Foto: parlam.kz
Depýtattyń aıtýynsha, jazǵy ýaqytta Medeý, Bostandyq jáne Naýryzbaı aýdandarynda memlekettik organdarmen birlesken reıdter barysynda birqatar zańsyzdyqtar anyqtalǵan. Atap aıtqanda, tabıǵı logtar men ózen arnalarynyń kómilýi, taý jotalarynyń qyrqylýy jáne Zaılıı Alataýynyń baýraıyndaǵy jappaı zańsyz qurylys jumystary júrgizilip jatyr.
«Tabıǵı jyralardyń bitelýi úlken qaýip tóndiredi. Eger muzdyqtar erip, morenalyq kólder tasıtyn bolsa, myńdaǵan adam úılerimen birge sý astynda qalýy múmkin. О́zimniń reıdterim kezinde 12 jyranyń kómilip jatqanyn anyqtadym. Olarǵa qurylys júrgizýge, ýchaske berýge jáne ondaı úılerdi tirkeýge túbegeıli tyıym salý qajet» dedi depýtat.
Sonymen birge, ol Alataý baýraıyndaǵy taýlardyń qyrqylýy beleń alyp otyrǵanyn, zań júzinde tyıym salynǵanyna qaramastan, elıtalyq kottedjder úshin jer bederiniń joıylyp jatqanyn atap ótti. Bul jerlerdiń kópshiligi yqpaldy kásipkerler men sheneýnikterdiń týystaryna tıesili ekeni belgili boldy.
Baqytjan Bazarbek Almatydaǵy qurylys salasyndaǵy zańsyzdyqtardy da synǵa aldy. Onyń aıtýynsha, birqatar iri nysandar jobalyq-smetalyq qujattamasyz, saraptamasyz jáne ruqsatsyz salynyp jatyr. Mysal retinde ol «RAMS» kompanııasynyń 40 qabatty munarasyn jáne «Praım Park» turǵyn úı keshenin atady. Osyndaı zańsyz nysandardyń sany jıyrmadan asatynyn jetkizdi.
Depýtat sot sheshimi boıynsha buzylýǵa tıis «Monblan» jáne «Shveısarııa» turǵyn úı keshenderiniń úsh jyl ótse de áli kúnge deıin tur ekenine nazar aýdardy. Ol Ádilet mınıstrligi men sot oryndaýshylarynyń sheshimdi oryndaýǵa asyqpaı otyrǵanyna kúmán keltirip, memlekettik organdar tarapynan yqtımal sybaılas jemqorlyqqa tekserý júrgizýdi talap etti.
Saýal sońynda depýtat Bas prokýratýradan:
- Zańsyz nysandardy buzý týraly sot sheshimderiniń oryndalýyn erekshe baqylaýǵa alýdy;
- Jyralardy kómýge tolyq tyıym engizip, zańsyz berilgen jerlerdi memleketke qaıtarýdy;
- Taýlardyń qyrqylýyn túbegeıli toqtatyp, búlingen aýmaqtardy qalpyna keltirýdi surady.
Sonymen qatar, ol Almatynyń jańa ákimi Darhan Satybaldymen birlesken jumystyń nátıjeli bastalǵanyn, zańsyz qurylystardy anyqtaý jáne súrý isinde oń ózgerister baıqalǵanyn atap ótti.
«Jańa ákimmen birge zańsyzdyqtarǵa qarsy naqty sharalar qabyldanyp jatyr. Bul baǵyttaǵy yntymaqtastyǵymyz ári qaraı da jemisti jalǵasady dep senemin», dedi Májilis depýtaty Baqytjan Bazarbek.
