Tartystyń ón boıynda basymdyq tanytqan belgııalyqtar dúrkin-dúrkin shabýyldaýmen boldy. 42-mınýtta Kevın De Brıoıne esep ashsa, 44-mınýtta Jeremı Doký esepti eseledi. Ekinshi taımda da alań ıeleri qarqynynan tanbady. 52-mınýtta Nıkolas Raskın úshinshi goldy toǵytsa, 60-mınýtta Doký enshisine ekinshi golyn jazdy. 84-mınýtta Kevın De Brıoıne de dýbl jasady. 87-mınýtta qorǵaýshy Toma Mıone Muhamedjan Seısen qaqpasyna altynshy goldy saldy. Belgııalyqtar 4 qyrkúıekte syrt alańda Lıhtenshteın ulttyq quramasyn da 0:6 esebimen jeńgen edi.
Ulttyq quramanyń bas bapkeri Álı Álıev matchtan keıingi baspasóz máslıhatynda barlyq jaýapkershilikti óz moınyna alatynyn málimdedi. «Jeńilistiń barlyq jaýapkershiligin ózim arqalaımyn. Elimizge barǵan soń, qyzmetten ketýge ótinish jazamyn», dedi.
Kezinde álem chempıonatynyń qola júldegeri bolǵan, FIFA reıtınginde alǵashqy ondyqta turǵan Belgııa quramasy myqty ujym ekenin taǵy da baıqatty. Byltyr álemdik mýndıaldiń irikteý matchtarynyń jerebesi tartylǵannan keıin-aq Belgııa ulttyq quramasynyń bas bapkeri aýysty. 60 jastaǵy fransýz Rýdı Garsııaǵa senim artyldy. Ázirge belgııalyqtar irikteý kezeńindegi 4 matchtan 10 upaı jınap, 2-satyda tur.
О́kinishke qaraı, qazaq fýtbolynyń deńgeıi, fýtbolshylardyń qarym-qabileti, qajyr-qaıraty qanshalyqty ekeni Brıýssel tórinde aıqyn ańǵaryldy. Bizdiń qurama bes oıynnan 3 upaı ǵana enshilep, 4-satyda keledi.
