Prezıdent bul jobanyń aýqymy erekshe ekenin jetkizdi. Qazirdiń ózinde arnaýly aýmaq bólinip, bastapqy josparlaý aıaqtalǵan, negizgi ınfraqurylym jelileri tartylǵan.
«Meniń Qytaıǵa jasaǵan saparym kezinde álemdik deńgeıdegi kompanııalarmen mıllıardtaǵan dollarlyq kelisimder jasaldy. Sol kompanııalardyń biri jahandyq tehnopolıs Shenchjen qurylysyna qatysqan. Endi dál osy uıym Alatau city jobasyn júzege asyrýǵa tikeleı qatysady», dedi Toqaev.
Memleket basshysy on kún ishinde Úkimetke qalaǵa arnaýly mártebe beretin Jarlyq jobasyn ázirleýdi tapsyrdy. Al alty aıdyń ishinde basqarý rejımi, qarjylyq modeli jáne ózge de mańyzdy tustary aıqyndalǵan jeke zań qabyldanýy tıis.
«Erekshe mártebe – artyqshylyq emes, qajetti qural. Onsyz joba qaǵaz júzinde qalyp qoıýy múmkin», dedi Prezıdent.
Alatau city Ortalyq Azııadaǵy alǵashqy tolyq sıfrlyq qala bolmaq. Munda smart-sıtı tehnologııalary engizilip, taýarlar men qyzmetterdi krıptovalıýtamen tóleý múmkindigi qarastyrylady.
«Bul joba – elimizdiń bolashaq kelbeti. Alatau city tehnologııalyq progress pen jaıly ómir súrý ortasyn úılestiretin jańa úlgige aınalady», dedi Qasym-Jomart Toqaev.
