Sýret: egov.kz
Eńbek jáne halyqty áleýmettik qorǵaý mınıstrliginiń málimetinshe, byltyr 96,9 myńnan astam ótinim syrttaı formatta qaralǵan. Bul – kýálandyrýdan ótken múgedektigi bar adamdardyń jalpy sanynyń 37,4%-y.
Memleket basshysy erekshe qajettilikteri bar adamdarǵa barynsha qolaıly jaǵdaı jasaýdy tapsyrǵan bolatyn. Jaýapty mınıstrlikke múgedektik tobyn anyqtaýshylar ınstansııalardan ótýde qaǵazbastylyqqa salynbaýyn júktedi. Osy tapsyrmany oryndaý maqsatynda Eńbek jáne halyqty áleýmettik qorǵaý mınıstrligi Densaýlyq saqtaý, Sıfrlyq damý, ınnovasııalar jáne aeroǵarysh ónerkásibi mınıstrlikterimen birlesip, eldiń barlyq 20 óńirinde qanatqaqty rejimde medısınalyq-áleýmettik saraptama (MÁS) júrgizýdiń syrttaı formaty jobany iske asyryp jatyr.
Múgedektik tobyn belgileý jónindegi qyzmetti alý úshin ótinish berýshige turǵylyqty jerindegi emhanaǵa júginip, mindetti tekserýden ótý qajet. Odan keıingi sharýanyń barlyǵy aqparattyq júıelerdi ıntegrasııalaý esebinen onyń qatysýynsyz ótedi.
Syrttaı kýálandyrýǵa kóshý eń aldymen ákimshilik, bıýrokratııalyq kedergilerdi joıady. Ekinshiden, MÁS saraptamalyq sheshimderiniń ashyqtyǵyn qamtamasyz etedi. Úshinshiden, múgedektikti belgileý, múgedektigi bar adamdardy áleýmettik qorǵaý sharalaryn anyqtaý qyzmetterin úıden shyqpaı-aq alýǵa múmkindik beredi. Sonymen qatar kórsetiletin qyzmetti alýshynyń múgedektik tobyn belgileýshi mekeme qyzmetkerimen tikeleı baılanysyn boldyrmaıdy. Nátıjesinde, sybaılas jemqorlyq táýekelderi azaıady.
