Sýret: rus.baq.kz
Álem chempıonatynyń dodasyn búgingi sessııada áıelder arasynda Elına Bazarova bastaıdy. 54 kg salmaqta dodaǵa qosylatyn Elına ózbekstandyq Nıgına Ýktamovaǵa qarsy aıqasady. Parıj Olımpıadasyna qatysqan jastar arasynda álem chempıony atanǵan ózbek qyzy osal emes. Jerlesimiz alǵashqy aınalymnan ótse, ekinshi aınalymda majarstandyq Hanna Lakotarmen joly túıisedi.
Eldos Saıdalın baptaıtyn qyzdar quramasyna zor jaýapkershilik júktelip otyr. Úsh dúrkin álem chempıony, Parıj Olımpıadasynyń qola júldegeri Nazym Qyzaıbaı (48 kg) jahan dodasyn ekinshi aınalymnan bastaıdy. Ol majarlyq Lılııa Sheleskıı men Gonkong úmitin arqalap kelgen Lam Hon Kı tartysynyń jeńimpazymen judyryqtasady. Álem chempıony Alýa Balqybekova (51 kg) da alǵashqy aınalymda tynyǵyp, ońtústikkoreıalyq Mýn men aljırlik Fatıma Mansýrı aıqasynda basym túsken boksshymen shırek fınal joldamasyna talasady. 57 kg salmaqta Karına Ibragımovanyń alǵashqy tartysy grek qyzy Panagıta Kýzılýga qarsy ótse, álem chempıonatynyń kúmis júldegeri Vıktorııa Grafeeva (60 kg) Kosova namysyn qorǵaıtyn Doneta Sadıkýdiń qarymyn baıqaıdy. 65 kg salmaqta álem chempıony Aıda Ábikeeva Majarstan boksshysy Anna Lýsa Hamorıge qarsylas atandy. 70 kg salmaqta Natalıa Bogdanova da alǵashqy aınalymda tynyǵyp, úndistandyq Sýprııa Devı men dat qyzy Dıtte Frostholm jekpe-jeginde jeńiske jetken boksshyǵa qarsy aıqasady. Jerebe Nadejda Rebıaske (75 kg) aýyr tústi. Alǵashqy aınalymda-aq álem chempıony qytaılyq Vang Lınaǵa tap bolyp otyr. Azııa chempıony Gúlsaıa Erjan (80 kg) lıtvalyq Iveta Lesınskıtege qarsy aıqas ótkizedi. 80 kg salmaqtan joǵarylar tartysynda Eldana Tálipova da alǵashqy aınalymda bos. Shırek fınaldyq tartysta Greıs Bakl (Anglııa) men Selın Lı Lo (Jańa Zelandııa) aıqasynyń jeńimpazyna qarsylas atanady.
Búgin erler arasynda rıngke aldymen Saǵyndyq Toǵambaı (90 kg) shyǵyp, Anglııa úmiti Isaak Okoǵa qarsy jekpe-jekke túsedi. О́zge jigitterdiń de alǵashqy aınalymdaǵy qarsylastary belgili. 50 kg salmaqta álem chempıony Sanjar Táshkenbaı Hýzaıfa Eshısh (Iordanııa) men Eýropa chempıony ırlandııalyq Lýıs Rýnı aıqasynda jeńiske jetken boksshynyń qarymyn baıqamaq. Álem chempıony Mahmud Sabyrhan (55 kg) alǵashqy aınalymda tynyǵyp, Ámir Mohammadı (Belgııa) – Ortız (Meksıka) aıqasyndaǵy jeńimpazǵa qarsylas bolady. 60 kg salmaq dárejesinde Beıbarys Jeksenniń qarsylasy Leı (Taıpeı) – Jýnmılardo Ogaıre (Fılıppın) aıqasynda anyqtalady. Ertýǵan Zeınýllınov (65 kg) fransýz Ýgo Raýǵa qarsy jekpe-jekke shyǵady. Eki boksshy jazda Astanada ótken álem kýboginiń kezeńinde qolǵap túıistirip, jerlesimiz basym túsken. 70 kg salmaqta jastar arasynda álem chempıony Tórehan Sabyrhan eresekter sapynda baǵyn synap, aljırlik Iаıche Iýsýfke qarsy tartysqa túsedi. Sabyrjan Aqqalyqov (75 kg) ýkraınalyq Pavel Ilıýsha men ırandyq Mohammad Noýranı jekpe-jeginiń jeńimpazyna qarsylas bolady. Parıj Olımpıadasynyń kúmis júldegeri Nurbek Oralbaı (80 kg) ýkraınalyq Matveı Rajba men germanııalyq Ben Nosa Ehıs jekpe-jeginiń jeńimpazyna qarsy aıqasady. Álem chempıony Bekzat Nurdáýletov (85 kg) grýzın Georgıı Kýshıtashvılı (álem chempıonatynyń qola júldegeri) men horvat Leskýr tartysynyń jeńimpazyna qarsy aıqasady. Asa aýyr salmaq (+ 90 kg) dárejesinde Aıbek Oralbaıdyń qarsylasy túrik Ilııas pen túrikmen Islamov arasyndaǵy aıqasta anyqtalady.
Qaırat Sátjanov baptaıtyn erler quramasyna da zor úmit júktelip otyr. «World Boxing» uıymynyń aıasynda ótetin tuńǵysh álem chempıonatyna 68 elden 554 boksshy (329 er, 225 áıel) doda kórigin qyzdyrmaq.
