderin bildirdi. Sondaı-aq jańa ortalyqtyń aldaǵy ýaqytta bilim, ǵylymı zertteý jáne ınnovasııany toǵystyrǵan iri klasterge aınalatyny atap ótildi.
Shara barysynda ınstıtýt pen ortalyqqa arnalǵan beınerolık kórsetildi. Jańa nysan KazNU Hub aýmaǵynda ornalasqan, jalpy aýdany – 600 sharshy metr. Jobaǵa 2,5 mln AQSh dollary kóleminde ınvestısııa quıyldy. Qazirgi ýaqytta munda 13 zamanaýı robot jumys istep tur.
Instıtýt aıasynda bakalavrıat, magıstratýra jáne doktorantýra deńgeılerinde «Robototehnıka», «Mehatronıka», «Jasandy ıntellekt» jáne «Zattar ınterneti» (IoT) baǵyttarynda birlesken bilim berý baǵdarlamalary qolǵa alynady.
Ǵylymı-zertteý qyzmeti de basty nazarda bolmaq. Zertteýshiler óndiristik, servıstik jáne bilim berý robottary salasynda tájirıbe júrgizip, óndiristi avtomattandyrý men aqyldy basqarý júıelerin ázirleýge úles qosady. Sonymen qatar joba sheńberinde startaptar men ınnovasııalyq kompanııalardy qurý josparda bar.
Bul bastama Qazaqstannyń sıfrlyq damý baǵytyndaǵy mańyzdy qadam bolyp, eldiń halyqaralyq ınnovasııalyq keńistiktegi bedelin arttyra túsedi.
