Jalǵyz goldy 24-mınýtta qonaqtar sapynda shabýyl shebinde oınaǵan Kıffer Mýr soqty. Bas bapker Álı Álıev baspasóz máslıhatynda komanda syn tezinde turǵanyn, Baqtııar Zaınýtdınov, Erkin Tapalov syndy oıynshylar jaraqatyna baılanysty oıynǵa qatysa almaıtyny da ujymnyń áleýetine aıtarlyqtaı áser etkenin aıtqan edi.
«Jigitterdiń daıyndyǵy oıdaǵydaı ótti. Ishki chempıonattyń matchtaryna qatysyp, ulttyq qurama oıynshylarynyń qarym-qabiletin kórdik. Fýtbol jaraqatqa jıi uryndyrady. Tájirıbeli fýtbolshylardyń keıbiri jaraqattanyp, qatarǵa qosyla almaǵany qynjyltady. Degenmen de ózge jigitter senimdi aqtaýǵa baryn saldy. 1-taımnyń basynan tizgin qarsylastarda bolyp, qyspaqqa aldy. Úziliske deıin esepti saqtaýǵa kúsh saldyq. 2-taımda qarsylas komandanyń jasandy alańǵa jersine almaýyn, jergilikti jankúıerlerdiń bizdi qyzý qoldaýyn, Ýels oıynshylarynyń sharshap qalǵanyn utymdy paıdalanýǵa tyrystyq. Soǵan súıenip dúrkin-dúrkin shabýyl uıymdastyrdyq. О́kinishtisi, jolymyz bolmady, birneshe ret dop qarsylas qaqpasynyń mańdaıshasynan qaıtty. Jankúıerlerge erekshe alǵys aıtamyz, qurama orasan qoldaýdy sezindi», dedi Álı Hanálıuly.
Jalpy, jigitter ujymdyq oıyn úlgisin kórsetti. Jartylaı qorǵaýshy Ǵalymjan Kenjebektiń birneshe soqqysy Ýels oıynshylaryn aıtarlyqtaı abdyratty. Ulttyq quramany alańǵa bastap shyqqan kapıtan Nuráli Áliptiń sińirin sozyp, orta jolda tartystan shyǵyp qalǵany ókinishti. Matchta teń nátıje tirkeýge múmkindik mol boldy. Ulttyq qurama jeıdesin jańa kıgen jastardyń jiger tanytýy jankúıerlerdi súısintti. Fýtbolshylarynyń birazy Anglııa birinshiliginde oınap, sharbolattaı shyńdalǵan Ýels quramasyn kádimgideı sastyrdy. Ulttyq qurama sapyndaǵy alǵashqy matchyna qatysqan qaqpashy Temirlan Anarbekov qarsylastardyń birneshe qaýipti soqqysyn toıtardy.
Vallılikterdiń bas bapkeri Kreıg Bellamı stadıonnyń jasandy alańy aıtarlyqtaı aýyr soqqanyn aıtty. Tipti tabıǵı kók maısa ústinde dop teýip daǵdylanǵan oıynshylarǵa jaraqat kóldeneń kılige me dep qaýiptengenin de jasyrmady.
«Bizdiń jigitterdiń kópshiliginiń fýtbol maýsymy endi bastalady, al munda ishki chempıonat naǵyz qyzǵan shaǵynda. Buǵan deıin mundaı jasandy alańda oınap kórmegendikten de oıyn jeńil tıgen joq, jigitter aıtarlyqtaı sharshap qaldy», dedi.
Elimizdiń ulttyq qurama fýtbolshylary álem chempıonatynyń fınaldyq kezeńine irikteý oıyndaryn J tobynda ótkizip jatyr. Ázirge qorjynymyzda 3 upaı ǵana. Buǵan deıin 22 naýryzda syrt alańda Ýels quramasynan 3:1 esebimen utyldy. 25 naýryzda Lıhtenshteın quramasyn 0:2 esebimen jeńdi. 9 shildede osy «Astana Arena» stadıonynda Soltústik Makedonııa fýtbolshylaryna 0:1 esebimen jol berdi. Bes matchtan soń 10 upaı jınaǵan Ýels quramasy ázirge kósh bastap tur.
Ulttyq qurama erteń syrt alańda Belgııa quramasyna qarsy oıyn ótkizedi. 10 qazanda Lıhtenshteın komandasyn qabyldaıdy, 13 qazanda Soltústik Makedonııaǵa barady. Irikteý kezeńin túıinder match 15 qarasha kúni «Astana Arenada» ótedi, jigitter Belgııa quramasyna qarsy tartysqa túsedi.
