Saılaýdy qoldaýǵa arnalǵan forým

Aqtóbe qalasyndaǵy «Qazaqstan halqy Assambleıasy» ǵımaratynda Qazaqstan halqy Assambleıasynyń «Biz – Qazaqstan halqymyz»  atty respýblıkalyq aksııasy aıasynda forým ótkizildi. Aqtóbe oblysy Qazaqstan halqy Assambleıasy atqarýshy hatshy­lyǵy­nyń muryndyq bolýymen, «Qoǵamdyq kelisim» kommýnaldyq memle­kettik mekemesi jáne etnomádenı birlestiktermen birlese otyryp uıymdastyrǵan bul sharaǵa  Aqtóbe oblysy  Qazaqstan halqy Assambleıasy janyndaǵy  analar keńesiniń, «Birlik» aqsaqaldar keńesiniń, «Arý ana» kóp balaly analar qoǵamdyq birlestiginiń, jas­tar qanatynyń músheleri qatysty. Qoǵamdyq ómirge belsene aralasyp júrgen áıelderdiń alqaly jıynyn Aqtóbe oblysy Qazaqstan halqy Asssambleıasy  hatshylyǵynyń meńgerýshisi Joldas Nurshın qysqasha sóz sóılep ashyp, alda bolatyn kezekten tys prezıdenttik saılaýdyń mańyzyna toqtaldy.  Ol jınalǵandarǵa 26 sáýirge taǵaıyndalǵan saılaý týraly jan-jaqty áńgimelep, saılaý úderisiniń búgingi barysynan habardar etti. Ol óz sózinde ananyń júregi árqashanda óz eliniń tabysy men qıynshylyǵyn elden erekshe sezetinin aıta kelip, barlyq óńirlerde Qazaqstan halqy Assambleıasy janynan analar keńesteri qurylǵanyn atap ótti. Áıelderdiń otbasynyń ajary ǵana emes, qoǵamdyq ómirdiń de qýatty kúshi ekenin eske saldy. Analardyń rýhanı jáne tárbıelik róli,  otbasylyq qundylyqtardy saqtaý jáne damytý arqyly  qoǵamdyq kelisimdi nyǵaıtýǵa baǵa jetkisiz úles qosyp otyrǵanyna toqtaldy. Elimizde ótkeli jatqan kezekten tys prezıdenttik saılaýda da aq jaýlyqty analarymyz ben kórikti qyz-kelinshekterimizdiń uıymshyldyq pen birliktiń uıytqysy bolatynyna senim artty. Odan keıin sóz alǵan oblys­tyq Qazaqstan halqy Assam­bleıasy janyndaǵy «Birlik» aqsaqaldar keńesiniń tóraǵa­sy Erkin Qurmanbekov,  ýkraın­dar­dyń jeksenbilik mektebiniń oqytýshysy Stalına Balıýra, «Shat­lyq» tatar-bashqurt etnomá­denı birlestiginiń basqarma múshesi Ram­zııa Esembaeva jáne basqalary elimizdegi ultaralyq tatýlyq pen dostyqtyń tuǵyry beriktigin tilge tıek etti, alda bolatyn  saı­laýdyń uıymshyldyqpen ótýine atsalysatyndyqtaryn jetkizdi. Forýmǵa qatysýshylar  óńir áıelderine arnap úndeý qabyldady. Onda elimizde, otbasyndaǵy turaqtylyq pen tabystyń, balalar  men  Qazaqstan halqynyń jarqyn bolashaǵy analarǵa asa qymbat ekeni atap kórsetilip, alda bolatyn Qazaqstan Respýblıkasynyń kezekten tys Prezıdent saılaýyna barsha qazaqstandyqtardy bir kisideı uıymshyldyqpen qatysýǵa shaqyrdy. Satybaldy SÁÝIRBAI, «Egemen Qazaqstan». Aqtóbe oblysy.